43. ሺኢጲፆ ማኣሮ ዓሶኮ ቡኪንታ ዓርቄ ጎይፆ

ዬሱሴ ሌካ ጫሪንጮ ዔውቴስካፓ ዒዛኮ ጊንፆ ሃንታዞንሢ ዒ ዔያቶ ዓይሤ ጎይፆ ዬሩሳላሜይዳ ዴዔኔ። ዒኢካ ዬሱሴ ጉሙርቃ ዓሳ (ዓማና) ቢያ ኬሊ ሺኢጲሢሮ ቡካኔ።

ዓይሁዳ ሌዓ ሌዓ ዑሣ ዓኣዺፆ ቦንቻ ቦንቻ ቦንቺንቲ ጋፔስካፓ ዶንጊታሚ ኬሊ ዴዒ ቦንቾ ጴንፄቆስፄ ጌይንታ ቦንቾ ዓኣኔ። ዬኖ ቦንቾ ዓይሁዶ ዓሳ ማኣሊ ቡራዖ ቦንቻያኬ፤ ዬያሮ ቢያ ዓጪዳፓ ዓይሁዴ ማዔ ዓሲ ዬያ ቦንቾ ኬሎ ቦንቻኒ ዬሩሳላሜ ሙካኔ። ዬሱሴ ሌካ ጫሪንጮ ዔውቴንቴ ፔቴ ቃልሾ ኬሊኮ ጊንፃ ዬና ጴንፄቆስፄ ቦንቾ ኬላ ሄሌኔ።

ዬያሮ ሺኢጲፆ ማኣሮ ዓሳ (ዓማና) ፔቴይዳ ቡኪ ዓኣንቴ ዔርቲባኣ ጎይሢና ዼኤፒ ዑኡሲ ዋይዚሳ ዢባሬ ጋሮ ኩሜኔ። ዬካፓ ፔቴ ፔቴ ዓማኖ ዑፆይዳ ታሚ ሎስቶ ማላ ባኣዚ ኬዲ ዴዔኔ፤ ያዺ ማዔሢሮ ቢያሢ ዓያና ጌኤሺ ቢታንቶ ዴሞ ጌሊ (ዓያና ጌኤሺ ኩሚ) ዱማ ዱማ ዻንጋ ጌስቲሢ ዓርቄኔ።

ዬሩሳሌሜይዳ ናንጋ ዓሳ ዬያ ዑኡዞ ዋይዛዖ ዒኢካ ማዺንታ ባኮ ዛጋኒ ዲርጊ ሙኬኔ። ዬሱሴ ጉሙርቂ ዔኬ ዓማኖ ዓሳ ፆኦሲኮ ዲቃሢ ሄርሺሳ ማዾ ዼጊዲ ኬኤዛሢ ዬይ ዓሳ ዋይዛዖ ፔ ዻንጎና ዻንጎና ዔያታ ዋዛያ ማዔሢሮ ዲቃቲ ሄርሼኔ።

ፔቴ ፔቴ ዓሳ ጋዓንቴ “ሃይ ዬሱሴ ጊንፆ ሃንታ ዓሳ ዣኣሽኬኔ” ጌይ ዾንኮ ዓርቄኔ። ጴፂሮሴያ ዔቂ ዬያ ዓሶም ማሃዖ፥ “ዔዛታ ዋይዙዋቴ! ሃይ ዓሳ ዣዣሽኪባኣሴ! ፆኦሲ ፔ ማሊፆ ኬኤዛ ዒዩዔኤሌ ዛሎና ‘ጋፒንፆ ዎዶይዳ ታ ዓያኖ ዓሶ ዑፃ ታኣኒ ላኣላንዳኔ!’ ጌዔሢ ኩሞ ኩማኔ” ጌዔኔ።

“ዒንሢ ዔስራዔኤሌ ዓሲዮቴ! ዒንሢ ሃሢ ዛጌ ጎይፆ ጉዴያ፥ ጊንሣ ሃሣ ዔራ ጎይፆ ዬሱሴ ፆኦሲ ዎልቄና ዼቢ ዲቃሢ ሄርሺሳ ባኣዚንታ ማላታኣ ማዺ ዻዌ ዓሲኬ። ዒንሢ ጋዓንቴ ዒዛ ሱፂ ዎዼኔ!”

