48. ዬሱሴ “ሙካንዳኔ” ጌይንቴ ሜሲሄ ማዒፆ

ፆኦሲ ሳዖ ማዤያና ፔቴታዖ ዻቢንቴ ባኣዚ ባኣያ፥ ቢያ ባካ ፒዜ፤ ሃሣ ኩሙሢኬ፥ ጎሜያ ሳዖይዳ ባኣሴ። ዓዳኣሜንታ ሂዋኣኖንታ ዎሊ ናሽካኔ፤ ፆኦሲያ ዔያታ ናሽካኔ። ዒማና ዶርዖንታ ሃይቢያ ሳዖይዳ ባኣሴ። ሳዓ ማዓንዳጉዲ ፆኦሲ ኮዔሢ ያዺኬ።

ጋዓንቴ ፃላሄ ጌኔቴይዳ ሂዋኣኖ ሾኦሺ ማዒ ሙኪ ጌሼኔ፤ ዬያሮ ዒዞንታ ዓኒ፥ ዓዳኣሜንታ ፆኦሲ ዖዪሳ ጎሜ ማዼኔ። ዬያ ጎማፓ ዔቄያና ሳዖይዳ ዓኣ ዓሲ ቢያ ሃርጊንታኔ፥ ሃይቃኔ።

ዓዳኣሜንታ ሂዋኣኖንታ ማዼ ጎሞ ዛሎና ሃርጌንታ ሃይቢንታፓ ዑሣ ማዔ ፑርታ ባኣዚያ ማዺንቴኔ። ዬይያ፦ ዓሲ ፆኦሲና ዎላ ሞርኬ ማዔኔ፥ ዓሲ ጎሜና ዓኣያ ማዒያ ሾይንቲ ዓርቄኔ። ፆኦሲና ዓሲናኮ ካኣሚፆ ዬይ ጎማ ዱኡዜኔ። ጋዓንቴ ፆኦሲ ዬያ ዱጲፆ ካንሣኒ ካራ ኮዔኔ።

ሂዋኣኖ ዜርፃፓ ፔቴይ ፃላሄኮ ቶኦኮ ዳኣፃንዳሢንታ ፃላሄያ ቶኮ ዓሲኮ ዻዓንዳሢ ዛሎ ሃጊ ማዓንዳ ዎዛ ዒንጌኔ። ዬይያ፦ ፃላሄ ካኣቱሞም ዶኦሞናሢ (ሜሲሄ) ዎዻንዳኔ፥ ፆኦሲያ ሃይባፓ ዒዛ ዔቂሳንዳኔ፤ያዺ ማዒፆና ዬይ ካኣቱሞም ዶኦሞናሢ ፃላሄኮ ቶኦኮ ሄርቂ ዳኣፂ፥ ናንጊና ካኣታዺ ናንጋንዳኔ ጌይሢኬ። ሚርጌ ሌዔኮዋ ጊንፃፓ ዬይ ካኣቱሞም ዶኦሞናሢ (ሜሲሄ) ዬሱሴ ማዔሢ ፔጋሴኔ።

ፆኦሲ ሳዖ ቢያ ዋኣሣ ባይዜ ዎዶና ዒዛ ጉሙቄ ዓሶ ዻቂሻኒ ዋኣሢ ካኣሚሌ ጊኢጊሼኔ። ዬኖ ጎይፆ ዓሲ ቢያ ማዼ ጎሞሮ ሃይቂ ኩዳንዳያ ኮይሳንቴ ፆኦሲ ዒዛ ጉሙርቂ ዔኬ ዓሳ ቢያ ዻቃንዳጉዲ ዬሱሴ ጊኢጊሼኔ።

ዓሲኮ ጎሜ ጌኤሻኒ ቄኤሳ ፆኦሲም ዒንጎ ባኣዚ ሺኢሺ ሺኢሺ ሚርጌ ሌዔ ናንጌኔ። ጋዓንቴ ዬይ ዔኪ ሙኪ ሹኮ ባኮንታ ሜሌ ዒንጎ ባካ ዓሲኮ ጎሜ ጋፒንሢ ጌኤሻኒ ዳንዳዒባኣሴ። ዬሱሴ ጋዓንቴ ቄኤሶኮ ቢያ ዑሢ ማዒ ሙኬኔ፤ ዬያ ሌሊቱዋንቴ ሃንጎ ቄኤሳ ማዻ ጎይፃፓ ዱማ ጎይሢ ዓሲኮ ጎሜ ቢያ ጌኤሻኒ ፔና ፆኦሲም ዒንጎ ባኣዚ ማሂ ዎዺ ሺኢሼሢሮ ቄኤሳፓ ቢያ ዑሢ ማዔኔ። ዓሲ ማዼ ጎሞሮ ዔካኒ ኮይሳ ሜቶ ዬሱሴ ፔኤሮ ዔኬሢሮ ፓጬ ባኣዚባኣ ኩሚሢ ቄኤሴ ማዔኔ።

