45. ፒልጶሴና ዒቶጲያ ዓጮኮ ቢታንቶ ዓኣ ዓሲስኬያና ሃይሴ

ሚና ሃጊ ዓይፆይዳ ዓኣ ሺኢጲፆ ማኣሮ ሱኡጎፓ ፔቴሢ ዒስፂፓኖሴ ጌይንታያኬ። ዒዚ ኮሺ ዓሲ፥ ዓያና ጌኤሺያ ኩሙሢ ዎልቄና ዒዛይዳ ማዻያ፥ ዔራ ዓሲኬ። ዬይ ዒስፂፓኖሴ ፆኦሲ ዎልቄና ማዺንታ ሚርጌ ዓኪ ባኣዚ ማዼያ፥ ዓሳኣ ዬሱሴ ጉሙርቃንዳጉዲ ጎኑሞ ፔጋሲ ዔሪ ኬኤዜ ዓሲኬ።

1. ፔቴ ኬሊ ዒስፂፓኖሴ ዬሱሴ ዛሎ ኬኤዛንቴ ዬሱሴ ጉሙርቁዋ ዓይሁዴ ዓሲ ዒዛና ሞኦቶ ዓርቄኔ፤ ዒማና ዔያታ ሚርጌ ዻጋዻዖ ሉኡዙሞ ባኣዚና ዴንዲ ዔያቶኮ ሱኡጎም ዒስፂፓኖሴ ፑሽኬኔ። ዔያታ፥ “ሙሴንታ ፆኦሲንታይዳ ዒስፂፓኖሴ ፑርታ ጌኤሲ ጌስታንቴ ኑ ዋይዜኔ!” ጌዔኔ። ዬያሮ ዓይሁዶ ሱኡጋ ዒስፂፓኖሴ ዓርቂ ሜሌ ዓሲያ ዒዛም ሉኡቂ ፑሽኬ፥ ቄኤሶኮ ሱኡጋሢንታ ሃንጎ ሱኡጎ ኮራ ዔኪ ዴንዴኔ።

ዒማና ቄኤሶኮ ሱኡጋሢ ዒስፂፓኖሴ ኮራ፥ “ዬይ ባካ ጎኔ ባኣዚዳ?” ጌዒ ዖኦጬኔ። ዒስፂፓኖሴ ዓብራሃሜ ዎዳፓ ዓርቃዖ ዴንዲ ዬሱሴ ማዼ ዎዶ ሄላንዳኣና ፆኦሲ ማዼ ዲቃሢ ሄርሺሳ ባኮ ዛሎ፤ ዬያጉዲ ሃሣ ዴራኣ ፆኦሲም ዋይዞ ዒፂ ጌኤታዼሢ ዛሎ ጶቂሢ ኬኤዜኔ። ዬካፓ ዒ፥ “ዒንሢ ባቃኖ ዴይሤ ዓሳ! ቤርታ ዒንሢኮ ዓዶንሢ ፆኦሲንታ ዒዛ ማሊፆ ኬኤዛ ዓሶ ዎዼ ጎይፆማ ዒንሢያ ዓያኖ ጌኤዦ ሃሢ ማካኔ፤ ያዺ ማዒፆና ዒንሢኮ ዓዶንሢፓ ባሼ ፑርታ ባኣዚ ዒንሢ ማዻኔ፥ ካኣቱሞም ዶኦሞናሢያ ዒንሢ ዎዼኔ!” ጌዔኔ።

ዓይሁዶ ካኣዦ ሱኡጋ ዬያ ዋይዛዖ ዋዮ ፔኤኮ ዓርቂ ዒላታንዳያ ሄላንዳኣና ዻጋዼኔ። ዒስፂፓኖሴያ ዔያታ ጎቺ ዔኪ ካታሞ ዙሎ ኬሲ ሹቻ ዹይ ዓጌኔ።

ዒስፂፓኖሴ ሃይቢሮ ሳዛ ጋሽኪቤቃ፥ “ዬሱሴ! ታ ሼምፖ ዔኬ” ጌይ ዒላቴኔ። ዬካፓ ሃሣ ሳዓ ጉምዓቲ፥ “ጎዳሢዮ! ሃያ ዻቢንቶ ዔያቶኮ ዓርቂፖ” ጌዒ ላሚ ዒላታዖ ሃይቄኔ።

ሳውሌ ጌይንታ ፔቴ ዼጌስኬይ ዒስፂፓኖሴ ዎዼ ዓሶኮ ማዾ “ቃራኬ” ጌዒ ሶኦሪ ሹጮና ዒዛ ዹዓ ዓሶኮ ዓፒሎ ካፔኔ። ዒማ ኬሎ ዬሩሳላሜይዳ ናንጋ ዓሳ ዬሱሴ ጊንፆ ሃንታ ዓሶ ዳውሲሢ ዓርቄኔ፤ ዬያሮ ዓማኖ ዓሳ ሜሌ ቤሲ ቤቲ ዴንዴኔ። ያዺ ዔያታ ዳውሲንታቴያ ዴንዴ ቤዞይዳ ቢያ ዬሱሴ ዛሎ ማርካዻኔ።

