42. ዬሱሴ ጫሪንጮ ማዒ ዴንዴሢ

ዬሱሴ ሃይቦ ባሺ ዔቄ ኬሎና ዬሱሴኮ ጊንፆ ሃንታ ላምዖስኬንሢ ዬሩሳላሜኮ ዑኬ ዓኣ ዔማዎሴ ጌይንታ ካታማስኬኖ ዴንዴኔ። ዔያታ ጎይፆ ዴንዲፆይዳ ዓኣዖ ዬሱሴይዳ ማዺንቴ ባኮ ዛሎ ጌስቲ ጌስቲ ዓኣዼኔ። ዔያታ ጌስታ ባካ፥ “ዬሱሴ (ሜሲሄ) ዒስራዔኤሌ ዓውሳኒ ሙኬ ካኣቲኬ ጌይ ኑ ጉሙቂናኣኮኬ፤ ጋዓንቴ ሱፂ ዒዛ ዎዾናኔ። ጊንሣ ሃሣ ላኣሎንሢ ዻቂ ሼምፔና ዓኣያ ማዔሢ ኬኤዜኔ” ጋዓያኬ። ጋዓንቴ ዬንሢ ዬሱሴ ጊንፆ ሃንታ ላምዖንሢ ዔያታ ጉሙርቃ ባኮ ዛሎ ኮሺ ዔሪባኣያኬ።

ዬሱሴ ዒማና ዔያቶና ዎላ ማዒ ጎይፆ ዴንዴኔ፤ ዔያታ ጋዓንቴ ዒዛ ማዒፆ ዔሪባኣሴ። ዬሱሴ ዔያታ ዓይጎ ዛላ ጌስታቴያ ዔያቶ ዖኦጫዛ ዻካ ኬሊኮ ቤርታ ዬሱሴይዳ ማዺንቴ ባኮ ዛሎንታ ዲቃሢ ሄርሺሳያ ማዔ ባኮ ዛሎ ዔያታ ኬኤዜኔ። ዔያታ ዒማና “ሃይ ዓሢ ማዺንቴ ባኮ ዋይዚባኣ ሾኦቺ ዓሲ ዻባዓ” ጌይ ማሌኔ።

ዬካፓ ዬሱሴ ካኣቱሞም ዶኦሞናሢ ዛሎ ጌኤዦ ማፃኣፖይዳ ቤርታዺ ኬኤዚንቴ ባኮ ፓይዲ ፓይዲ ኬኤዜኔ። ዬይ ካኣቱሞም ዶኦሞናሢ ሜቶ ዔካንዳሢንታ ዎዺንታንዳሢ፥ ጋዓንቴ ሃይሣሳ ኬሎና ሃይባፓ ዔቃንዳሢ ዛሎ ፆኦሲ ማሊፆ ኬኤዛ ዓሳ ጌዔ ባኮ ጶቂሢ ዔያቶም ኬኤዜኔ። ዬንሢ ዬሱሴ ጊንፆ ሃንታ ላምዖንሢ ሳዓ ሃባርቲ ባይቃንቴ ዔያታ ዴንዳ ካታሜሎ ሄላዖ ዎርቃኒ ፔቴ ኬኤሢ ጌሌኔ።

ዬንሢ ላምዖንሢ ዬሱሴ ዔያቶና ዎላ ዎርቃንዳጉዲ ዖኦጬም ዒዚያ ዔኤዔኔ። ዬካፓ ዔያታ ካዎ ሙዓኒ ጊኢጊንቲ ዓኣንቴ ዬሱሴ ካሦ ዔካዖ ፆኦሲ ጋላቲ ቡንፄኔ። ዔያታ ቤዞማና ዬይ ዬሱሴ ማዔሢ ዔሬኔ። ጋዓንቴ ዒዚ ዔያቶኮ ዓኣፓፓ ዓኣሺንቴኔ።

ዬንሢ ላምዖንሢ፥ “ዔዛይ ሃይ ዬሱሴኬ! ዎንዴ ዒ ፆኦሲ ቃኣሎ ኑም ፔጋሲ ኬኤዛኣና ዒና ኑኡኮ ታሚጉዲ ዔኤቴሢ ዬያሮኬ ጌይሢኬ!” ጌዔኔ። ዬካፓ ዔያታ ኔጉዋዖ ዬሩሳላሜ ካታሞ ማዒ ዴንዴኔ። ዒኢካ ዔያታ ሄላዖ ዔያቶኮ ላጎንሢም፥ “ዬሱሴ ዻቂ ሼምፔና ዓኣንቴ ኑ ዴንቄኔ!” ጌዒ ኬኤዜኔ።

