46. ጳውሎሴ ኪሪስቶሴ ጉሙርቂ ዒዛ ዓሲ ማዔሢ

ሳውሎ ጌይንታሢ ዓሳ ዒስፂፓኖሴ ሹጮና ዹይ ዎዻኣና ዎላ ሶኦሪ ዓፒሎ ዔያቶኮ ካፔ ዼጌሢኬ። ዬሱሴ ጉሙርቂ ዒዚ ዔኪባኣሴ፤ ዬያሮ ዓማኖ ዓሶ ዳውሳ ዓሲ ማዔኔ። ዬሩሳላሜይዳ ኪሪስቶሴ ጉሙርቃ ዓቲንቆንታ ላኣሎንታ ኬኤፃፓ ዓርቂ ዓርቂ ዔኪ ቱኡሲ ማኣሪ ዒ ጌልዛኔ፤ ዴማስቆ ካታሞይዳ ዓኣ ዓማኖዋ ዔኪ ሙኪ ዬሩሳላሜይዳ ቱካኒ ቄኤሶ ቢያኮ ሱኡጋሢፓ ቢታንቶ ዋርቃታኣ ዔኬኔ።

ዬያሮ ሳውሌ ዴማስቆ ዴንዲፆይዳ ዓኣንቴ ጫሪንካፓ ዔርቲባኣ ፖዒ ዒዛ ኮይላ ፖዔኔ፤ ዬያሮ ዒዚ ኬዲ ሳዓ ሎኦሜኔ። ፔቴ ዓሲ ዒማና፥ “ሳውሌ! ሳውሌ! ኔ ታና ዓይጋ ዳውሳይ?” ጋዓያ ዒ ዋይዛዖ፥ “ጎዳሢዮ! ኔ ዖናዳይ?” ጌይ ዖኦጬኔ። ዬሱሴያ፥ “ኔ ታና ዳውሳ፥ ታኣኒ ዬሱሴኬ!” ጌዔኔ።

ሳውሌ ሳዓፓ ዔቃንቴ ዓኣፓ ዒዛኮ ሳዖ ዴንቁዋያ ማዔኔ፤ ዬያሮ ዒዛና ዎላ ዓኣ ላጋ ዒዛ ጎቺ ዔኪ ዴማስቆ ካታሞ ጌልዜኔ። ዒኢካ ሳውሌ ሙኡዚያ ሙዒ፥ ዑሽኮ ባኣዚያ ዑሽኩዋዖ ሃይሦ ኬሊ ዴዔኔ።

ዴማስቆይዳ ሃናኒያ ጌይንታ ዬሱሴ ጊንፆ ሃንታያ ማዔስኬይ ዓኣኔ። ፆኦሲ ሃናኒያም፥ “ሳውሌ ዓኣ ማኣሪ ዴንዴ፤ ዒዛኮ ዓኣፓ ቡሊንታንዳጉዲ ዒዛ ዑፃ ኩጮ ጌሤ” ጌዔኔ። ሃናኒያ ጋዓንቴ “ጎዳሢዮ! ዬይ ዓሢ ዬሱሴ ጊንፆ ሃንታያ ማዔ ዓሶ (ዓማኖ) ዎማይዲ ዳውሲ ሺራቴያ ታ ዋይዜኔ” ጌዔኔ። ፆኦሲያ “ኔኤሮ ዴንዴ! ዒዚ ዓይሁዶንታ ሜሌ ዴሮንታም ቢያ ሱንፆ ታኣሲ ኬኤዛያ ማዓንዳጉዲ ታ ዒዛ ዶኦሬኔ፤ ዒዚ ታ ሱንፆ ጋይቴ ሚርጌ ሜቶ ዛጋንዳያኬ” ጌዔኔ።

ዬያሮ ሃናኒያ ሳውሌ ኮራ ዴንዳዖ ኩጮ ዒዛ ዑፃ ጌሤኔ፤ ዬካፓ ዒዛም፥ “ሃይካ ኔ ሙካኣና ጎይፆይዳ ኔኤም ፔጋዺ ጴዼ፥ ዬሱሴ ዓኣፓ ኔኤኮ ጊንሣ ዛጋንዳጉዲ፤ ዓያና ጌኤሺያ ኩሙሢ ዎልቄና ኔ ጊዳ ማዻንዳጉዲ ታና ዳኬኔ” ጌዔኔ። ዒማና ሳውሌ ኔጉዋዖ ዛጋኒ ዳንዳዔኔ፥ ሃናኒያ ዒዛ ዳምቦ ጎይፆ ዋኣፆና ማስኬኔ። ሳውሌያ ሙኡዚ ሙዒ፥ ዶዴኔ።

