44. ጴፂሮሴና ዮሃኒሴና ፔቴ ዎቦ ዓሲ ፒሼሢ

ፔቴ ኬሊ ጴፂሮሴና ዮሃኒሴና ጌኤዦ ማኣሪ ሺኢጲሢሮ ሙካዖ ጌኤዦ ማኣሮ ካራ ዴዒ ሚኢሼ ዒንጎም ሺኢቃ ዎቦ ዓሲስኬያ ዴንቄኔ።

ጴፂሮሴ ዒማና ዬያ ዎቦ ዓሢ ዛጋዖ፥ “ታ ኔኤም ዒንጋዳ ሚኢሼ ፔቴታዎ ታ ኮራ ባኣሴ፤ ጋዓንቴ ታኣኮ ዓኣ ባኮማ ታ ዒንጋንዳኔ፤ ዬሱስ ኪሪስቶሴ ሱንፆና ዔቂ ሃንቴ!” ጌዔኔ።

ዬያሮ ቤዞና ፆኦሲ ዬያ ዎቦ ዓሢ ዻቂሼኔ፤ ዒዚያ ፒኪ ዔቂ ሴካ ሃንጋ ሃንቲ ኮኦሚያ ኮኦሚ ፆኦሲ ጋላቲሢ ዓርቄኔ። ጌኤዦ ማኣሮኮ ዲሮ ጋራ ዓኣ ዓሳ ዬያ ዛጋዖ ሚርጌና ዲቃቲ ሄርሼኔ።

ዬያ ዻቄ ዓሢ ዛጋኒ ሚርጌ ዴሬ ዲርጊ ሙኬኔ። ጴፂሮሴ ዒማና ዬያ ዓሶም፥ “ሃይ ዎቦ ዓሢ ዻቂ ዔቄሢኮ ዓይጎሮ ዒንሢ ኑ ማዼጉዲ ዲቃቲ ሄርሻይ? ኑኡኒ ኑ ዎልቄና፥ ጊንሣ ሃሣ ኑ ማዻ ኮሺ ማዾ ዛላና ዒ ዻቄያቱዋሴ። ሃያ ዓሢ ፒሺ ዻቂሴሢ ዬሱስ ኪሪስቶሴኮ ዎልቆና ዒዚ ዒንጋ ጉሙርቂሢኬ” ጌዔኔ።

“ዬሱሴ ዒ ዎዻንዳጉዲ ሮሜ ዓጮ ዎይሣሢም ፑሽኬሢ ዒንሢኬ። ናንጊኮ ዓይሢ ማዔሢ ዒንሢ ዎዼኔ፤ ፆኦሲ ጋዓንቴ ዒዛ ሃይባፓ ዔቂሴኔ። ዒንሢ ዓይጎ ማዻቴያ ዔሪባኣያታንቴ ካኣቱሞም ዶኦሞናሢ ሜቶ ዔካንዳጉዲና ሃይቃንዳጉዲ ኬኤዚንቴ ዒዛ ማሊፆ ኩንሣኒ ፆኦሲ ዒንሢ ማዾ ሶኦሬኔ። ዬያሮ ሃሢ ጎማ ዒንሢኮ ማስቲ ጌኤሽካንዳጉዲ ጎሞ ቡኡፂ ፆኦሲ ባንሢ ማዑዋቴ” ጌዔኔ።

ጌኤዦ ማኣሮ ዎይሣ ሱኡጋ ጴፂሮሴንታ ዮሃኒሴንታ ጋዓ ባኮ ዛሎና ሚርጌና ዻጋዼኔ። ዬያሮ ዔያቶ ዓርቂ ዔኪ ቱኡሲ ማኣሪ ጌልዜኔ። ጋዓንቴ ሚርጌ ዓሲ ጲፂሮሴ ጋዓ ባኮ ጎናሲ ዔኪ ዬሱሴ ጉሙርቄኔ፤ ዬያሮ ዬሱሴ ጉሙርቂ ዔኬ ዓማኖኮ ፓይዳ ሴካ ዶንጎ ሺያ ባንሢ ማዔኔ።

ዚሮ ጉቴሎ ዓይሁዶ ሱኡጋ ጴፂሮሴንታ ዮሃኒሴንታ ቄኤሶኮ ሱኡጋሢና ሃንጎ ዓይሁዶ ዓሶኮ ካኣዦ ሱኡጋ ዓኣ ቤዞ ዔኪ ዬዔኔ። ዬካፓ ጴፂሮሴንሢ ኮራ፥ “ሃያ ዎቦ ዓሢ ዓይጎ ዎልቄና ዒንሢ ፒሺ ዻቂሼይ?” ጌይ ዖኦጬኔ።

ጴፂሮሴያ ማሃዖ፥ “ሃይ ዓሢ ካኣቱሞም ዶኦሚንቴ፥ ዬሱሴ ዎልቄና ዻቂ ሃይሾ ዒንሢ ቤርታ ዔቄኔ።ዒንሢ ዬሱሴ ሱፂ ዎዼኔ፤ ፆኦሲ ጋዓንቴ ዒዛ ሃይባፓ ዔቂሴኔ! ዒንሢ ዒዛ ጎኔኬ ጌይ ዔኪባኣሴ፤ ጋዓንቴ ዬሱሴ ዎልቄና ማዒባኣንቴ ሜሌ ዻቂንታኮ ካራ ባኣሴ!” ጌዔኔ።

ጴፂሮሴና ዮሃኒሴና ዻንጋ ጩቺባኣያ ጌስታሢሮ ዓይሁዶ ሱኡጋ ዲቃቴኔ፤ ዎይቲ ጌዔቴ ጴፂሮሴንሢ ቲሚርቴ ታማሪባኣያታሢ ዔያታ ዔራሢሮኬ። ያዺ ማዔቴያ ዔያታ ዬሱሴና ዎላ ዓኣያታሢ ጶቂሣዖ ዲቃሢ ዒጊቻንዳ ሃይሴ ኬኤዛዖ ቡሊ ዔያቶ ዳኬኔ።