3. ባይሲንታ ዋኣሢ

ሚርጌ ዎዴኮ ጊንፃ ሳዖይዳ ሚርጌ ዴሬ ሾይንቲ ዺቢ ናንጋያ ማዔኔ። ዬይ ዓሳ ሚርጌና ፑርታ፥ ሃሣ ዎልቃዻያኬ። ዓሲኮዋ ፑርቱማ ዺቢ ዺቢ ሙኬሢሮ ፆኦሲ ዓጮ ቢያ ዱኡኪ ባይዛንዳ ዋኣሢና ኩርሳኒ ማሊ ዔቄኔ።

ኖሄ ጌይንታ ዓሲስኬይ ጋዓንቴ ፆኦሲ ቤርታ ኮሺ ዓሲ ማዒ ጴዼኔ። ኖሄ ዬኖ ዎዶና ዓኣ ዓሶይዳፓ ቢያ ባሼ ፂሎ፥ ሃሣ ፑርቱሞ ማዾፓኣ ፔና ካፓያኬ። ፆኦሲ ሳዖይዳ ዳካኒ ማሌ ባይሲንቶ ዋኣፆ ዛሎ ኖሄም ኬኤዜኔ፤ ዼኤፒ ዋኣሢ ካኣሚሌያ ማዣንዳጉዲ ዒዛ ዓይሤኔ።

ኖሄ ዼኤፒ ዋኣሢ ካኣሚሌ (ማርካቤ) ማዣንዳጉዲ ፆኦሲ ዒዛም ኬኤዜኔ። ዬኖ ዋኣፆ ካኣሚሌሎኮ ዖዶሱማ 140፥ ጋሮ ዳልጉማ 23፥ ሌካ ዔጳ 13.5 ሜቲሬ ማዖንጎ ጌዔኔ። ኖሄ ማዤ ዋኣፆ ካኣሚሌላ ሚሢና ኮሺንቴያ፥ ሃይሦ ኩቤ ኬኤሲ ሌካ ዑፃ ዓኣያ፥ ዺቢ ቆልዓንታ ዑፃ ማኣሪንታ ፑልታ ካራኣ ዓኣያኬ። ፆኦሲ ዬኖ ካኣሚሌሎይዳ ኖሄ ፔናንታ ማኣሮ ዓሶንታ ዱማ ዱማ ቶኦኮ ቆልሞንታ ቦዖዋ ዒኢካ ጌልዚ ባይሲንቶ ዋኣፃፓ ቶሊሳንዳጉዲ ዓይሤኔ።

ኖሄያ ፆኦሲም ዓይሢንቲ፥ ዒ ጌዔ ጎይፆ ፔኤኮ ሃይሦ ናኣቶና ዎላ ዋኣፆ ካኣሚሎ ማዤኔ። ዬና ዋኣፆ ካኣሚላ ሚርጌና ዼኤፒታሢሮ ዔያታ ማዣኣና ዺቢ ዎዴ ዔኬኔ። ኖሄ ዬኖ ባይሲንቶ ዋኣፆ ዛሎ ዓሶም ላቲ ላቲ ኬኤዚ፥ ፆኦሲ ባንሢያ ማዓንዳጉዲ ኬኤዜንቴ ዔያታ ዒዛሲ ጎናሲ ዔኪባኣሴ።

ኖሄንታ ማኣሮ ዓሶንታ ዔያቶና ዱማ ዱማ ቆሎና ቦዖናም ዺቢ ዎዴኮ ጊዳንዳ ሙኡዚ ቡኩሳንዳጉዲ ፆኦሲ ዔያቶ ዓይሤኔ፤ ቢያ ባካ ጊኢጊንቲ ጋፔስካፓ ዋኣፆ ካኣሚሎ ጋሮ ጌሊፆ ዎዳ ሄሌሢያ ኖሄም፥ ኖሄ ማቾም፥ ሃይሦ ዓቲንቆ ናኣቶንታ ዔያቶኮ ማቾንሢንታም ፆኦሲ ኬኤዜኔ። ዬያሮ ዎሊ ዑፃ ሳሊ ዓሲ ዋኣፆ ካኣሚሎ ጋሮ ጌሌኔ።

ባይሲንቶ ዋኣፆይዳፓ ፔና ዓውሳንዳጉዲ ቢያ ቶኦኮ ቆልሞንታ ቦዖንታፓ ዓዴና ዒንዴና ማሂ ማሂ፥ ካፖዋ ዒማይዲ ኖሄ ኮይላ ፆኦሲ ዳኬኔ። ፆኦሲም ዒንጎ ባኣዚ ማዒ ሺኢካኒ ዳንዳዓ ላንካይ ባኣዚ ዓዴና ዒንዴና ማሂ ቢያ ቦዖንታ ቆልሞንታኮ ቶኦካፓ ቶኦካፓ ኖሄ ካኣሚሎይዳ ጌላንዳጉዲ ዳኬኔ። ጌላኒ ኮይሳ ባካ ቢያ ጌሊ ጋፔስካፓ ፆኦሲ ዋኣፆ ካኣሚሎኮ ካሮ ዙሊና ዎዼኔ።

ዬካፓ ዒራ ዋዾ ዓርቄኔ፤ ሻንቁዋ ዒርዚ ዋርቄ ጎይሣ ዖይዲታሚ ኬሊ ዋንቴና ሮኦሪና ጉቤ ዴዔኔ። ሊካ ሳዖ ዴማፓኣ ቱሮ ዹኡቂ ኬስካ ዋኣሢ ዓልቂሢ ዓርቄኔ። ዬያሮ ዓጪ ማዔ ካራና ጉቤ ዋኣፆና ዔኤዺንቴኔ፤ ዼኤፖ ዖዶዞ ዹካኣ ዓቱዋዖ ዋኣፆና ዱኡኪንቲ ባይቄኔ።

