49. ፆኦሲኮ ዓኮ ጫኣቁሞ

ፔቴ ፆኦሲ ኪኢታንቾስኬይ ማይራሞ ጌይንታ ፔቴ ኩሙሢ ዉዱሮ ናይስኬኖም ፆኦሲ ናይ ዒዛ ሾዓንዳሢ ኬኤዜኔ። ዬያሮ ዒዛ ኩሙሢ ዉዱሮ ናይ፥ ዓቲንቄናኣ ካኣሚባኣዖ ዓቲንቄ ናይ ሾዒ ሱንፆ “ዬሱሴ” ጌይ ጌሤኔ። ያዺ ማዒፆና ዬሱሴ ፆኦሲያ ፆኦሲ፥ ዓሲያ ዓሲ ማዔኔ።

ዬሱሴያ ፆኦሲ ማዒፆ ዔርዛኒ ሚርጌ ዲቃሢ ሄርሺሳ ባኣዚ ማዼኔ። ዋኣሢዳ ዒ ሃንቴኔ፥ ባዞ ጉዳሢ ዚቲዴኔ፥ ሚርጌ ሃርጊንቴ ዓሲ ፖዒሴኔ፥ ሜዦዋ ሚርጌ ዣኣዦ ዓሲፓ ኬሴኔ፥ ሃይቄ ዓሲ ዻቂሼኔ፥ ዶንጎ ካሣና ላምዖ ሞሎስኬንሢና ዶንጎ ሺያፓ ዑሣ ማዔ ዓሲ ሙኡዚ ሚሼኔ።

ዬሱሴ ሃሣ ዼኤፒ ሄርሺሳ ዓስታማሬ (ዔርዛ ዓሲኬ) ማዔኔ። ፆኦሲ ናይ ማዔሢሮ ዼኤፒ ቢታንቶና ጌስቴኔ። “ዒንሢ ዒንሢና ናሽካ ጎይፆማ ሜሌ ዓሶዋ ናሽኩዋቴ” ጌዒ ሚርጌ ዓሲም ኬኤዜኔ።

ሃሣ ዒ ኬኤዛዖ፥ “ዒንሢኮ ቆሎንታ ሃንጎ ባኮዋ ቢያ ናሽካ ጎይፆፓ ባሼ ፆኦሲ ናሽኩዋቴ” ጌይያ ዓይሤኔ።

ዬሱሴ ኬኤዛዖ፥ “ፆኦሲ ካኣቱማ ሳዖይዳ ዓኣ ዓይጎ ባኣዚዳፓኣ ቢያ ባሼ ቦንቺንቴያኬ” ጌዔኔ። ዬያሮ ዓሲም ቢያ ሚርጌና ኮይሳያ ማዓ ባኣዚ ፆኦሲ ካኣቱሞ ጋራ ማዒሢኬ። ዬያ ፆኦሲ ካኣቱሞይዳ ጌላኒ ዓሲ ጎሜፓ ጌኤሽኪ ዻቃንዳያ ኮይሳኔ።

ዬሱሴ ዓሶ ዔርዛ ዎዶና፥ “ፔቴ ፔቴ ዓሳ ታና ጉሙርቂ ዔኪ ዻቃንዳኔ፥ ሃንጎዋታ ዬያ ዒፃንዳኔ” ጌዔኔ። ፔቴ ፔቴ ዓሳ ዬሱሴ ዛሎ ኮዦ ሃይሶ ጎናሲ ዔኪ ዻቃንዳሢሮ ዜርሢ ዜርቆዛ ባቃሊ ካፃ፥ ኮሺ ሳዓና ኮኦኪንሢንቴኔ፤ ዛላ ዬሱሴ ዛሎ ኬኤዚንታ ኮዦ ሃይሶ ዔኪ ፆኦሲ ካኣቱሞይዳ ጌሊንዱዋኣሢሮ ዜርሢ ዜርቄም ባቃልሲ ሃኣኮ ካፂሱዋ ሹቺ ሳዓ፥ ጊንሣ ሃሣ ጎይሢ ዓቺ ሳዓ ማሂ ኮኦኪንሢንቴኔ።