ፆኦሲ ዓብራሃሜም፥ “ዓጪ ዴሬ ቢያ ኔ ዛሎና ዓንጂንታንዳኔ” ጌዔኔ። ዬሱሴያ ዓብራሃሜ ፃጲ ማዔሢሮ ዒዛ ዛሎና ዓጪ ዴሬ ቢያ ዓንጂንቴኔ፤ ዎይቲ ጌዔቴ ዬሱሴ ጉሙርቂ ዔኬ ዓሲ ቢያ ፔ ጎማፓ ዻቃኔ፥ ዓብራሃሜኮዋ ዓያናና ሾዖና ናይ ማዓኔ።

ዓብራሃሜ ዒዛኮ ናኣዚ፥ ዪሳኣቄ ሹኪ ፆኦሲም ሺኢሻንዳጉዲ ፆኦሲ ዒዛ ዓይሣዛ ዬያ ማዻኒ ዒ ማሌንቴ ፆኦሲ ላኣጊ ዬያ ናዓሢ ቤዛ ማራይ ጊኢጊሼሢሮ ዓብራሃሜ ሹኪ ሺኢሼኔ። ኑ ቢያሢ ማዼ ጎሞ ዛሎኮ ሃይቢ ኮይሳያኬ! ፆኦሲ ጋዓንቴ ኑ ቤዛ ሃይቃንዳጉዲ ማራይ ማዔ ዬሱሴ ዳኬኔ።

ፆኦሲ ጊብፄ ዓሶይዳ ጋፒንሢ ማዔ ባይዛ ፑርቶ ባኮ ዳኬያና ፔቴታዖ ፓጬ ባኣዚባኣ ማራናይ ሹኪ ሱጉፆና ካሮ ቶኦኮንታ ሬኤኮዋ ፑጫንዳጉዲ ዒስራዔኤሌ ማኣሮም ኬኤዜኔ። ፆኦሲ ዬያ ሱጉፆ ዛጋዖ፥ ቶይዶ ናኣቶ ዎዺፆ ሃሺ ዖኦኪ ዴንዴኔ፤ ዬይያ ዒስራዔኤሌ ዳምቦና ዑሣ ዓኣዺሢ ቦንቾ ጌይንቴኔ።

ዬሱሴ ኑኡኮ ዬያ ዑሣ ዓኣዺፆ ቦንቾሮ ሹኮ ማራዓሢ ማዔኔ። ዒዚ ኩሙሢ፥ ሃሣ ፔቴታዖ ጎሜ ባኣንቴ ዑሣ ዓኣዺፆ ቦንቾ ዎዶይዳ ሃይቄኔ። ዓይጎ ዓሲያ ዬሱሴ ጉሙርቂ ዔካ ዎዶና ዬሱሴኮ ሱጉፃ ዓሢኮ ጎሞ ዛሎ ጪጎ ጪጋ ማዓኔ፤ ፆኦሲያ ዬያ ዓሢዳ ዓጋኒ ማሌ ፑርቶ ባካ ዖኦካኔ።

ሚርጌ ዎዴኮ ቤርታ ፆኦሲ ፔኤኮ ዶኦሪንቴ ዴሮ ማዔ፥ ዒስራዔኤሌ ዓሶና ዎላ ጫኣቁሞ ጫኣቄኔ። ሃሢ ጋዓንቴ ፆኦሲ ቢያ ዓሲም ማዓ ዓኪ ጫኣቁሞ ጫኣቄኔ። ዬያ ዓኮ ጫኣቁሞ ዛሎና ዓይጎ ዓሲ ፃጲፓኣ ማዖም ዬሱሴ ጉሙርቂ ዔኬቴ ፆኦሲ ዒጊኒ ማዓኒ ዳንዳዓኔ።

ሙሴ ቃኣሎ ዼጊዲ ዴሮም ኬኤዜ ፆኦሲ ማሊሢ ኬኤዛያኬ። ዬሱሴ ጋዓንቴ ቢያፓ ባሼ ፆኦሲ ማሊሢ ኬኤዜያኬ። ዒዚ ፆኦሲ ማሊሢ ኬኤዜያ ሌሊቱዋንቴ ፔ ቶኦኪና ፆኦሲኬ፤ ዬያሮ ዒ ማዼ ባኮንታ ኬኤዜ ባካኣ ቢያ ፆኦሲ ማዾና ዒ ጌዔ ባኣዚናኬ። ዬሱሴ ሃሣ “ፆኦሲ ቃኣላ” ጌይንቲ ሱንሢ ጌቴያኬ።

ካኣቲ ዳውቴ ዜርፆይዳፓ ፔቴይ ፆኦሲ ዴሮኮ ካኣቲ ማዒ ዎይሣንዳሢ ዳውቴም ፆኦሲ ጉሙርሲ ኬኤዚናኣኮኬ። ዬሱሴ ፆኦሲ ናይ፥ ሃሣ ካኣቱሞም ዶኦሞናያ ማዔሢሮ ናንጊና ካኣታዺ ዎይሣኒ ዳንዳዓሢ ዬያ ዳውቴ ፃጳሢ ሌሊኬ።

ዳውቴ ዒስራዔኤሌ ዴሮኮ ካኣቲኬ፤ ዬሱሴ ጋዓንቴ ፆኦሲ ማዤ ዓጮይዳ ዓኣ ዓሶንታ ቢያ ባኮኮዋ ካኣቲኬ! ላሚ ዒ ሙካዖ ፔ ካኣቱሞ ፒዙሞና ኮሹሞና ዶዲሺ ናንጊና ዎይሣንዳኔ።