10. ባይዞም ጌይ ዳኮና ታጶ ባኮ

ሙሴና ዓኣሮኔና ጊብፄ ካኣቲ (ፓኣሮኔ) ኮይላ ዴንዴኔ። ዔያታ ዴንዳዖ “ዒስራዔኤሌ ፆኦሲ ‘ታኣኮ ዴሮ ሃሼ!’ ጋዓኔ” ጌኤኔ፤ ፓኣሮኔ ጋዓንቴ ዔያቶሲ ዋይዚባኣሴ። ዒስራዔኤሌ ዓሶ ዓይላቶ ማዾ ሃሺሲ ዳኪፃፓ ሃቺም ዴኤሢ ማዾ ማዻንዳጉዲ ዎልቃዼኔ።

ፓኣሮኔ ዴሮ ‘ሃሻዓ’ ጌይፆና ዶዴኔ፤ ዬያሮ ፆኦሲ ጊብፄ ዓሶ ዎዺ ባይዛንዳ ታጶ ባኣዚ ዳኬኔ። ፆኦሲ ዬያይዲፆና ጊብፄ ካኣቲና ዔያቶኮ ፆኦዞናፓ ቢያ ባሼ ዎልቄና ማዔሢ ዻዌኔ።

ፆኦሲ ዒማና ዓባዬ ዎሮ ዋኣፆ ሱጉሢ ማሂ ላኣሜኔ፤ ጋዓንቴ ጊብፄ ካኣቲ (ፓኣሮኔ) ዒስራዔኤሌ ዴሮ ሃሺባኣሴ።

ፆኦሲ ጊብፄ ቢያይዳ ሻዻ ፓንቆ ዳኬኔ። ጊብፄ ካኣቲያ ሙሴ ዬያ ፓንቃሢ ባይዛንዳጉዲ ሺኢቄኔ። ሙሴያ ፆኦሲ ሺኢቄሢሮ ፓንቃሢ ቢያ ሃይቄኔ። ጊብፄ ካኣቲ ጋዓንቴ ፔ ዒኖ ዶዲሺ ዒስራዔኤሌ ዓሶ ሃሺባኣሴ።

ያፓ ሃሣ ፆኦሲ ሳዖ ባባይዛ ጩጉቺ ዳኬኔ፤ ሄሊሳዖ ጊንሣ ሶኦፆንቦ ዉፃሌ ዳኬኔ። ጊብፄ ካኣቲያ ሙሴና ዓኣሮኔና ዔኤሊ ዬያ ባይዛ ባኮ ዔያታ ዓጫፓ ሺኢሼቴ ዒስራዔኤሌ ዓሶ ዒ ሃሻንዳሢ ኬኤዜኔ። ሙሴያ ፆኦሲ ሺኢቃዛ ዬያ ባኮ ፆኦሲ ባይዜኔ። ያዺ ማዔቴያ ጊብፄ ካኣቲ ፔ ዒኖ ዶዲሺ ዴሮ ሃሾ ዒፄኔ።

ጊንሣ ሃሣ ፆኦሲ ጊብፄ ዓሶኮ ባኣቶ ቢያ ዎዼኔ፤ ጋዓንቴ ጊብፄ ካኣቲ ዒስራዔኤሌ ዓሶ ሃሾ ዒፄኔ።

ዬካፓ ሙሴ ጊብፄ ካኣቲ ቤርታ ዲቢንሢ ሌካ ጫሪንካ ላኣላንዳጉዲ ፆኦሲ ዓይሤኔ፤ ሙሴ ያዺዴስካፓ ጊብፄ ዓሶኮ ዑፃ ቢያ ዻርጬ ኪሢ ሌሊ ማዔኔ፤ ዬይ ኪፃ ዒስራዔኤሌ ዓሶይዳ ባኣያ ማዔኔ። ጋዓንቴ ፆኦሲ ፓኣሮኮ (ጊብፄ ካኣቲኮ) ዒኖ ዶዲሼሢሮ ዒስራዔኤሌ ዓሶ ዒ ሃሺባኣሴ።

ዬካፓ ፆኦሲ ጊብፄ ዓጮይዳ ዓኣ ባቃሌ ሃኣኮንታ ሶኦፓይዳ ዓኣ ዓሶንታ ቆሎንታ ቢያ ዎዺ ኩርሴ ሻቺ ዋርቂሴኔ። ዒስራዔኤሌ ካኣቲያ ሙሴ ዔኤላዖ፥ “ታ ዻቤኔ፤ ዒንሢ ዒስራዔኤሌ ዴሮ ዔኪ ዓኣዻኒ ዳንዳዓኔ” ጌዔኔ። ዬያሮ ሙሴ ፆኦሲ ሺኢቄኔ፥ ሻጫኣ ዋዾ ሃሼኔ።

ጋዓንቴ ፓኣሮኔ ላሚ ፔ ዒኖ ዶዲሺ ጎሜ ማዼኔ። ዒስራዔኤሌ ዴሮዋ ሃሺባኣሴ።

ዬያሮ ፆኦሲ ጊብፄ ዓሶይዳ ዓቢሢ ዳኬኔ። ዬይ ዓቢፃ ሻጫ ዓይሴ ሃኣኮ ባቃሎ ሙዪ ኩርሴኔ።

ዬካፓ ፆኦሲ ሃይሦ ኬሊ ጉቤ ጊብፄ ዓጮ ዹሚሼኔ። ጊብፄ ዓሳ ጋራፓ ኬሲ ባሺንታንዳያ ሄላንዳኣና ሳዓ ዹሚ ዴዔኔ። ዒስራዔኤሌ ዓሳ ናንጋ ቤዛ ጋዓንቴ ፖዔኬ።

ዬያ ባይሲንታም ዳኮና ታዞጶ ባኮኮ ጊንፃታዖ ጊብፄ ካኣቲ ዒስራዔኤሌ ዓሶ ሃሻኒ ኮዒባኣሴ። ጊብፄ ካኣቲ (ፓኣሮኔ) ማሊ ዋይዞ ዒፄሢሮ ፆኦሲ ፔቴ ጋፒንሢ ባኣዚ ዳኬኔ። ዬና ዳኮና ባኬላ ዒኖ ዒዛኮ ሺኢቼኔ።