47. ጳውሎሴና ሲላሴና ፒልጲሲዮሴ ካታሞይዳ

ሳውሌ ሮሜ ካኣቶ ዓጮ ቢያ ሃንታ ዎዶና ሮሜ ዓሳ ዒዛኮ ሱንፆ “ጳውሎሴ” ጌይ ዔኤሊሢ ዓርቄኔ። ፔቴ ኬሊ ጳውሎሴና ዒዛኮ ላጋሢ ሲላሴና ዬሱሴ ዛሎ ኮዦ ሃይሶ ኬኤዛኒ ፒልጲሲዮሴ ካታሞ ዴንዴኔ። ዒማና ዔያታ ዓሳ ሺኢጲሢሮ ቡካ፥ ካታሞኮ ዙላ ዓኣ ዎርዚ ዓቺስኬኖ ሙካዖ ኮርሞ ኮርማያ ሊዲያ ጌይንታ ላኣሊስኬኖ ዴንቄኔ። ዒዛ ሚርጌና ፆኦሲ ናሽካያ ሃሣ ካኣሽካ ላኣሊኬ።

ጳውሎሴንሢ ዬሱሴ ዛሎ ኬኤዛ ኪኢቶ ዒዛ ጉሙርቂ ዔካንዳጉዲ ፆኦሲ ዒዞኮ ዒኖ ቡሌኔ። ዬያሮ ዒዛ ዬሱሴ ጉሙርቂ ዔኪ ዒዞንታ ማኣሮ ዓሶንታ ዋኣፆና ማስቴኔ። ዬካፓ ዒዛ ጳውሎሴንታ ሲላሴንታ ዒዞ ማኣሪ ዬዓንዳጉዲ ዔኤላዛ ዔያታ ዒኢካ ዴንዲ ኮዦ ሃይሶ ማዾ ማዻኣና ዬኖ ማኣሮ ዓሶና ዎላ ዴዔኔ።

ጳውሎሴና ሲላሴና ሚርጌ ኬሊ ሺኢጲፆ ቤዞይዳ ዓሶና ካኣማኔ። ፔቴ ኬሊ ጳውሎሴንሢ ሺኢጲፆ ቤዞ ዴንዳንቴ ዓሲም ማዾ ማዻ ዣኣዦ ዉዱሮ ናይስኬና ጊንፆ ዔያቶኮ ሙኪ ሙኪ ዔያቶ ዛሎ ኬኤዚሢ ዓርቄኔ። ዬና ዉዱሮ ናዔላ ዒዞይዳ ዓኣ ፃላሆ ዓያና ዒዞ ጌስቲሳሢሮ ዓሶም ዦኦቂ ዦኦቂ ዒዞ ማዺሻ ዓሶም ሚርጌ ሚኢሼ ዴንቂሳያኬ።

ዬና ናዔላ ዔያቶ ጊንፆ ሃንታዖ፥ “ሃንሢ ዓሶንሢ ዼኤፖ ፆኦዛሢም ማዻያኬ፤ ዒንሢም ዔያታ ዻቂንታ ጎይሢ ኬኤዛንዳኔ!” ጌይ ዒላቲ ዓርቄኔ። ጳውሎሴ ዻጋዻንዳያ ሄላንዳኣና ዺቢ ማይንቲ ዒዛ ዬያ ማዼኔ።

ጋፒንፆይዳ ፔቴ ኬሊ ናዔላ ዬኖ ባኮ ኬኤዚ ኬኤዚ ዒላቶ ዓርቃዛ ጳውሎሴ ዒዞ ባንሢ ሺራዖ፥ “ዬሱሴ ሱንፆና ሃኖ ናዔሎፓ ሃሺ ኬስኬ!” ጌዒ ሜዣሢ ጎራዛ ኔጉዋዖ ኬስኬም ዒዛ ዻቄኔ።

ዬኖ ዓይሌ ማሂ ማዺሻ ዓሳ ናዔላ ዬይ ፑርቶ ዓያና ባኣንቴ ዦኦቃኒ ዳንዳዑዋኣሢንታ ሚኢሻኣ ዔያቶኮ ዓቴሢ ዔሪ ሚርጌና ዻጋዼኔ።

ዬያሮ ናዔሎ ማዺሺ ናንጋ ዓሳ ጳውሎሴና ሲላሴና ዓርቂሲ ሮሜ ዓጮ ዎይሣ ዓሶ ቤርቶ ሺኢሼስካፓ ጳርቂሲ፥ ቱኡሲ ማኣሪያ ጌልዜኔ።

ጳውሎንሢ ዒማና ቱኡዞ ማኣሮኮ ጋሮ ቆልዖይዳ ቶኮ ዱፄና ቱኡቲ ዴዔኔ። ጋዓንቴ ዬኖ ዋኣንቶ ሳዓ ጊዲሚሺ ማዓኣና ፆኦሲ ቦንቾም ማዓ ጋላታ ዓይኑሞ ዓይናዺሢ ዔያታ ዓርቄኔ።

