8. ፆኦሲ ዮሴፔንታ ማኣሮ ዓሶዋ ዓውሴሢ

ዺቢ ሌዔኮ ጊንፃፓ፥ ያይቆኦቤ ጋርቺ ዓኣዖ ዒዛኮ ቆልሞ ሄንቂ ሞኦስካ ናንጋ ናኣቶ (ዮሴፔ ጌርሲንሢ) ዛጋንዳጉዲ፤ ጋላኣ ዔያቶም ዔኪ ዓኣዻንዳጉዲ ዮሴፔ ዳኬኔ።

ዓዳሢ ያይቆኦቤ ዮሴፔ ሚርጌና ናሽካሢሮ፥ ጊንሣ ሃሣ ዔያቶኮ ዒ ሱኡጌ ማዓንዳያ ማዒፆ ዛሎ ዓውቲ ዓውታዼሢሮ ጌርሲንሢ ዮሴፔ ዒፄኔ። ዮሴፔ ጌርሲንሢ ዛጋኒ ሙካዛ፥ ጌኔ ጎይሢና ዔያታ ዒዛ ዓርቂ ኮርሞ ዓሲም ሻንቼኔ።

ዮሴፔኮ ጌርሲንሢ ማኣሪ ማዒ ሙካንዳሢኮ ቤርታ ዔያታ ዒዛ ዑፃፓ ኬሲ ዔኬ ማኣዓሢ ዳርዚ ዋኣሪ ሱጉሢ ዑሼኔ። ዬካፓ ዬኖ ሱጉፆና ፑርቴ ማኣዔሎ ዔኪ ሙኪ ዓዶ ያይቆኦቤም ዻዌኔ። ዓዴያ ፔቴ ቦዖ ዮሴፔ ዎዺ ሙዔኔ፥ ጌይ ዬኤካዖ ሲዬኔ።

ዬንሢ ዓይሌ ሻንቺ ሃንታ ኮርሞ ዓሶንሢ ዮሴፔ ጊብፄ ዔኪ ዴንዴኔ። ዬኖ ዎዶና ጊብፄ ዓባዬ ዎሮ ዓጮይዳ ዓኣያ፥ ዎልቃዻያ ዶዲ ዓጪኬ። ዬንሢ ኮርሞ ዓሶንሢ ፔቴ ቢታንቶ ዓኣ ሱኡጌስኬያም ዓይሌ ማሂ ዮሴፔ ጊብፄይዳ ሻንቼኔ። ዬካፓ ዮሴፔ ፔ ጎዳሢ ቃራ ጎይሢና ማዺ ማኣዴኔ፤ ፆኦሲያ ዮሴፔ ዓንጄኔ።

ያዺ ጌይ ዒ ዓኣንቴ ዒዛ ጎዳሢኮ ማቻ ዮሴፔና ላሃኒ ኮዔኔ። ዮሴፔ ጋዓንቴ “ፆኦሲ ቤርታ ጎሜ ታ ማዻዓ” ጌይ ዒፄኔ። ዬያሮ ጎዳሢ ማቻ ዻጋዺ ሉኡዙሞ ጎይሢና ዎጌና ዒዛ ዓይሲሢ ቱኪሴኔ፤ ዒዚ ጋዓንቴ ቱኡዞ ማኣሮይዳኣ ፆኦሲም ጉሙርቂንታያ ማዒ ጴዼሢሮ ፆኦሲ ዒዛ ዓንጄኔ።

ዎዚ ዮሴፔ ፂሎታቴያ ላምዖ ሌዔ ሄላንዳኣና ቱኡዞ ማኣራ ቱኡቲ ዴዔኔ። ፔቴ ዋንቴ ጊብፄ ዓጮ ካኣቲ (ፓኣሮኦኔ) ፔና ዲቃሣ ላምዖ ዓውቲ ዓውታዼኔ። ዒዛ ዞራ ዓሶይዳፓ ፔቴታዖ ዬያ ዓውቶ ዒዛም ቡላኒ ዳንዳዒባኣሴ።

ፆኦሲ ጋዓንቴ ዮሴፔም ዓውቲ ቡሊሢ ዔራቶ ዒንጊናኣኮኬ፤ ዬያሮ ፓኣሮኦኔ ቱኡዞ ማኣራፓ ዮሴፔ ዔኤሊሲ ዔኪ ዬዔኔ። ዮሴፔ ዓውቶ ቡላዖ፥ “ፆኦሲ ላንካይ ሚሺ ሌዔ ዳካንዳኔ፤ ሄሊሲ ሃሣ ላንካይ ናይዚ ሌዔ ዓኣኔ” ጌዔኔ።