ዋኣፆ ካኣሚሎ ጋራ ዓኣ ዓሶንሢና ዱማ ዱማ ባኮንሢፓ ዓታዛ ሳዖይዳ ሼምፔና ዓኣ ባኣዚ ቢያ ሃይቂ ኩዴኔ። ዋኣፆ ካኣሚሌላ ጋዓንቴ ዋኣፆ ዑፃ ሼሌዒ ዴዒ ጋሮይዳ ዓኣ ሼምፔና ዓኣ ዓሶንሢንታ ባኮዋ ቢያ ዓይሴኔ (ዓውሴኔ)።

ዒራ ዋዾ ሃሼስካፓኣ ዋኣፆ ካኣሚላ ዶንጎ ዓጊኒ ጉቤ ዋኣፆ ዑፃ ሴካ ሃንጋ ጌዔኔ። ዬካፓ ዋኣፃ ታሢ ታሢ ሚጪ ኬዲሢ ዓርቄኔ። ፔቴ ኬሊ ዋኣፆ ካኣሚሌላ ዹካ ዑስካ ዴዔኔ፤ ያዺ ማዔቴያ ሳዓ ቢያ ዋኣፆና ዱኡኪንቲ ዓኣ ጎይሣኬ። ሃይሦ ዓጊኒኮ ጊንፃ ጋዓንቴ ዹኮኮ ቶኦካ ጴዺሢ ዓርቄኔ።

ዖይዲታሚ ኬሊኮ ጊንፃ ዋኣፃ ሳዓፓ ሚጬቴ ዛጎም ኖሄ ፔቴ ቁራኬ ኬሲ ዋኣፆ ካኣሚላፓ ዳኬኔ። ዬማ ቁራኮማ ሴካ ሃንጋ ባራኒ ሌሊ ባራናዖ ፃኣዺ ሳዓ ዴንቃኒ ዳንዳዒባኣሴ።

ዬካፓ ሃሣ ኖሄ ዶኦሌ ኬሲ ዳኬኔ፤ ጋዓንቴ ዴዓንዳ ቤሲ ዴንቂባኣሢሮ ማዒ ኖሄ ባንሢ ዋኣፆ ካኣሚሎ ሙኬኔ። ፔቴ ቃልሾ ኬሊኮ ጊንፃ ኖሄ ጊንሣ ማሂ ዶኦሌሎ ዳኬኔ። ዬካፓ ዬና ዶኦሌላ ሪሚቲ ዒላሺ ዻንጋ ዔኪ ማዒ ሙኬኔ። ዋኣፃኣ ሳዓፓ ሚጪ ሚጪ ዓኣሢሮ ዱማ ዱማ ቶኦኮ ሚፃ ባቃሊሢዳኬ።

ኖሄ ጊንሣ ሃሣ ፔቴ ቃልሾ ኬሊ ዴዓዖ ዶኦሌሎ ጊንሣ ሃይሣሲ ዳኬኔ። ዬካፓ ዶኦሌላ ዴዓንዳ ቤሲ ዴንቄሢሮ ማዒ ሙኪባኣሴ። ዋኣፆኮ ሚጪፃኣ ዔርቴኔ።

ያፓ ላምዖ ዓጊኒኮ ጊንፃ ፆኦሲ ኖሄም፥ “ኔናንታ ኔ ማኣሮ ዓሶንታ ቆልሞንታ ዱማ ዱማ ቦዓኣ ዋኣፆ ካኣሚላፓ ኬስኩዋቴ” ጌዔኔ። ዬያሮ ማኣሮ ዓሳ ዋኣፆ ካኣሚሎ ጋራፓ ኬስኬኔ። ዬካፓ ሚርጌ ናይንታ ናይኮዋ ናይ ሾይ ጊንሣ ሳዖ ኩሜኔ።

ኖሄ ዋኣፆ ካኣሚላፓ ኬስካዖ ፆኦሲም ዒንጎ ባኣዚ ዒንጎ ቤሲ ኮሺ፥ ዱማ ዱማ ቆሎንታ ቦዖንታይዳፓ ፆኦሲም ሹኪንቲ ሺኢካኒ ኮይሳ ባኮ ዒንጌኔ። ፆኦሲያ ዬያ ሺኢኬ ዒንጊፆና ዎዛዼኔ፤ ኖሄንታ ማኣሮ ዓሶዋ ዓንጄኔ።

ዬካፓ ፆኦሲ፥ “ዓሲ ማዻ ፑርቶ ባኮ ዛሎሮ ላሚ ሳዖ ታኣኒ ጋዳንቂንዱዋኣያ ማዒፆ ጫኣቃኔ። ዎዚ ዓሲ ሃጊ ሾሾይንቴማፓ ዓርቃዖ ጎሜ ማዻያ ማዔቴያ ሳዖ ታኣኒ ላሚ ሃያይዲ ዋኣሢና ባይዛዓኬ” ጌዔኔ።

ፆኦሲ ዬያ ጫኣቁሞኮ ማላታ ማዓንዳጉዲ ባራሪ ማዓ ዡኡሎ ማዤኔ። ዬካፓ ቢያ ዎዴ ዡኡሎ ጫሪንጫ ጴዻኔ። ፆኦሲ ዬያይዲ ዬያ ዡኡሎ ዛሎና ፔ ዴሮም ጫኣቄ ጫኣቁሞ ጶቂሣኔ።