5. ሃጊ ማዓንዳ ዎዞ ኩንሤ ናዓሢ

ታጶ ሌዔኮ ጊንፃ ዓብራሜና ሶኦራና ካኣናኔ ዓኣዺ ሄሌኔ፤ ዬያ ሄላንዳኣና ናይ ዔያቶኮ ባኣሴ። ዬያሮ ዓብራሜኮ ማቻ፥ ሶኦራ “ፆኦሲ ታና ናይንዶ ማዒፆ ላኣጌኔ፥ ታኣኒያ ጋርቼኔ፤ ዬያሮ ታ ዓይሌሎ ዓጋኣሮ ሃኣዛጌ፤ ዒዞ ዔኬ፥ ናይ ታኣም ዒዛ ሾዖም” ጌዔኔ።

ዬያሮ ዓብራሜ ዓጋኣሮ ጊንፃኣ ማቾ ማሂ ዔኬም ዓጋኣራ ዓቲንቄ ናይ ሾዔኔ። ዓብራሜ ናዓሢኮ ሱንፆ “ዒስማዔኤሌ” ጌይ ጌሤኔ። ያዺ ማዔቴያ ሶኦራ “ዬይ ታኣም ማዓንዳባኣዚታዖኬ” ጌይ ዓጋኣሮ ቂኢሬኔ። ዬካፓ ዒስማዔኤሌኮ ሌዓ ታጶ ሃይሦ ማዓዛ ፆኦሲ ዓብራሜም ሂዚ ጌዔኔ።

ፆኦሲ ዓብራሜም፥ “ታኣኒ ቢያ ባኣዚ ዳንዳዓ ፆኦሲኬ፤ ታ ኔኤም ታ ማዻንዳ ባኮ ጫኣቃንዳኔ” ጌዔኔ። ዓብራሜ ዒማና ባሊቶና ሳዓ ላሂ ዚጌኔ፤ ፆኦሲያ ዒዛም፥ “ኔኤኒ ዺቢ ዴሬኮ ዓዶ ማዓንዳኔ፤ ካናኣኔ ዓጮ ታኣኒ ኔኤና ኔ ዜርፆና ዻካልሳንዳኔ፤ ታኣኒ ናንጊና ዒንሢኮ ፆኦሲ ማዓንዳኔ፤ ኔኤኒ ጋዓንቴ ኔ ማኣሮይዳ ዓኣ ዓቲንቆኮ ቢያ ዓቲንቶ ቤርቶ ቲቄ” ጌዔኔ።

ፆኦሲ፥ “ኔ ማቻ ሶኦራ ዓቲንቄ ናይ ሾዓንዳኔ፤ ዒዚ ዒንጊንቴ ሃጋ ማዓንዳ ዎዞ ኩንሣሢ ማዓንዳኔ፤ ሱንፆ ኔ ዒዛኮ ዪሳኣቄ ጌይ ጌሤ፤ ታ ማዻንዳኔ ጌዔ ጫኣቁሞ ዒዛና ዎላ ማሃንዳኔ። ዒዚያ ዼኤፒ ዴሬ ማዓንዳኔ። ዒስማዔኤሌያ ታኣኒ ዼኤፒ ዴሬ ማሃንዳኔ፤ ያዺ ማዔቴያ ታኣኮ ጫኣቁማ ዪሳኣቄና ዎላ ማዓንዳኔ” ጌዔኔ። ፆኦሲ ዓብራሜኮ ሱንፆ “ዓብራሃሜ” ጌይ ላኣሚ ጌሤኔ፤ ዬኖኮ ቡሊፃ “ሚርጌሢ ዓዶ” ጌይሢኬ። ፆኦሲ ሃሣ ሶኦራ ሱንፆ “ሳኣራ” ጌይ ሺርሺ ጌሤኔ፤ ዬኖኮዋ ቡሊፃ “ሚርጌሢ ዒንዶ” ጌይሢኬ።