ዓሲ ጎሜ ማዻያ ማዔቴያ ፆኦሲ ዒናፓ ዓሲ ናሽካሢ ዬሱሴ ኬኤዜኔ፤ ጎሞ ዓቶም ጋዓኒና ፔ ናይ ማሃኒያ ኮዓያኬ።

ሃሣ ፆኦሲ ጎሜ ሚርጌና ዒፃሢያ ዬሱሴ ኬኤዜኔ። ዓዳኣሜና ሂዋኣኖና ጎሜ ማዼሢሮ ዬይ ጎማ ዔያቶ ዜርፆይዳ ቢያ ሜቶ ዔኪ ዬዔኔ። ዬያሮ ሃያ ሳዖይዳ ዓኣ ዓሲ ቢያ ጎሜ ማዻያ፥ ፆኦሲፓኣ ዱማዻ ሞርኬ ማዔኔ።

ጋዓንቴ ዒዛኮ ናኣዚ፥ ዬሱሴ ጉሙርቂ ዔኬሢ ቢያ ባይቁዋዖ ናንጊና ሼምፓ ዓኣያ ማዒ ናንጋንዳጉዲ ፆኦሲ ፔኤኮ ፔቴ ናዓሢ ሃያ ዓጮ ዳካንዳያ ሄላንዳኣና ዓሲ ዜርሢ ቢያ ናሽኬኔ።

ዓሲ ማዼ ጎሞሮ ሃይቢ ኮይሳያኬ፤ ፆኦሲያ ዬያ ዻቢንቶሮ ዻጋዺ ዓሲ ባባይዛንዳያኬ፤ ጋዓንቴ ዓሲዳ ፆኦሲ ዬያ ዻጎ ጮኦሽኮ ሃሺ፥ ዬሱሴይዳ ማሂ ኩንሤኔ። ዬሱሴያ ማስቃሎይዳ ሃይቄ ዎዶና ዓሶኮ ዻቢንቶ ቢያ ፔ ዑፃ ማሂ ጳዺንቶ ዔኬኔ።

ዬሱሴ ጎሜ ፔቴታዖ ማዺባኣሴ፤ ጋዓንቴ ዓሲ ቢያኮ ጎሜ ጌኤሻኒና ፆኦሲኮዋ ጎሪንቶ ዻጎ ዓሲፓ ሺኢሻኒ ፆኦሲም ሺኢሾ ኩሙሢ ዒንጊሢ ማዒ ሃይቂሢ ዶኦሬኔ። ዬሱሴ ፔና ዓኣሢ ዒንጌሢሮ ዓይጎ ጎሜ ማዔቴያ ፆኦሲ ዓሲም ዓቶም ጋዓኒ ዳንዳዓኔ።

ዓሲኮ ኮሺ ማዾ ዓሲ ዓውሳኒ ዳንዳዑዋሴ፤ ፆኦሲና ዎላ ዓሲ ካኣማኒ ማዻ ማዾ ፔቴታዖ ባኣሴ። ዬሱሴ ሌሊ ዓሲኮ ጎሜ ጌኤሺ ፆኦሲና ካንሣኒ ዳንዳዓኔ። ዬሱሴ ፆኦሲ ናይ ማዔሢ፥ ዓሲ ቤዛ ዒ ፔና ዓኣሢ ማስቃሌይዳ ሃይቄሢ፥ ፆኦሲያ ዒዛ ሃይባፓ ዔቂሴሢ ዓሲ ጉሙርቂ ዔካንዳያ ኮይሳኔ።

