4. ፆኦሲ ዓብራሃሜም ጫኣቄ ጫኣቁሞ

ባይሲንቶ ዋኣፆኮ ጊንፃ ዴሬ ሳዖይዳ ጊንሣ ሾይንቲ ዺቤኔ። ዬይ ዓሳ ቢያ ዒማና ፔቴ ሙኡቺ ጌስታኔ። ፆኦሲ ዔያቶ ዓይሤ ጎይፆ ሳዖ ቢያ ዴንዲ ኩሚፆ ሃሺ ፔቴይዳ ቡኪንቲ ካታማ ማዤኔ።

ዬይ ዓሳ ሚርጌና ዖቶርቃያና ፆኦሲ ዔያቶም ኬኤዜ ባኮዋ ዔኤቢ ዓቴኔ ጎዑዋያኬ። ዬያ ሌሊቱዋንቴ ጫሪንቺ ሄላንዳኔ ጌዒ ዼኤፒ ዖዶሲ ኩቤ ማኣሪ (ፖኦቄ) ማዢሢ ዓርቄኔ። ፆኦሲያ ዬና ዓሳ ፑርታ ማዾ ዓርቄሢና ዬያ ሃሹዋዖ ማዻኒ ጊኢጌሢ ዴንቄኔ። ዬያፓ ዑሣ ዓኣዼ ፑርታ ጎሜያ ዔያታ ማዻኒ ዳንዳዓያኬ።

ዬያሮ ፆኦሲ ሙኡጮ ዔያቶኮ ዱማ ዱማ ማሂ ሺርሺ፥ ዬያ ዴሮ ዓጮ ቢያ ዜርቄኔ። ዬና ዔያታ ማዣኒ ዓርቄ ካታሜሎ ሱንፃ “ባብሎኔ” ጌይንታያኬ። ዬኖኮ ቡሊፃ “ሲኢሪንቴያ፥ ጊንሣ ሃሣ ዣኣሌያ” ጌይሢኬ።

ፄኤታ ሌዔኮ ጊንፃ ፆኦሲ ዓብራሜም ፔቴ ባኣዚ ኬኤዜኔ። ፆኦሲ ዒዛም “ኔ ዓጮንታ ኔ ማኣሮ ዓሶንታ ሃሺ ታ ኔና ዻዋ ዓጮ ዴንዴ። ዒኢካ ታ ኔና ዓንጃንዳኔ፤ ዼኤፒ ዴሬያ ታ ኔና ማሃንዳኔ፥ ሱንፆዋ ታ ኔኤኮ ዼኤፒሳንዳኔ፤ ኔና ዓንጃዞንሢ ታ ዓንጃንዳኔ፥ ጋዳንቃዞንሢ ታ ጋዳንቃንዳኔ፤ ኔ ዛሎና ሳዖ ዓሳ ቢያ ዓንጂንታንዳኔ።

ዓብራሜያ ፆኦሲም ዓይሢንቲ፥ ፔ ማቾ ሶኦራንታ ማዻ ዓይሎንታ ዓኣ ቆሎዋ ቢያ ዔኪ ፆኦሲ ዒዛም ዻዌ ካኣናኔ ዓጮ ዴንዴኔ።

ዓብራሜ ካኣናኔ ዓጮ ሄላዛ ፆኦሲ፥ “ኔ ኮይሎይዳ ዓኣ ባኮ ቢያ ዛጌ፤ ሃያ ኔ ዛጋ ዓጮ ቢያ ኔናንታ ኔ ዜርፆንታም ታ ዻካልሳንዳኔ” ጌዔኔ። ዓብራሜያ ዬኖ ዓጮይዳ ዴዔኔ።

ፔቴ ኬሊ ዓብራሜ ሜልኬ ፃዲቄ ጌይንታ ዼኤፒ ፆኦሲም ማዻ ቄኤስኬያና ካኣሜኔ። ሜልኬ ፃዲቄያ ዓብራሜ ዓንጄኔ፤ “ጫሪንጮና ሳዖናኮ ጎዳ ማዔ ዼኤፖ ፆኦዛሢ ዓብራሜ ዓንጆንጎ” ጌዔኔ። ዓብራሜያ ሜልኬ ፃዲቄም ዓኣ ባኮኮ ታጶፓ ፔቴ ፔቴ ዒንጌኔ።

ሚርጌ ሌዔ ዔያታ ናንጌቴያ ዓብራሜና ሶኦራናኮ ናይ ባኣያኬ። ፆኦሲ ዓብራሜም ዎዛ ቃኣላ ዒንኔ፤ ናይ ዒ ሾዓንዳሢና ዜርፃኣ ዒዛኮ ጫሪንጮ ዉጮጉዲ ዺባንዳሢያ ኬኤዜኔ። ዬያሮ ዓብራሜ ፆኦሲ ዒዛም ዒንጌ ሃጊ ማዓንዳ ዎዞ ቃኣሎ ጉሙርቂ ዔኬኔ። ዓብራሜያ ፆኦሲ ዒዛም ዒንጌ ሃጊ ማዓንዳ ዎዞ ቃኣሎ ጉሙርቂፆና ፂሎ ማዒ ፓይዲንቴኔ።

ፆኦሲ ዓብራሜም ማዺ ኩንሣንዳ ባኮ ዛሎ ጫኣቄኔ። ጫኣቁሞ ጌይፃ ላምዖ ዱማ ዓሲ ዎላ ፔቴ ባኣዚ ማዺ ኩንሣንዳያ ማዒፆ ዔርዛ ጌኤሲ ጌስቲ ዔኤዓያኬ። ፆኦሲ ዓብራሜም፥ “ኔ ጊዳፓ ናይ ኬሲ ታ ኔኤም ዒንጋንዳኔ” ጌዔኔ። ዓብራሜኮ ዬማና ናይ ባኣሴ።