ፓኣሮኦኔያ ዮሴፔ ዔራቶ ሚርጌ ዲቃቲ ሄርሼኔ፤ ዬያሮ ጊብፄ ዓጮይዳ ዒዛፓ ሄሊሲ ዴማ ማዒ ማዻንዳ ቢታንቶ ዒንጌኔ።

ዮሴፔያ ላንካዎ ሚዦ ሌዖይዳ ቢያ ዺቢ ሃኣኮ ዒ ጊኢጊሼ ኮኖይዳ ዓርሢንታንዳጉዲ ዴሮም ኬኤዜኔ። ዴራኣ ሃኣኮ ሺኢሼም ዺቢ ሃኣኮ ኮኖይዳ ዓርዴሢሮ ላንካዎ ናዮ ሌዖና ዬያ ኮኖይዳፓ ዮሴፔ ሃኣኮ ዴሮም ሻንቼኔ፤ ዬያሮ ሙኡዚም ጊዳ ሃኣኮ ዓሳ ቢያ ዴንቄኔ።

ናዮኮ ዶዲፃ ጊብፄ ዓጫ ሌሊቱዋንቴ ያይቆኦቤንታ ማኣሮ ዓሶንታ ናንጋ ካኣናኔይዳኣ ዒማዺኬ።

ዬያሮ ያይቆኦቤ ሃኣኮ ሻንቆም ናኣቶ ጊብፄ ዓጮ ዳኬኔ። ዮሴፔኮ ጌርሲንሢ ሃኣኮ ሻሞሮ ጊብፄይዳ ዮሴፔ ቤርታ ሙኪ ዔቃዖ ዬይ ዮሴፔታሢ ዱማሲ ዔሪባኣሴ፤ ዒ ጋዓንቴ ዔያቶ ዔሬኔ።

ዮሴፔ ዒዛኮ ጌርሲንሢ ዖኦጪሢና ሴካ ሃንጋ ጌይሲ ዛጌስካፓ፥ “ጎዖንቴ ዔያቶቱዋቴሽ” ጌይ ማላዖ፥ “ዒጊጪፖቴ፤ ታኣኒ ዒንሢኮ ጌርሲ ዮሴፔኬ፥ ታና ዒንሢ ዓይሌ ማሂ ሻንቼያና ፑርታ ባኣዚ ታና ሄሎም ጌይ ማሊኬ፤ ጋዓንቴ ፆኦሲ ዬያ ፑርቱሞ ማሊፆ ኮሹሞሮ ማሂ ሺርሼኔ። ዬያሮ ሃይካ ሙኪ ጊብፄይዳ ናንጉዋቴ፥ ታኣኒ ዒንሢንታ ዒንሢ ማኣሮ ዓሶንታም ኮይሳ ባኣዚ ዒንጊ ማኣዳንዳኔ” ጌዔኔ።

ዮሴፔኮ ጌርሲንሢ ፔ ዓጮ ማዒ ዴንዳዖ ዮሴፔ ሼምፔና ዓኣሢ ዓዶ፥ ያይቆኦቤም ኬኤዛዛ ዒ ሚርጌና ዎዛዼኔ።

ዎዚ ያይቆኦቤ ጋርቼቴያ ፔ ማኣሮ ዓሶ ቢያሢና ዎላ ጊብፄ ዴንዲ ዒኢካ ናንጌኔ። ያይቆኦቤ ሃይቃንዳሢኮ ቤርታ ፔቴ ፔቴ ናኣቶ ዓንጄኔ።

ፆኦሲ ዓብራሃሜም ማዻንዳኔ ጌይ ጫኣቄ ጫኣቁሞ ዎዛ ዪሳኣቄ ባንሢ ሺሬኔ፤ ዬካፓ ያይቆኦቤ ባንሢ፥ ሄሊሳዖ ታጶ ላምዖ ያይቆኦቤ ናኣቶና ማኣሮ ዓሶና ባንሢ ሺሬኔ። ታጶ ላምዖ ናኣቶኮ ዜርፃ ታጶ ላምዖ ዒስራዔኤሌ ፃጶ ማዔኔ።