ሳውሌ ቤዞማና፥ “ዬሱሴ ፆኦሲ ናይኬ!” ጌዒ ዴማስቆይዳ ዓኣ ዓይሁዶ ዓሶም ኬኤዚሢ ዓርቄኔ። ዬይ ቤርታ ዓማኖ ባይዛኒ ዳውሲ ሺራ ዓሢ ዬሱሴ ጉሙርቂ ዔኪ ዒዛ ዓሲ ማዒፆና ዓይሁዶ ዓሳ ዲቃቲ ሄርሼኔ። ሳውሌያ ዬሱሴ ካኣቱሞም ዶኦሞናያ (ሜሲሄ) ማዔሢ ጎናሲ ኬኤዚ ኬኤዚ ሚርጌ ዓይሁዴ ዓሲ ዬሱሴ ጊንፆ ሃንታያ ማሄኔ።

ዎርቂ ፔኤቂቤቃ ዓይሁዶ ዓሳ ሳውሌ ዎዻኒ ኮዔኔ፤ ዬያሮ ካታሞ ጌሎ ካሮይዳ ካቲ ዴይ ዒዛ ዎዻንዳ ዓሲ ዶኦሪ ዳኬኔ። ጋዓንቴ ሳውሌ ዬያ ዓይሁዶኮ ማሊፆ ዋይዜሢሮ ዓማኖ ዓሳ ዒዛ ዹማ ካታሞኮ ኬኤሎ ዲፆ ዑሣ ኮታና ኬይሲ ዳኪ ቶሊሴኔ። ሳውሌ ዴማስቆይዳፓ ዬያይዲ ቶሌስካፓ ዬሱሴ ዛሎ ዓኣዼ ቤዛ ቢያ ኬኤዜኔ።

ዬካፓ ሳውሌ ዬሱሴ ጊንፆ ሃንታዞንሢና ካኣማኒ ዬሩሳላሜ ዴንዴኔ፤ ዔያታ ጋዓንቴ ዒዛ ዒጊጬኔ። ዒማና ባርናባሴ ጌይንታ ዓማናስኬይ ሳውሌ ዔኪ ዬሱሴ ጊንፆ ሃንታዞንሢ ኮራ ዴንዳዖ ዒዚ ላኣሚንቴያ ማዒ ዴማስቆይዳ ዬሱሴ ዛሎ ኮዦ ሃይሶ ጫርቂ ኬኤዜ ጎይፆ ዔያቶም ማርካዼኔ። ዬያሮ ዬሱሴ ጊንፆ ሃንታዞንሢ ሳውሌ ጉሙርቂ ዔያቶና ዎላ ዒ ማዓንዳጉዲ ዔኤዔኔ።

ዬኖ ዎዶና ሃሣ ዬሩሳላሜይዳ ዔቄ ዳውሲፆ ዛሎና ፑኒ ዓኣዼ ፔቴ ፔቴ ዓማና ዓሲ ዓንፆኪያ ዴንዲ ዬሱሴ ዛሎ ኮዦ ሃይሶ ኬኤዜኔ። ዓንፆኪያይዳ ዓኣ ዓሶኮ ባሼሢ ዓይሁዴ ዓሲቱዋሴ፤ ጋዓንቴ ዬኖ ቤዞይዳ ፔቴ ጌዒ ዓይሁዴቱዋ ሚርጌ ዴሬ ዬሱሴ ጉሙርቂ ዔኪ ዓማና ማዔኔ። ዬያሮ ባርናባሴና ሳውሌና ዒኢካ ዓኣ ዓኮ ዓማኖ ዬሱሴ ዛሎ ዔርዚ ዔርዚ ዶዲሻኒ፥ ሺኢጲሢ ማኣሪያ ዔቂሳኒ ዴንዴኔ። ዬሱሴ ጉሙርቂ ዔኪ ዻቄ ዓሳ ባራሪ ዬኖ ቤዛ “ዓማኖ” ጌይ ሱንሢ ጌቴኔ።

ፔቴ ኬሊ ዓማኖ ዓሳ ዓንፆኪያይዳ ሙኡዚ ሃሺ፥ ፆኦሲያ ሺኢቃንቴ ዓያና ጌኤሺ “ታኣኒ ታ ማዾም ዔኤሌ፥ ባርናባሴና ሳውሌና ታኣም ዱማሱዋቴ” ጌዔኔ። ዬያሮ ዓንፆኪያይዳ ዓኣ ሺኢጲፆ ማኣሮ ዓሳ ባርናባሴና ሳውሌናም ሺኢቃዖ ኩጮ ዑፃ ጌሤኔ። ዬካፓ ዬሱሴ ዛሎ ኮዦ ሃይሶ ኬኤዛንዳጉዲ ሚርጌ ቤሲ ዳኬኔ። ዬያሮ ባርናባሴና ሳውሌና ሚርጌ ፃጲ ዴሬም ዬሱሴ ዛሎ ኬኤዜም ዺቢ ዓሲ ዬሱሴ ጉሙርቂ ዔኪ ዓማና ማዔኔ።