50. ዬሱሴ ማዒ ሙካንዳያ ማዒፆ

ላምዖ ሺያ ሌዔ ጉዴያ ዓጪ ቢያይዳ ዓኣ ዴሬ ካኣቱሞም ዶኦሞና ዬሱሴ ዛሎ ኬኤዛ ኮዦ ሃይሶ ዋይዚ ዋይዚ ዴዔኔ። ሺኢጲፆ ማኣሮ ዓሳ ዶዲ ዶዲ ዳልጌኔ። ዬሱሴያ ዓጮኮ ጋፒንፆና ማዒ ሙካንዳሢ ጉሙርሲ ኬኤዜኔ። ዒዚ ሃጊ ማዒ ሙኪባኣቴያ ዒ ኬኤዜ ቃኣሎ ጉሙርቂንቲ ካፓኔ።

ዬሱሴኮ ሙኪፆ ኑ ካፒ ካፒ ዓኣዖ ጌኤሹሞና፥ ሃሣ ፆኦሲ ቦንቺሳ ናንጊ ናንጋንዳጉዲ ዒ ኮዓኔ። ጊንሣ ሃሣ ፆኦሲ ካኣቱሞ ዛሎ ሜሌ ዓሶም ኑ ኬኤዛንዳጉዲያኣ ኮዓኔ። ዬሱሴ ሳዖይዳ ናንጌያና፥ “ታ ጊንፆ ሃንታዞንሢ ኬኤዛ፥ ፆኦሲ ካኣቱሞ ዛሎ ኮዦ ሃይሳ ዓጪ ቢያይዳ ኬኤዚንታንዳኔ፤ ዬይያ ጋፒንፆ ዎዶ ማዓንዳኔ” ጌዔኔ።

ሃሢ ሚርጌ ፃጲ ዴሬ ዬሱሴ ዛሎ ኮዦ ሃይሶ ዋይዚባኣሴ። ዬሱሴ ጫሪንጮ ዔውታንዳሢኮ ቤርታ ኮዦ ሃይሶ ዋይዚባኣ ዓሶም ኬኤዛንዳጉዲ ዒዛ ጊንፆ ሃንታዞንሢ ዓይሤኔ። ዒ ኬኤዛዖ “ቢያ ዓጮ ዴንዲጋፓ ዓሲም ቢያ ኮዦ ሃይሶ ኬኤዚ ታ ዓሲ ማሁዋቴ! ማኣሎ ቡሮ ዎዳ ሄሌኔ” ጌዔኔ።

ሃሣ ዬሱሴ፥ “ማዻ ዓይላሢ ማዺሻሢፓ ባሹዋሴ። ሃያ ዓጮኮ ቢታንታ ዓኣ ዓሳ ታና ዒፄሢጉዲ ዒንሢያ ዒፂ ሜታሳንዳኔ፥ ዎዺያ ዎዻንዳኔ። ሃያ ሳዖይዳ ዒንሢ ሜቶ ዔኬያ ማዔቴያ ሜታ ባኣሴ፤ ታኣኒ ሃያ ዓጮ ዎይሣ ፃላሄ ባሺናኣኮኬ። ዒንሢ ታና ጉሙርቂፆና ዶዴቴ ፆኦሲ ዒንሢ ዬያፓ ዓውሳንዳኔ!” ጌዔኔ።

ዓጮኮ ጋፒንሢ ዎዴ ማዓኣና ማዺንታንዳ ባኮ ፔጋሲ ኬኤዛኒ ዬሱሴ ፔቴ ሃይሴ ኮኦኪንሢ ማሂ ሂዚ ጌይ ኬኤዜኔ፦ “ፔቴ ዓሲ ፔኤኮ ጎዣ ቃራ ባርቼ ዜርሢ ዶኦሪ ዜርቄኔ፤ ጋዓንቴ ዒ ዴንዲ ማኣራ ላሄንቴ ዹማ ዒዛኮ ሞርኬ ሙኪ ዓዦ ዜርቂ ዴንዴኔ።”