ዬሱሴ ጉሙርቃያና ጎዳ ማሂ ዔካ ዓይጎ ዓሲያ ፆኦሲ ዻዻቂሻኔ። ዖርጎቺታቴያ ኩፒ፥ ዓቲንቄታቴያ ላኣሊ፥ ጋርቺ ማዖም ዼጌ፥ ዓንካ ናንጋ ዓሲ ማዔቴያ ፆኦሲና ዎላ ካኣማኒ ዬሱሴ ጉሙርቂ ዔካንዳያ ኮይሳኔ።

ዓሲ ዬሱሴ ጉሙርቃንዳጉዲና ዳምቦ ጎይፆና ዋኣሢያ ማስታንዳጉዲ ዒ ኮዓኔ። ኔ ሃኖ ማፃኣፖ ናባባያ ማዔቴ ዬሱሴ ካኣቱሞም ዶኦሞናያ (ሜሲሄ)፥ ፔቴ ፆኦሲ ናይ ማዔሢ ጉሙርቃ? ኔኤኒ ጎሜና ዓኣ ዓሲ ማዔሢንታ ፆኦሲ ዻጋዺ ሜቶ ኔጊዳ ዓጋያ ማዔቴ ፒዜታሢ ኔ ዔራ? ዬሱሴ ጎሞ ኔኤኮ ጌኤሻኒ ማስቃሎይዳ ሃይቄሢ ኔ ጉሙርቂ ዔካ?

ዬሱሴንታ ዒ ኔኤም ማዼ ማዾንታ ኔ ጉሙርቂ ጎናሲ ዔኬቴ ዬሱሴ ጊንፆ ሃንታያ (ዓማና) ማዔኔ! ፆኦሲ ኔና ፃላሄና ዹሞ ካኣቱሞናይዳፓ ቶሊሲ ዒዛ ፖዖ ካኣቱሞ ጋሮ ጌልዜኔ። ፆኦሲ ሃያኮ ቤርታ ኔኤኒ ማዻ ጪሞና ጎሞ ጎይፆና ላኣሚ ዓካሲ ፂሉሞ ማዾ ማዺንታ ጎይሢ ኔና ዻዌኔ።

ዬሱሴ ኔኤኒ ኔኤኮ ሼምፖ ዼኤሻ ማሂ ዔኬቴ ኪሪስቶሴ ዓሲ (ዓማና) ማዔኔ፤ ዬሱሴ ማዼ ማዾ ዛሎና ፆኦሲ ጎሞ ኔኤኮ ዓቶም ጌዔኔ። ሃያኮ ቤርታ ፆኦሲኮ ኔ ሞርኬታንቴ ሃሢ ኔና ዒ ፔኤና ዒጊንሤኔ።

ፆኦሲኮ ኔ ዒጊኒ፥ ሃሣ ማዻ ዓይሌ ማዔቴ ዬሱሴ ኬኤዛ ባኮ ዓይሢንቲ ኔ ኩንሣያ ማዓንዳኔ። ዓማና ኔ ማዔቴያ ጎሜ ማዺሢ ሼኔ ኔጊዳ ዬዓኒ ዳንዳዓኔ። ጋዓንቴ ፆኦሲ ጉሙርቂንታያ ማዔሢሮ ጎሞ ኔ ቡኡፄቴ ዒ ዓቶም ጋዓያኬ። ጎሜ ኔ ዒፂ ባሻንዳ ዎልቄያ ኔኤም ዒዚ ዒንጋንዳኔ።

ፆኦሲ፡ ዒዛ ኔ ሺኢቃንዳጉዲ፥ ቃኣሎ ናባባንዳጉዲ፥ ዓማና ማዔ ኔ ላጎና ዎላ ኔ ዒዛ ካኣሽካንዳጉዲ፥ ኔኤም ዒ ማዼ ባኮ ሜሌ ዓሶም ኔ ማርካዻንዳጉዲ ኮዓኔ። ዬይ ባካ ቢያ ኔኤና ፆኦሲናኮ ካኣሚፆ ዶዲሻያኬ።