7. ፆኦሲ ያይቆኦቤ ዓንጄሢ

ዬያታ ናኣታ ዑጊ ኬስኬስካፓ ያይቆኦቤ ዒንዶና ዎላ ማኣራ ፔኤቃኒ ናሽካኔ። ዔኤሳዎ ጋዓንቴ ኬሞ ናሽካያ ማዔኔ። ዒርቢቃኣ ያይቆኦቤ ናሽካኔ፤ ዪሳኣቄ ጋዓንቴ ዔኤሳዎ ናሽካኔ።

ፔቴ ኬሊ ዔኤሳዎ ኬማሢፓ ናይዺንቲ ማዒ ሙኬኔ። ዔኤሳዎ ዒማና ያይቆኦቤ ኮይላ፥ “ሃዳራ፡ ኔ ካሤ ካፃፓ ታኣም ዻካ ዒንጌቴራ” ጌዔኔ። ያይቆኦቤ ጋዓንቴ፥ “ቤርታዺጋፓ ኔኤኮ ቶይዱሞ ቢታንቶ ታኣም ዒንጌ” ጌዔኔ። ዬያሮ ዔኤሳዎ ፔኤኮ ቶይዱሞ ቢታንቱሞማ ያይቆኦቤም ዒንጋዛ ያይቆኦቤያ ካሤ ካፆፓ ዔኤሳዎም ዒንጌኔ።

ያዺ ማዔስካፓ ዪሳኣቄ ዔኤሳዎ ዓንጃኒ ኮዔኔ። ጋዓንቴ ዒርቢቃና ያይቆኦቤና ዎላ ዞርቲ ዪሳኣቄ ጌሼኔ። ጌሺፆሮ ዔኤሳዎ ያይቆኦቤ ማሊ ዪሳኣቄ ኮይላ ሺኢኬኔ፤ ዪሳኣቄ ሚርጌና ጋርቼሢሮ ዓኣፓ ዴንቁዋሴ። ዬያሮ ያይቆኦቤ ዔኤሳዎ ማኣዓሢ ማይንቲ፥ ጋፓና ጴዻ ቤዞ ዓኣቺሢሮ ዋኣሪ ዒልዒ ባቃኖና ኩጮ ዑፆናይዳ ማኣዒ ዪሳኣቄ ኮይላ ሙኪ ማልቴኔ።

ያይቆኦቤ ዪሳኣቄ ኮይላ ሙካዖ፥ “ዓዴ፥ ታኣኒ ዔኤሳዎኬ፤ ታ ሃይሾ ሙኬኔ፤ ታና ኔ ዓንጃኒ ዳንዳዓኔ” ጌዔኔ። ዬያሮ ዪሳኣቄ ዑፆ ዓርቂ ዛጋዖ ዋኣሪ ፓጋኔታሢ ዱማሲባኣሴ፥ ዑፆዋ ዒ ሲንቂ ዛጋዛ ዔኤሳዎ ዔኤሳዎ ጌዔሢሮ ጎኔኬ ጌይ ዓንጄኔ።

ያይቆኦቤ ዬያይዲ ዔኤሳዎኮ ቶይዱሞ ቢታንቶንታ ዓንጆዋ ጌሺ ዔኬሢሮ ዒዚ ያይቆኦቤ ዒፂ ኮሜኔ፤ ዓዴ ሃይቄስካፓ ዒዛ ዎዻኒ ማሌኔ።

ጋዓንቴ ዒርቢቃ ዔኤሳዎ ማዻኒ ማሌ ባኮ ዋይዜኔ። ዬያሮ ዪሳኣቄና ዎላ ዞርቲ ዔያቶ ዒጊኖና ዎላ ዴንዲ ናንጋንዳጉዲ ሃኬ ዓኣ ዒጊኖ ኮራ ያይቆኦቤ ዔያታ ዳኬኔ።

ያይቆኦቤ ዒማና ዴንዲ ሚርጌ ሌዔ ዒርቢቃ ዒጊኖና ዎላ ናንጌኔ። ዒኢካ ያይቆኦቤ ናንጌ ዎዶና ላኣሊ ዔኪ 12 ዓቲንቄ ናይ፥ 1 ዉዱሮ ናይ ሾዔኔ። ፆኦሲያ ዒዛ ሚርጌና ዖርጎቼኔ።

ያይቆኦቤ ሜሶፖታሚያይዳ ላማታሚ ሌዔ ናንጌስካፓ ፔ ማኣሮ ዓሶ፥ ዒዛም ማዾ ማዻ ዓይሎንታ ቆሎዋ ቢያ ዔኪ ካኣናኔ ዓጮ ማዓኒ ማሊ ዔቄኔ።

ያይቆኦቤ ፔ ዒኖና “ዔኤሳዎ ሄኤዶ ሄሊ ታና ዎዻኒ ማላ ጎይሣ ናንዳኔ” ጌይ ዒጊጬኔ። ዬያሮ ጌኤዞ ሺሚሻኒ ዔኤሳዎም ሚርጌ ባይ ዒሺሲ ቤርታ ዳኬኔ። ባኣቶ ዒሺ ሙኬ ያይቆኦቤ ዓይላ ዔኤሳዎም “ኔ ዓይላሢ ያይቆኦቤ ሃያ ባኣቶ ኔኤም ዒንጎም ዳኬኔ፤ ዒዚ ሃይሾ ጊንፆ ሙኪ ሙኪ ዓኣኔ” ጌዔኔ።

ዔኤሳዎ ጋዓንቴ ዔያታ ቤርታ ዎላ ጌስቲ ዓቶም ጌይ ዎሊ ዔኬሢሮ ዎላ ካኣሚፆ ዎዛና ካፓኔ። ዬያይዲ ዔያታ ዎላ ካኣሜም ያይቆኦቤ ካኣናኔይዳ ኮሺ ናንጌኔ፤ ጊንፃፓ ዪሳኣቄ ሃይቄኔ፥ ያይቆኦቤና ዔኤሳዎና ዒዛ ዬኤኪ ዱኡኬኔ፤ ፆኦሲ ዓብራሃሜም ማዻንዳኔ ጌይ ጫኣቄ ጫኣቁማ ሃሣ ዪሳኣቄፓ ያይቆኦቤ ባንሢ ሺሬኔ።