“ዬይ ዓሢ ዜርቄ ባርቾንታ ባኣኮይዳ ዓዣሢያ ባቃሌኔ፤ ዬያሮ ዒዛም ማዻ ዓይሎፓ ፔቴ፥ ‘ጎዳሢዮ! ጎዦይዳ ኔ ዜርቄሢ ቃራ ባርቼ ሌሊቱዋዓዳ? ሂዳዖ ዓዣሢ ዓንካፓ ሙኬይ?’ ጌይ ዖኦጬኔ። ጎዳሢያ፥ ‘ዬያ ዓዣሢ ዜርቄሢ ሞርኬዋይ’ ጌዔኔ።”

“ማዾ ማዻ ዓይሎንሢ ጎዳሢ ኮራ፥ ‘ኑ ዴንዲ ዓዣሢ ቱጎንዶ?’ ጌዔኔ። ጎዳሢ ጋዓንቴ፥ ‘ዔይዔ፤ ዬያ ዒንሢ ማዼቴ ዓዣሢ ቱጋኔ ጌይ ባርቾ ቱጋንዳኔ። ዬያሮ ማኣላ ቡሪንታንዳያ ሄላንዳኣና ዎላ ዴዖንጎ፤ ዬካፓ ዓዣሢ ቱጊ ታሚዳ ዓጊ፥ ባርቾ ጋዓንቴ ማንፂ ኮና ዋሁዋቴ።”

ዬሱሴኮ ጊንፆ ሃንታዞንሢም ዬያ ኮኦኪንሦ ሃይሶ ዓይጎኮ ዒ ኬኤዜቴያ ዔያቶም ጌሊባኣሴ፤ ዬያሮ ዒ ዔያቶም ቡሊ ኬኤዛንዳጉዲ ዖኦጬኔ። ዬሱሴ ኬኤዛዖ፥ “ቃሮ ዜርፆ ዜርቄ ዓሢ ካኣቱሞም ዶኦሞናሢኬ፤ ጎዣ ዓጮ ጌይፆኬ፤ ቃሮ ዜርፃ ፆኦሲ ካኣቱሞይዳ ዓኣ ዓሶ ጌይፆኬ” ጌዔኔ።

“ዓዣሢ ፃላሄ (ፑርታሢ) ኮኦኪንሣያኬ። ዬያ ዓዣሢ ዜርቄሢ ዲያብሎሴ ጌይንታ ፃላሄኬ። ማኣሎ ቡሪፆ ጌይፃ ዓጮኮ ጋፒንፆኬ፤ ማኣሎ ቡራ ዓሳ ፆኦሲ ኪኢታንቾኬ።”

“ዓጮኮ ጋፒንፆና ፆኦሲ ኪኢታንቻ ፃላሄሮ ማዔ ዓሶ ቢያ ቡኩሲ ዔኪ ዼኤፖ ታሞይዳ ኬኤራንዳኔ፤ ዒኢካ ዬይ ዓሳ ዼኤፒ ዋኣዪሢዳ ጌሊ፥ ሜታዺ ዓቺያ ዻዓንዳኔ። ዬኖ ዎዶና ፂሎ ማዔ ዓሳ ፔ ዓዳሢ ካኣቱሞይዳ ዓቢጉዲ ፖዒ ናንጋንዳኔ።”

ዬካፓ ሃሣ ዬሱሴ ዓጮኮ ጋፒንፆ ማዓንዳሢኮ ቤርታ ዒ ማዒ ሙካንዳሢ፥ ሳዓፓ ማዒ ዴንዴ ጎይፆማ ማዒ ዬዓንዳሢያ ኬኤዜኔ። ዴንዴ ጎይፆማ ጌይፃ፦ ዑፃ ዒዛኮ ዓኣ ጎይፆማ ማዒ ሻኣሬና ዴንዴሢጉዲ ሻኣሬና ማዒ ሙካንዳኔ። ዬሱሴ ጫሪጫፓ ማዒ ሙካኣና ዬሱሴ ጉሙርቂ ዔኬዖ ሃይቄ ዓሳ ሃይባፓ ዔቂ ዢባራ ኬስኪ ዒዛ ሞኦካንዳኔ።