“ዬሱሴ ሃይቄቴያ ፆኦሲ ዒዛ ሃይባፓ ዔቂሴኔ። ዬይያ፦ ጌኤዦ ማፃኣፖይዳ “ኔኤኮ ጌኤዣሢ ኔኤኒ ዱኡፖይዳ ዎዒሲንዱዋሴ’ ጌይንቴሢኮ ኩሚፆኬ። ፆኦሲ ዬሱስ ኪሪስቶሴ ሼምፔና ዻቂ ዔቃንዳጉዲ ማሄሢኮ ኑ ማርካኬ።”

“ዬሱሴ ሃሢ ፆኦሲኮ ሚዛቆ ዛላ ቦንቺንቲ ዴዔኔ፤ ጊንሣ ሃሣ ዒዚ ሃጊ ማዓ ዎዛ ዒንጌ ጎይፆና ዓያኖ ጌኤዦ ዳኬኔ። ሃሢ ሃይ ዒንሢ ዛጋ ባኮንታ ዋይዛ ባኮንታ ዬይ ዓያኖ ጌኤዣ ማዻያኬ።

“ዬያ ዬሱሴ ዒንሢ ሱፄኔ፤ ጋዓንቴ ፆኦሲ ዒዛ ጎዳቲ፥ ጊንሣ ሃሣ ካኣቱሞም ዶኦሚንቴያ (ሜሲሄ) ማሄሢ ዔሩዋቴ!”

ጴፂሮሴ ዬያ ጋዓሢ ዋይዛ ዓሳ ቢያ ዒኔ ሜቃዖ ጴፂሮሴንታ ዒዛኮ ላጎንሢንታ ኮራ፥ “ዒሾንሢዮቴ፤ ኑ ሃሢ ዓካሪ ዎዎይቶንዶይ?” ጌይ ዖኦጬኔ።

ዬያሮ ጴፂሮሴ ማሃዖ፥ “ፆኦሲ ዒንሢኮ ጎሞ ዓቶም ጋዓንዳጉዲ ፔቴ ፔቴሢ ጎሞ ዒንሢኮ ቡኡፂ ዋኣፆና ማስቱዋሴ፤ ዬካፓ ዒዚ ዓያኖ ጌኤዦ ዒንጊፆ ዒንሢም ዳካንዳኔ” ጌዔኔ።

ጴፂሮሴ ዬያ ኬኤዜሢሮ ሃይሦ ሺያ ማዓ ዓሲ ጎኔኬ ጌይ ዬሱሴ ጉሙርቂ ዒዛ ጊንፆ ሃንታያ ማዔኔ፤ ዋኣፆናኣ ማስቲ ዬሩሳላሜይዳ ዓኣ ሺኢጲፆ ማኣሮ ዓሶ ባኣኮ ጌሌኔ።

ዬሱሴ ጊንፆ ሃንታያ ማዔዞንሢያ ዒማና ቢያ ኬሊ ፆኦሲ ማዾም ዳኪንቴዞንሢ ኬኤዛ ባኮ ዋይዛኔ፤ ሚርጌ ዎዴያ ዎላ ዓኣሤኔ፥ ሙኡዚያ ዎላ ሙዔኔ፥ ፔቴይ ባጋሢም ሺኢቂ ሺኢቂ ዎሊ ዶዲሼኔ። ዎላ ማዒ ፆኦሲያ ጋላታኔ፥ ዓኣ ባኮዋ ቢያ ዎሊም ጊሽካኔ። ዬያሮ ዓሲ ቢያ ዔያቶም ኮሺ ማሊሢ ማላሢሮ ኬላ ኬላ ዺቢ ዓሲ ዬሱሴ ጉሙርቂ ዔኪ ዔያቶይዳ ቃሲንታኔ።