ዒማ ኬሎ ዓብራሃሜ ፔ ማኣሮይዳ ዓኣ ዓቲንቆኮ ዓቲንቶ ቤርቶ ቢያ ቲቄኔ። ሌዔኮ ጊንፃ ዓብራሃሜኮ ሌዓ 100 ማዔንቴ፥ ሶኦራኮ 99 ማዔንቴ ሶኦራ ዓብራሃሜም ዓቲንቄ ናይ ሾዔኔ፤ ፆኦሲ ዔያቶ ዓይሤ ጎይፆ ናዓሢኮ ሱንፆ ዔያታ “ዪሳኣቄ” ጌይ ጌሤኔ።

ዪሳኣቄ ሃጊ ዔቃ ናይ ዓኣንቴ ፆኦሲ ዓብራሃሜኮ ፆኦሲዳ ዓኣ ጉሙርፆ ዛጋኒ ፔቴ ባኣዚ ዓይሤኔ፤ ሂዚ ጌዔኔ፦ “ኔኤኮ ፔቴ ናዓሢ ዔኪ ዴንዲ ታኣም ሹኪ ዒንጌ” ጌዔኔ። ዬያሮ ላሚ ሃሣ ዓብራሃሜ ፆኦሲም ዓይሢንቲ ናዖ ሹኪ ፆኦሲም ሺኢሻኒ ጊኢጊንቴኔ።

ዓብራሃሜና ዪሳኣቄና ፆኦሲም ዒንጎ ባኮ ሺኢሾ ቤዞ ዴንዲፆይዳ ዓኣንቴ ዪሳኣቄ ዓዶ ኮራ፥ “ዓዴ፡ ፆኦሲም ሹኪ ዒንጎ ባኮ ሚቾ ሃንፂላ ሃይሾ፥ ማራዓ ዎካዳዖ?” ጌይ ዖኦጬኔ። ዓብራሃሜያ “ታ ናዓሢዮ፡ፆኦሲም ኑ ሹኪ ዒንጋንዳ ማራዖ ፆኦሲ ጊኢጊሻንዳኔ” ጌዔኔ።

ፆኦሲም ዒንጎ ባኮ ሺኢሾ ቤዞ ዔያታ ሄላዛ ዓብራሃሜ ፔኤኮ ናዖ ዪሳኣቄ ዒንጎ ባኮ ዒንጎ ቤዞይዳ ቱኪ ላይሤኔ። ዓብራሃሜ ፔ ናዖ ሹካኒ ዓፓሮ ፔ ኩቻ ሌካ ዼጊዴኔ፤ ዒማና ፆኦሲ “ሃሼ፤ ናዖይዳ ፔቴ ባኣዚታዎ ማዺፖ፤ ኔ ታና ዒጊጫሢንታ ፔቴ ናዖማ ሚጪንቱዋዖ ታኣም ዒንጋኒ ላኣጊባኣሢ ታ ዔሬኔ” ጌዔኔ።

ዓብራሃሜ ዒማና ዒኢካ ፔቴ ማራይ ቱሮና ማርቲ ዔቂ ዓኣንቴ ዴንቄኔ። ዬይ ማራዓሢ ዪሳኣቄ ዛሎ ሹኪንቲ ሺኢካንዳጉዲ ፆኦሲ ጊኢጊሼያኬ። ዓብራሃሜያ ዎዛና ዬያ ማራዓሢ ዔኪ ፆኦሲም ሹኪ ሺኢሼኔ።

ፆኦሲ ዓብራሃሜም፥ “ኔ ኔኤኮ ፔቴ ናዓሢታዖ ዓይሱዋ ዓኣ ባኮ ቢያ ዒንጋኒ ጊኢጌያታሢሮ ታ ኔና ዓንጃኒ ጫኣቃኔ። ዜርፃ ኔኤኮ ጫሪንጮ ዉጫሢፓ ባሼ ሚርጋንዳኔ፤ ኔ ታኣም ዓይሢንቴሢሮ ዓጮ ዴራ ቢያ ኔ ዛሎና ዓንጂንታንዳኔ” ጌዔኔ።