ዬሱሴ ጊንፆ ሃንታ ፒልጶሴ ጌይንታስኬይ ዬሩሳላሜፓ ዳውሲንቲ ዴንዴ ዓሶፓ ፔቴሢኬ። ዬይ ሳማሪያ ካታሞ ዴንዳዖ ዬሱሴ ዛሎ ኮዦ ሃይሶ ኬኤዛዛ ሚርጌ ዓሲ ጉሙርቂ ዻቄኔ። ዬካፓ ፔቴ ኬሊ ፆኦሲፓ ዳኪንቴ ኪኢታንቾስኬይ ዓሲ ናንጉዋ ዳውሎይዴና ዴንዳ ጎይፆ ዓኣዻንዳጉዲ ፒልጶሴም ኬኤዜኔ። ዬያሮ ዒ ዓኣዺፆይዳ ዓኣንቴ ፔቴ ዔርቴ ቢታንቶ ዓኣ ዒቶጲያ ዓሲስኬያ ሳርጌላና ዴንዳንቴ ዴንቃዛ ዬያ ዓሢ ባንሢ ዴንዲ ጌስታንዳጉዲ ዓያና ጌኤሺ ዒዛ ዓይሤኔ።

ፒልጶሴ ዬያ ሳርጌሎ ባንሢ ሙካዖ ዬይ ዒቶጲዮ ዓሢ ፆኦሲ ማሊፆ ኬኤዛ፥ ዒሲያሴ ማፃኣፖፓ ፔቴ ቤሲ ናባባንቴ ዋይዜኔ። ዓሢ ናባባሢ፥ “ሹኪንታ ማራይጉዲ ዒሺንቴኔ፥ ማራይ ዚቲ ጋዓሢጉዲ ዒ ፔቴታዖ ዔኤቢ ጌይባኣሴ፤ ዒዛይዳ ዎጋኒ ዔኪ ዴንዶናኔ፥ ዒዛ ቦንቺያ ቦንቺቦኦሴ፤ ሼምፖና ዓኣ ዓሳ ናንጋ ሳዓፓ ዒዛ ባይዞናኔ” ጋዓያኬ።

ዬያሮ ፒልጶሴ ዒቶጲዮ ዓሢ ኮይላ፥ “ኔ ናባባ ባካ ኔኤም ጌላ?” ጌዒ ዖኦጬኔ። ዒቶጲዮ ዓሢያ፥ “ዔርታ ባኣዚ ባኣሴ፤ ታኣም ፔጋሲ ኬኤዛ ዓሲ ባኣንቴ ዎይቲ ታ ሃያ ዔራንዳይ? ሂንዳ ሃኒ ሃይካ ዬዒ ዴዒ ታኣም ኬኤዜቴራ። ፆኦሲ ማሊፆ ኬኤዛ ዒሲያሴ ሃያ ጋዓሢ ፔ ዛላሞ ዓሲ ዛላዳይ?” ጌዔኔ።

ዒሲያሴ ዬያ ጌይ ፃኣፔሢ ዬሱሴ ዛሎ ማዔሢ ፒልጶሴ ዒቶጲዮ ዓሢም ፔጋሲ ኬኤዜኔ። ፒልጶሴ ዬሱሴ ዛሎ ኬኤዛ ኮዦ ሃይሶ ጌኤዦ ማፃኣፖይዳፓ ዔኪ ዔኪ ቃሲ ኬኤዜኔ።

ፒልጶሴና ዒቶጲዮ ዓሢና ጎይፆ ዓኣዺፆይዳ ዓኣዖ ዋኣሢ ዎርዚ ሄሌኔ። ዬያሮ ዒቶጲዮ ዓሢ፥ “ሃይሾ ሃይካ ዋኣሢ ዓኣኔ! ዳምቦ ጎይፆና ታ ማስታኒ ላኣጋ ባኣዚ ዓኣ?” ጌይ ዖኦጬስካፓ ሳርጌሌሎ ዒሻ ዓሣሢም ኬኤዚ ዔቂሲሴኔ።

ዬያሮ ዔያታ ዎሮ ኬዴም ፒልጶሴ ዒዛ ዬሱሴ ጉሙርቄ ዓሳ ማዻ ዳምቦ ጎይፆ ዋኣፆና ማስኬኔ። ዋኣፃፓ ዔያታ ኬኬስካኣና ዔርቲባኣ ጎይሢና ዓያና ጌኤሺ ፒልጶሴ ዔኪ ዴንዲ ሜሌ ቤስካ ጌሤም ዬሱሴ ዛሎ ዒኢካ ኬኤዚሢ ዓርቄኔ።

ዬይ ዒቶጲዮ ዓሢ ዬሱሴ ዔሪ ጉሙርቄሢሮ ዎዛዺ ዎዛዺ ፔ ዓጮ ዴንዴኔ።