39. ዬሱሴ ዎጎ ዎጋ ዓሶ ቤርቶ ሺኢኬሢ

ዬማና ሳዓ ጊዲሚሺ ማዔኔ። ዒዛኮ ዻቢንቶ ዖኦጫንዳጉዲ ዬሱሴ ዓርቄ ዓሳ ቄኤሶኮ ቢያ ሱኡጋሢ ማኣሪ ዔኪ ዴንዴኔ። ጴፂሮሴ ዒማና ሃኬና ጊንፆ ጊንፆ ሙካኔ፤ ዬሱሴ ዓሳ ዔኪ ዲሮ ጋሮ ጌልዛዛ ዬሱሴ ዙሎይዳ ታሚ ካሽታ ዓሲና ዎላ ታሞ ካሽቴኔ።

ዬያ ቄኤሳሢ ኬኤፆይዳ ዓይሁዶ ሱኡጋ ዬሱሴ ዑፃ ዎጊሳኒ ዎጎ ዎጎ ቤዞ ሺኢሼኔ። ዒዛይዳ ዒማና ሉኡዙሞና ማርካዻንዳ ዓሲ ሚርጌ ዔያታ ዔኪ ዬዔኔ። ያዺ ማዔቴያ ሃይሳ ዔያቶኮ ዎሊ ዔኪባኣሴ፤ ዬያሮ ዓይሁዶ ሱኡጋ ዓይጎ ጎይሢናኣ ማዖም ዬሱሴ ዻቢንቴያ ማሃኒ ዳንዳዒባኣሴ።

ጋፒንፆይዳ ቄኤሶ ቢያኮ ዑፃሢ ጊዥ ጌይ ዬሱሴ ዛጋዖ፥ “ሂንዳ ኑም ኬኤዜ፤ ኔኤኒ ካኣቱሞም ዶኦሞናሢ (ሜሲሄ)፥ ናንጊና ናንጋ ፆኦዛሢ ናኣዚዳ?” ጌዔኔ።

ዬሱሴያ፥ “ሂዮ ታናኬ፤ ዬያ ሌሊቱዋንቴ ታኣኒ ጫሪንጮይዳ ፆኦሲና ዎላ ዴዒ፥ ዬካፓኣ ታ ሙካንቴ ኔ ዛጋንዳኔ” ጌዔኔ። ዬያሮ ቄኤሶኮ ዑፃሢ ማኣዓሢ ፔኤኮ ዻጋዺ ዳርዛዖ ሃንጎ ዓይሁዶ ካኣዦ ሱኡጎ ባንሢ ዛጊ ዛጊ፥ “ሜሌ ማርካ ማይ ኮይሱዋሴ! ‘ታኣኒ ፆኦሲ ናይኬ’ ጌዔሢ ዒንሢ ዋይዚባይ! ዒንሢ ዎማይዲ ዎጋኒ ጋዓይ?” ጌይ ዒላቴኔ።

ዓይሁዶ ሱኡጋ ቢያ፥ “ሃይቢ ዒዛም ኮይሳኔ!” ጌዒ ቄኤሶ ዑፃሢም ኬኤዜኔ። ዬካፓ ዬሱሴኮ ዓኣፖ ዔያታ ዓፒላና ቱኬኔ፤ ጩቺያ ጩቲ፥ ጳዺያ ጳርቂ፥ ሚኢጪ ሚኢጪ ዓማሌኔ።

ጴፂሮሴ ዒማና ዲሮ ዙላ ካፒፆይዳ ዓኣንቴ ዓሲም ማዾ ማዻ ፔቴ ዉዱሮ ናይስኬና ዒዛ ዴንቃዖ፥ “ኔኤኒያ ዬሱሴና ዎላ ዓኣያኬ!” ጌዔኔ። ጴፂሮሴ ጋዓንቴ “ኔ ጋዓ ዓሢ ታ ዔሩዋሴ” ጌዔኔ። ዬካፓ ሃሣ ሜሌ ማዾ ማዻስኬና ጴፂሮሴ ኮራ ዒማዺ ጌዔኔ፤ ጋዓንቴ ዒ “ታ ዒዛ ዔሩዋሴ ጎዖዛ ዋይዙዋይ!” ጌዔኔ። ጋፒንፆይዳ ዒኢካ ዔቂ ታሞ ካሽታ ዓሳ፥ “ዒንሢ ቢያ ጌሊላፓ ሙኬ ዓሲታሢሮ ዬሱሴና ዎላ ዓኣያታሢ ኑ ዔራኔ” ጌዔኔ።