ዬያ ዛሎ ዬሱሴኮ ጊንፆ ሃንታዞንሢ ጌስቲፆይዳ ዓኣንቴ ዬሱሴ ዔያታ ዓኣ ኬኤፆ ጌሊ ባኣካ ዔቂ ጴዻዖ፥ “ኮሺ ዒንሢም ማጎንጎ!” ጌዔኔ። ዬሱሴኮ ጊንፆ ሃንታዞንሢም ጋዓንቴ ዬይ ዔኤዤ ማሌኔ። ዬሱሴ ጋዓንቴ “ዓይጋ ዒንሢ ዒጊጪ ዓልታይ? ቶኮንታ ኩጮንታ ታኣኮ ዛጉዋቴ! ዔኤዤኮ ታጉዲ ጴዺ ዓርቂንታ ዑሢ ባኣሴ” ጌዔኔ። ዬካፓ ዔኤዤ ማዒባኣያ ማዒፆ ዔርዛኒ ካሣ ዒንጋንዳጉዲ ዔያቶ ዖኦጬም ሞሎ ሚቺሢ ዔያታ ዒዛም ዒንጋዛ ሙዔኔ።

ዬሱሴ ዒማና፥ “ጌኤዦ ማፃኣፖይዳ ታ ዛሎ ኬኤዚንቴ ባካ ቢያ ማዺንቲ ኩማኒ ኮይሳሢ ታ ዒንሢም ቤርታዺ ኬኤዚናኣኮኬ” ጌዔኔ። ዬያሮ ዔያታ ፆኦሲ ቃኣሎ ማሊ ጶቂሢ ዔራንዳጉዲ ዒኖ ዔያቶኮ ዒ ቡሌኔ። ሃሢ ዒዚ “ካኣቱሞም ዶኦሞናሢ ሜቶ ዔካንዳያ ማዒፆ፥ ሃይቃንዳሢ፥ ሃይሣሳ ኬሎና ሃይቦ ባሺ ዔቃንዳሢ ሚርጌ ሌዔኮ ቤርታ ፃኣፒንቴኔ” ጌዔኔ።

“ጊንሣ ሃሣ ዓሲ ቢያ ጎሜፓ ጌኤሽካኒ ጎሞ ፔኤኮ ቡኡፃንዳያ ኮይሳያ ማዒፆ ዛሎ ታ ጊንፆ ሃንታዞንሢ ኬኤዛንዳጉዲ ጌኤዦ ማፃኣፖይዳ ዓይሢንቴኔ። ዔያታ ዬሩሳላሜፓ ዓርቃዖ ዴንዲ ዓጪ ዴሬም ቢያ ዬያ ሃይሶ ኬኤዛንዳኔ፤ ዒንሢያ ታኣኮ ማርኮኬ።”

ዬካፓ ዴንዲ ዖይዲታሚ ኬሊ ሄላንዳኣና ዬሱሴ ሚርጌ ማይንቲ ዒዛኮ ጊንፆ ሃንታዞንሢም ፔጋዺ ጴዼኔ። ፔቴና ዶንጎ ፄኤታፓ ዑሣ ማዓ ዓሲም ፔቴና ጴዼኔ፤ ዒዚ ሃይባፓ ዔቂ ሼምፔና ዓኣያ ማዒፆ ሚርጌ ጎይሢና ጎናሴኔ፤ ፆኦሲ ካኣቱሞ ዛሎዋ ሚርጌ ባኣዚ ኬኤዚ ዔርዜኔ።

ዬሱሴ ዒዛኮ ጊንፆ ሃንታዞንሢም፥ “ቢታንቶ ቢያ ጫሪንጮና ሳዖናይዳ ታኣም ዒንጊንቴኔ፤ ዬያሮ ዴንዲጋፓ ዓጪ ዴሬ ቢያ ዓዶ፥ ናዖ፥ ዓያኖ ጌኤዦ ሱንፆና ዋኣሣ ማስኪ ማስኪ፤ ታ ዒንሢ ዓይሤ ባኮዋ ቢያ ኬኤዚ ዔርዚ ዔርዚ ማዺያ ዔያታ ኩንሣንዳንጉዲ ዓይሢ ታ ዓሲ ማሁዋቴ። ታኣኒ ዴንዲ ዓጮኮ ጋፖ ሄላንዳኣና ዒንሢና ዎላ ማዓንዳሢ ማሊ ጶቂሡዋቴ” ጌዔኔ።

ዬሱሴ ሃይባፓ ዔቄሢኮ ዖይዲታሚ ኬሊኮ ጊንፃ ዒዛኮ ጊንፆ ሃንታዞንሢም፥ “ዓያና ጌኤሺ ዒንሢዳ ዬዔም ታ ዓዴ ዎልቄ ዒንሢም ዒንጋንዳያ ሄላንዳኣና ዬሩሳላሜይዳ ዴዑዋቴ” ጌዔኔ። ዬካፓ ዬሱሴ ሌካ ጫሪንጮ ዓኣዼኔ፤ ሻኣሬያ ዔያቶኮ ዓኣፓፓ ዒዛ ዓኣቼኔ። ዬያይዲ ዬሱሴ ማዢንቲ ቢያ ፔ ቢታንቶና ዎይሣኒ ፔ ዓዶኮ ሚዛቆ ዛላ ዴዔኔ።