ዒማና ዔርቲባኣንቴ ሳዓ ዓጊፄኔ፤ ዬያሮ ቱኡዞ ማኣሮኮ ካራ ቢያ ጉሪ ቡሊንቴኔ። ቱኡዞ ዓሶ ቱኮና ካኖ ቢራታኣ ቶርሌ ዲኢኔኔ።

ቱኡዞ ማኣሮ ካፓሢያ ጊንዓፓ ጴጫዖ ቱኡዞ ማኣሮኮ ካራ ቡሊንቴሢ ዴንቂ፥ ቱኡዞ ዓሳ ቢያ ቶሌኔ ጌይ ማሊ ዲቃቴኔ፤ ዬያሮ ፔና ዎዻኒ ማሌኔ። ዬያ ዒ ማዼሢ ቱኡዞ ዓሳ ጎኔ ቶሌያታቴ ሮሜ ዓጮ ዎይሣ ዓሳ ዒዛ ዎዻንዳሢሮኬ። ዬያ ዒ ማዻኒ ጋዓሢ ጳውሎሴ ዴንቃዖ፥ “ኔ ጊዳ ፔቴ ባኣዚታዖ ማዺፖ! ኑ ቢያሢ ዓኣኔ” ጌይ ዒላቲ ኬኤዜኔ።

ቱኡዞ ማኣሮ ካፓሢ ጳውሎሴና ሲላሴና ባንሢ ጎጋይቂ ጎጋይቂ ሙካዖ፥ “ታ ዻቃኒ ዓይጎ ማዾንዶይ?” ጌይ ዖኦጬኔ። ጳውሎሴ ዒዛም፥ “ጎዳ ዬሱሴ ጉሙርቂ ዔኬ፤ ኔናንታ ኔ ማኣሮ ዓሶንታ ዻቃንዳኔ” ጌዔኔ።ዬካፓ ዬይ ቱኡዞ ማኣሮ ካፓሢ ጳውሎሴና ሲላሴና ፔ ማኣሪ ዔኪ ዴንዲ ኪፆ ዔያቶኮ ዋኣሢ ዖይዺሺ ማስኬኔ። ጳውሎሴያ ዬኖ ኬኤፆይዳ ዓኣ ዓሶም ዬሱሴ ዛሎ ኮዦ ሃይሶ ኬኤዜኔ።

ዬያሮ ዬያ ዓሢንታ ማኣሮ ዓሶንታ ቢያ ዬሱሴ ጉሙርቂ ዔኪ ዋኣፆና ማስቴስካፓ ጳውሎሴና ሲላሴናም ሙኡዚ ሺኢሻዖ ፔቱሞና ዎላ ሙይ ዑሽኪ ዎዛዼኔ።

ዚሮ ጉቴሎ ፒልጲሲዮሴ ካታሞ ዎይሣ ዓሳ ጳውሎሴና ሲላሴና ቱኡዛፓ ቡሊ ካታሞ ሃሺ ዓኣዻንዳጉዲ ዔያቶ ዖኦጬኔ። ዬያሮ ጳውሎሴና ሲላሴና ሊዲያንታ ሜሌ ዔያቶኮ ላጎዋ ሳራሤስካፓ ካታሞ ሃሺ ዴንዴኔ። ዬካፓ ዔያታ ዬሱሴ ዛሎ ኮዦ ሃይሶ ኬኤዚፆ ሃሺባኣሴ፤ ሺኢጲፆ ማኣሮ ዓሳኣ ዶዲ ዶዲ ዳልጊሢ ዓርቄኔ።

ጳውሎሴንታ ሃንጎ ዓማኖ ዓሶ ሱኡጎንታ ዬሱሴ ዛሎ ኮዦ ሃይሶ ኬኤዚ ኬኤዚ ዺቢ ካታማ ሃንቴኔ። ዬያጉዲ ዱማ ዱማ ሺኢጲፆ ማኣሮ ዓሶ ዶዲሻኒና ፆኦሲ ዛሎዋ ዔራንዳጉዲ ዺቢ ኪኢታ ፃኣፔኔ። ዬያ ኪኢቶኮ ፔቴ ፔቴሢ ጌኤዦ ማፃኣፖይዳ ጌሌኔ።