ዬካፓ ጴፂሮሴ፥ “ሃያ ዓሢ ጎኔ ታ ዔራ ዓሲታዖ ጋዓቴ ‘ፆኦሲ ታና ባይዞም!’ ” ጌይ ጫኣቂሢ ዓርቄኔ። ዒማና ኔጉዋዖ ኮይዳ ቂኢቄኔ፤ ዬሱሴያ ሺሪ ጴፂሮሴ ዛጌኔ።

ዬያሮ ጴፂሮሴ ዓሶፓ ዱማዺ ኬስካዖ ዒኔ ሜቂ ዬኤኬኔ። ዬሱሴ ዓኣሢ ዒንጌ፥ ዪሁዳኣ ዓሳ ዬሱሴ ሃይቃንዳጉዲ ጌስቲ ኩንሤሢ ዴንቃዖ ሚርጌና ዖዪ ዴንዲ ፔና ሱፂ ዎዼኔ።

ዓይሁዶ ሱኡጋ ዚሮ ጉቴሎ ሚኢሪ ዔቂ ዬሱሴ ዔካዖ ሮሜ ዓጮ ዎይሣ ጲላፆሴ ቤርቶ ሺኢሼኔ። ዔያታ ዒማና ጲላፆሴ ዒዛይዳ ዻቢንቲ ዴንቂ ‘ሃይቆም’ ዎጋንዳኔ ጌይ ጉሙርቄኔ። ጲላፆሴያ ዬሱሴ ኮራ፥ “ኔኤኒ ዓይሁዶ ካኣቲዳ?” ጌዒ ዖኦጬኔ።

ዬሱሴ ማሃዖ፥ “ኔ ጌዔሢጉዴያኬ፤ ጋዓንቴ ታኣኮ ካኣቱማ ሃያ ሳዖይዳ ዓኣ ካኣቱሞጉዲቱዋሴ። ያዺ ዎንዴ ማዔያታቴ ታኣኮ ዖሎ ዓሳ ሙኪ ዖልቴያ ናንዳንቴኬ። ታኣኒ ፆኦሲ ዛሎ ጎኑሞ ማርካዻኒ ሃያ ሳዖ ሙኬኔ። ጎኑሞ ናሽካሢ ቢያ ታ ጋዓሢ ዋይዛንዳኔ” ጌዔኔ። ጲላፆሴያ፥ “ጎኑሞ ጌይፃ ዎዚ ጌይሢዳይ?” ጌዔኔ።

ጲላፆሴ ዬሱሴና ዎላ ጌስቴስካፓ ዴሮ ባንሢ ኬስካዖ፥ “ሃያ ዓሢዳ ፔቴታዖ ዻቢንቲ ታ ዴንቂባኣሴ” ጌዔኔ። ዓይሁዶ ሱኡጎንታ ዴሮንታ ጋዓንቴ፥ “ሱፄ! ዒዛ ሱሱፄ!” ጌይ ዒላቴኔ። ጲላፆሴያ “ዻቢንቴ ባኣዚ ባኣንቴሞ!” ጌዔኔ። ዔያታ ጋዓንቴ ዒላቶ ዺቢሼኔ፤ ጲላፆሴ ሃይሣሲ፥ “ዒ ዻቤ ባኣዚ ባኣሴ!” ጌዔኔ።

ጲላፆሴ ዒማና ዴራ ዣሊ ፑርታ ማዾይዳ ጌላንዳኔ ጌይ ዒጊጬኔ፤ ዬያሮ ዖሎ ዓሳ ዔኪ ዓኣዺ ዬሱሴ ሱፃንዳጉዲ ዓይሤኔ። ሮሜ ዓጮ ዖሎ ዓሳኣ ዬሱሴ ጳርቃዖ ዲንኪ ዞቄ ማኣዖ ማይሴኔ፤ ዬያጉዲ ዓንጊሢያ ካኣቶ ቶኦካ ዓጎ ቦንቾ ባኮ ማሊሲ ማሪ ዒዛኮ ቶኦካ ዓጌኔ። ዬካፓ፥ “ሃይሾ ዓይሁዶ ካኣታሢ!” ጌይ ጌይ ሚኢጪ ዓማሌኔ።