40. ዬሱሴኮ ሱፂንቶ

ሮሜ ዖሎ ዓሳ ዬሱሴ ያዺዲ ቦሂ ዓማሌስካፓ ሱፃኒ ዔኪ ዴንዴኔ። ዒዛ ሱፆንዶ ሚፆዋ (ማስቃሎ) ዬሱሴ ኬዲሴኔ።

ዖሎ ዓሳ ዬሱሴ ዔኪ፥ “ቶኦኪ ሜጌሢ” ጌይንታ ቤሲ ሄሊሳዖ ኩጮንታ ቶኮንታ ማስቃሎይዳ ዼኤፒ ሚስማሬና ዓይሢ ጳርቄኔ። ዬሱሴ ጋዓንቴ ዒማና፥ “ታ ዓዴ፤ ዔያታ ማዻ ባኮ ዔሩዋኣሢሮ ዓቶም ጌዔ” ጌኤኔ። ጲላፆሴያ ማላታ ማዓንዳጉዲ “ዓይሁዴ ካኣቲ” ጋዓያ ፃኣፒሲ ዬሱሴ ሱፂንቴ ሚፆኮ ቶኦካ ጌሢሴኔ።

ዬካፓ ዖሎ ዓሳ ዬሱሴኮ ዓፒሎ ዔካንዳሢ ዱማሲሢሮ ዎሊም ዒፃ ዓጌኔ። ዬያ ዔያታ ማዼሢ፥ “ታኣኮ ማኣዓሢ ዔያታ ጊሽቴኔ፤ ማኣዓሢ ዔኮሮ ዒፃ ዓጌኔ” ጌይንቲ ኬኤዚንቴሢኮ ኩሚፆ ማዔኔ።

ዬሱሴ ዬካፓ ላምዖ ሱላኮ ባኣካ ዎላ ሱፂንቴኔ። ፔቴሢ ዬሱሴ ቦሂ ጌስታዛ፥ ባጋሢ ጋዓንቴ፥ “ኔኤኒ ፆኦሲ ዒጊጩዋዓዳ? ኑ ኑ ዻቢንቲናኬ፤ ሃይ ዓሢ ጋዓንቴ ዻቤ ባኣዚ ባኣዖኬ” ጋዓዖ ዬሱሴ ኮራ፥ “ሃዳራ ኔ ካኣቱሞይዳ ታኣም ማሌ” ጌዔኔ። ዬሱሴያ “ሃኖ ኮዦ ቤዞ ጌኔቴይዳ ኔ ታኣና ዎላኬ” ጌዔኔ።

ዓይሁዶ ዓሶ ሱኡጎንታ ዴሮ ባኣኮይዳ ዓኣ ዓሳኣ ዬሱሴ ቦሂ፥ “ሂንዳ ኔ ጎኔ ፆኦሲ ናይታቴ ማስቃላፓ ኬዲ ኔና ዓውሴ! ኔና ኑ ጉሙርቆም” ጌይ ጌይ ሚኢጬኔ።

ዒማና ዓባ ሳዛ ማዒ ዓኣዖ ዴንዲ ማሢ ዶምቦልሳ ዎዴ ሄላንዳኣና ሳዓ ዹሜኔ።

ዬካፓ ዬሱሴ፥ “ኩሜኔ! ጎዳሢዮ፤ ታ ሼምፓሢ ታ ኔ ኩጫ ዓኣሢ ዒንጋኔ” ጌይ ዒላቴኔ። ያዺዴስካፓ ፔ ቶኦኮ ሊካ ሱሊሲ ሃይቄኔ። ዒማና ሳዓ ዓጊፄሢሮ ጌኤዦ ማኣሮይዳ ፆኦሲ ዴዓ ቤዞ ጌይንታ ቤዞ ዴሮፓ ዱማሳ፥ ዼኤፖ ጎኦቦ ዓፒላ ሎፓ ሉ ሄላንዳኣና ሄኮ ዳርዔኔ።

ዬሱሴ ዬያይዲ ፔኤኮ ሃይቦና ዓሲ ፆኦሲ ባንሢ ሙካንዳጉዲ ጎይሢ ቡሌኔ። ዒኢካ ዔቂ ዬሱሴ ካፓ ፔቴ ዖልዚ ዓሲስኬይ ዬያ ማዺንቴ ባኮ ዛጋዖ፥ “ሃያ ዓሢኮ ጎኔ ጎሜ ባኣያ ፆኦሲ ናይኬ” ጌዔኔ።

ዬሱሴ ካኣቱሞም ዶኦሚንቴያ (ሜሲሄ) ማዔሢ ጎናሲ ጉሙርቂ ዔኬ፥ ላምዖ ዓይሁዴ ሱኡጌ፥ ዮሴፔና ኒቆዲሞሴ ጎዖስኬንሢ ዬሱሴኮ ሌዞ ዔያቶም ዒንጋንዳጉዲ ጲላፆሴ ኮይላ ሺኢቄኔ። ጲላፆሴያ ዔካንዳጉዲ ዓይሣዛ ሌዞ ዔያታ ማስቃላፓ ኬይሲ ሱኡዳዖ ላሌ ቆኦቂ ቦኦኮና ዔቴይዳ ዱኡኬኔ። ዬካፓ ዱኡፖ ካሮ ዼኤፒ ሹቺ ኮላሲ ዎዼኔ።