6. ፆኦሲ ዪሳኣቄም ላኣሊ ጊኢጊሼሢ

ዓብራሃሜ ሚርጌና ጋርቼስካፓ ዪሳኣቄ ዼጋቴኔ። ዬያሮ ዓብራሃሜ ፔ ዓይሎፓ ፔቴስኬያ ናኣዚ ዪሳኣቄም ላኣሊ ዔኪ ዬዓንዳጉዲ ፔ ዒጊኖ ዓጮ ዳኬኔ።

ዬይ ዓይላሢ ሚርጌ ኬሊ ሃንቴስካፓ ዓብራሃሜኮ ዒጊኖ ሳዖ ሄሌኔ። ዒማና ፆኦሲ ዬያ ዓብራሃሜ ዳኬ ዓይላሢ ዒርቢቃ ኮራ ዳኬኔ። ዒርቢቃ ዓብራሃሜ ጌርሲኮ ናይኮ ናይኬ።

ዒርቢቃኣ ዒማና ፔ ማኣሮ ዓሶ ሃሺ፥ ዬያ ዓብራሃሜ ዓይላሢና ዎላ ዪሳኣቄ ማኣሪ ዴንዳኒ ዔኤዔኔ። ዴንዲ ሄሄላዖ ዪሳኣቄም ሌዔኔ።

ዬካፓ ሚርጌ ዎዴ ዴዔዖ ዓብራሃሜ ሃይቄኔ፤ ፆኦሲያ ዓብራሃሜም ማዻንዳኔ ጌይ ጫኣቄ ጫኣቁማ ቢያ ዪሳኣቄ ባንሢ ሺሬኔ። ፆኦሲ ዓብራሃሜም ዜርፆ ዒዛኮ ፓይዲንቱዋያ ማሃኒ ጫኣቂናኣኮኬ። ያዺ ማዔቴያ ዪሳኣቄኮ ማቻ ዒርቢቃ ናይ ሾዓኒ ዳንዳዒባኣሴ።

ዪሳኣቄ ዒርቢቃም ፆኦሲ ሺኢቃዛ ዒዛ ሜንቴ ጎጳዻንዳጉዲ ሺኢጲፃ ዋይዚንቴኔ። ዒማና ላምዖ ናኣታ ዒርቢቃ ጎጳ ዓኣዖ ዎላ ማሹምቦ ዓርቃያ ማዔኔ። ዬያሮ ዒርቢቃ ዒዞ ጎጳ ናኣታ ዎዎይታቴያ ፆኦሲ ኮይላ ዖኦጬኔ።

ፆኦሲያ ዒርቢቃም፥ “ኔ ጎጳ ዓኣ ላምዖ ናኣቶፓ ላምዖ ዱማ ዴሬ ኬስካንዳኔ፤ ዬያታ ዎላ ማሹምቦ ዓርቂ ዖልታያ ማዓንዳኔ፤ ጋዓንቴ ቶይዲ ጌኤዚም ዓይሌ ማዒ ዎርቃንዳኔ” ጌዔኔ።

ዒርቢቃ ናኣቶ ሾዓኣና ቶይዳሢኮ ዑፃ ዞቄ፥ ጋፓኔና ዓኣያ ማዒ ኬስኬኔ፤ ዬያሮ “ዔኤሳዎ” ጌይ ሱንፃ ጌሢንቴኔ፤ ጌኤዛሢያ ዔኤሳዎኮ ቶኮ ዲንጊርዦ ዓርቂ ኬዴኔ፥ ሱንፃኣ ዒዛኮ “ያይቆኦቤ” ጌይንቴኔ።