ዒማና ሼምፖና ዓኣ ዓሳ ዢባራ ሌካ ዔውቲ ሃይባፓ ዔቄ ዓሶና ዎላ ዬሱሴ ዔኮሮ ሞኦካንዳኔ፤ ዒኢካ ዬሱሴና ዎላኣ ማዓንዳኔ። ዬካፓ ዬሱሴ ዴሮና ዎላ ጋፒንሢ ኮሹሞና፥ ሃሣ ፔቱሞና ናንጊና ናንጋንዳኔ።

ዬሱሴ ዒዛ ጉሙርቂ ዔኬ ዓሶም ቢያ ካኣቶ ቶኦካ ዓጎሢጉዴ ቦንቾ ባኮ ዓጋንዳያታሢ ጉሙርሲ ኬኤዜኔ። ዬያሮ ዔያታ ጋፒንሢ ማዔ ኮሹሞና ፆኦሲና ዎላ ናኣናና ካኣታዺ ናንጋንዳኔ።

ጋዓንቴ ፆኦሲ ዬሱሴ ጉሙርቂ ዔኪባኣ ዓሶይዳ ቢያ ፑርታ ዎጌ ዎጋንዳኔ። ናንጊና ዔያታ ሜታዻንዳ ቤዞና ዬያ ሜቶፓ ዔቄያና ዓቺ ዔያታ ዻዓንዳ፥ ዼኤፖ ዔታ ኬኤሪንታንዳኔ። ዒኢካ ባይቁዋ ታሚ ዔያቶ ሚቻንዳኔ፤ ሃይቁዋ ዛኣሌያ ዔያቶ ሙዒ ሙዒ ናንጋንዳኔ።

ዬሱሴ ማዒ ሙካዖ ፃላሄንታ ዒዛ ካኣቱሞዋ ቢያ ባይዛንዳኔ። ፃላሄ ፆኦሲም ዓይሢንቶ ዒፂ ዒዛ ጊንፆ ሺሬ ዓሶ ቢያሢና ዎላ ናንጊና ሚቺንታንዳ ታሞይዳ ኬኤሪንታንዳኔ።

ዓዳኣሜና ሂዋኣኖና ፆኦሲም ዓይሢንቶ ዒፂ ሃያ ሳዖ ጎሜ ዔኪ ጌልዜሢሮ ፆኦሲ ሳዖ ጋዳንቄኔ፤ ባይዛኒያ ማሌኔ። ጋዓንቴ ፔቴ ኬሊ ፆኦሲ ፔቴታዖ ፓጬ ባኣዚባኣ ዓኪ ጫሪንቺንታ ሳዓንታ ማዣንዳኔ።

ዬሱሴና ዴሮና ዓኮ ሳዖይዳ ናንጋንዳኔ፤ ዓኣ ባኮኮ ቢያ ዑሢ ማዒ ካኣታዻንዳኔ። ዬሱሴ ዬኤካ ዓሶኮ ዓኣፓፓ ዓቢፆ ዑጫንዳኔ፤ ዬካፓ ሴካ ዋኣዮ ናንጊ፥ ዖዪሢ፥ ዬኤፒ፥ ፑርቱሞ፥ ሃርጌንታ ሃይቢያ ባኣያ ማዓንዳኔ። ዬሱሴ ፔኤኮ ካኣቱሞ ኮሹሞና ፒዙሞና ዶዲሺ ናንጊና ዴሮና ዎላ ናንጋንዳኔ።