41. ፆኦሲ ዬሱሴ ሃይባፓ ዔቂሴሢ

ዬሱሴ ያዺዲ ሃይቂ ዱኡቴስካፓ ዬሱሴ ጉሙቂባኣ ዓይሁዶ ሱኡጋ ጲላፆሴ ኮራ፥ “ዬይ ሉኡዙሞ ዓዴ፥ ዬሱሴ፡ ‘ሃይሦ ኬሊኮ ጊንፃፓ ታኣኒ ሃይባፓ ዔቃንዳኔ’ ጌዔኔ። ዓካሪ ሃሢ ዒዛኮ ጊንፆ ሃንታዞንሢ ሌዞ ዒዛኮ ዉኡቂ ዔካዖ ‘ዒ ሃይቢ ባሺ ዔቄኔ’ ጌይ ጌሹዋጉዲ ዖልዚ ዓሲ ዱኡፖ ካፓንዳያ ኮይሳኔ” ጌዔኔ።

ጲላፆሴ ዒማና፥ “ዻካ ዛላ ዖልዚ ዓሲ ዔኪጋፓ ዱኡፖ ካፒሱዋቴራ” ጌዔኔ። ዬያሮ ዔያታ ዱኡፖ ካሮ ዎዾና ሹጮይዳ ‘ቡሉንቶፓ’ ጋዓ ማላታ ዓይሢ፥ ዖኦኒያ ሌዞ ዉኡቁዋጉዲ ዖልዚ ዓሲና ካፒሴኔ።

ዬሱሴ ሱፂንቴ ኬሎ ሄሊ ዓኣ ኬላ ዓይሁዶኮ ሃውሾ ኬሎታሢሮ ዓይሁዳ ዬኖ ኬሎ ዱኡፒ ቤሲ ዴንዳንዳጉዲ ዓይሢንቴያቱዋሴ። ዬያሮ ሃውሾ ኬላ ጋጋፓዛ ጉቴ ዹቡርታ ላኣሊስኬንሢ ሳውቃ ቲሺ ሌዞይዳ ፑኡካኒ ዬሱሴኮ ዱኡፖ ቤዞ ዴንዴኔ።

ዒማና ዔርቲባኣንቴ ዶዲ ሳዓ ዓጊፂሢ ሙኪ ሳዖ ዓጊሤኔ። ዜኤሊንሢጉዲ ፖፖዓ ኪኢታንቾዋ ጫሪንጫፓ ኬዲ ጴዻዖ ዱኡፖ ካሮ ዎዾና ዼኤፖ ሹጮ ኮላሲ ዑፃ ኬስኪ ዴዔኔ። ዬያ ዱኡፖ ካፓ ዖሎ ዓሳኣ ሚርጌና ዲቃታዖ ሃይቄ ዓሲጉዲ ሳዓ ሎኦሜኔ።

ላኣሎንሢ ዱኡፖ ቤዞ ሄላዛ ኪኢታንቻሢ፥ “ዲቃቲፖቴ! ዬሱሴ ሃይካ ባኣሴ፤ ቤርታ ዒ ጌዔ ጎይፆማ ሃይፓባ ዔቄኔ! ዱኡፖ ሃኣዛጉዋቴ!” ጌዔኔ። ላኣሎንሢያ ዱኡፖ ዔቶ ሂርኪ ጌይ ዛጋንቴ ዬሱሴኮ ሌዛ ዓሳ ላይሤ ቤዛ ባኣሴ።

ዬካፓ ሃሣ ኪኢታንቻሢ ላኣሎንሢም፥ “ሃሢ ዴንዲጋፓ ‘ዬሱሴ ሃይቦ ባሺ ዔቄኔ፥ ዒዚ ዒንሢ ቢሪ ጌሊላ ዴንዳንዳኔ’ ጌይ ዒዛኮ ጊንፆ ሃንታዞንሢም ኬኤዙዋቴ” ጌዔኔ።

ላኣሎንሢ ሚርጌ ዒጊቹሞይዳ ጌሌኔ፤ ጊንሣ ዎዛዺያ ዎዛዼኔ። ዬያሮ ዬያ ኮዦ ሃይሶ ኬኤዛኒ ዬሱሴኮ ጊንፆ ሃንታዞንሢ ኮራ ጳሽኬኔ።

ዬንሢ ላኣሎንሢ ዬያ ኮዦ ሃይሶ ኬኤዚፆሮ ዴንዲፆይዳ ዓኣንቴ ዬሱሴ ፔኤሮ ዔያቶም ፔጋዺ ጴዻዛ ዔያታ ዒዛም ዚጌኔ። ዬሱሴያ ዔያቶም፥ “ዲቃቲፖቴ፤ ጌሊላ ዴንዳንዳጉዲ ታ ጊንፆ ሃንታዞንሢም ኬኤዙዋቴ፤ ዒኢካ ዔያታ ታና ዴንቃንዳኔ” ጌዔኔ።