38. ዬሱሴ ሃይቢም ዓኣሢ ዒንጊንቴሢ

ዓይሁዳ ሌዓ ሌዓ ዑሣ ዓኣዺፆ ቦንቾ ቦንቻኔ። ዬይ ቦንቻ ሚርጌ ሌዔኮ ቤርታ ፆኦሲ ዔያቶኮ ማዖንሢ ዎዲ ጊብፄ ዓጮ ዓይላቶ ናንጋፓ ኬሴቴያ ማሊ ቦንቾያኬ። ዬሱሴ ኮዦ ሃይሶ ኬኤዚፆና ዔርዚፆዋ ዓርቄንቴ ሃይሦ ሌዔ ማዓኣና ዬያ ዑሣ ዓኣዺፆ ቦንቾ ዬሩሳላሜይዳ ዒዛኮ ጊንፆ ሃንታዞንሢና ዎላ ቦንቻኒ ኮዔሢንታ ዒኢካ ዒዛ ዎዾንዶሢያ ኬኤዜኔ።

ዬሱሴኮ ጊንፆ ሃንታዞንሢፓ ፔቴሢ ዪሁዳ ጎዖያኬ። ዬይ ዪሁዳ ዬሱሴ ጊንፆ ሃንታዞንሢኮ ሚኢሾ ዓርቃያኬ፤ ጋዓንቴ ዒ ሚኢሼ ናሽካያ ማዔሢሮ ዺቢ ሚኢሼ ቃርፂታፓ ዉኡቂ ዉኡቂ ዔካኔ። ዬሱሴንታ ዒዛኮ ጊንፆ ሃንታዞንሢንታ ዬሩሳላሜ ሄላዛ ዪሁዳ ዓይሁዶኮ ካኣዦ ሱኡጎ ኮራ ዴንዲ ሚኢሼ ዔያታ ዒዛም ዒንጌቴ ዬሱሴ ዓኣሢ ዒንጋንዳሢ ጌስቲ ዔኤዔኔ። ዬያ ዒ ማዼሢ ዓይሁዶ ካኣዦ ሱኡጋ ዬሱሴ ካኣቱሞም ዶኦሚንቴያ (ሜሲሄ) ማዔሢ ጎኔኬ ጌይ ዔኮ ዒፂ ዎዻኒያ ኮዓሢ ዔሬሢሮኬ።

ዓይሁዶ ሱኡጋ ቄኤሶኮ ቢያ ዑፃሢ ዔያቶኮ ዓርና ማዔም ዬሱሴ ዓኣሢ ዒንጋንዳጉዲ ዪሁዳም ሃይሢታሚ ቢራ ጪጌኔ። ዬይያ ፆኦሲ ማሊፆ ኬኤዛ ዓሳ ቤርታዺ ኬኤዜ ጎይፆ ማዺንቴኔ። ዬያሮ ዪሁዳ ዔኤዒ ሚኢሾ ዔኪ ዴንዳዖ ዬሱሴ ዔያታ ዓርቃንዳጉዲ ዓኣሢ ዒንጋንዳ ጊኢጋ ካራ ኮይሢ ዓርቄኔ።

ዬሱሴ ዒዛኮ ጊንፆ ሃንታዞንሢና ዎላ ዬሩሳላሜይዳ ዑሣ ዓኣዺፆ ቦንቾ ሙዖ ሙይ ቦንቼኔ። ዬኖ ኬሎ ካሣ ዔኪ ቡንፃዖ፥ “ሃኣዛጉዋቴ ሙዑዋቴ፤ ሃይ ዒንሢም ዒንጊንታሢ ታናኬ፤ ዬያ ታና ማሊ ጶቂሣያ ማሂ ማዹዋቴ” ጌዔኔ። ያዺዲ ዬሱሴ ዓሲ ዛላ ሃይቃንዳሢ ኬኤዜኔ።

ዬካፓ ዬሱሴ ዑሽኮ ባኮ ዔካዖ፥ “ሃያ ዑሽኩዋቴ፤ ሃይ ሚርጌ ዓሶኮ ጎሞ ጌኤሻኒ ሾኦታንዳ ዓኪ ጫኣቁሞ ሱጉሢኬ። ዬያ ዒንሢ ዑሽካ ዎዶና ቢያ ታና ማሊ ጶቂሣያ ማዑዋቴ” ጌዔኔ።

ጊንሣ ሃሣ ዒዛ ጊንፆ ሃንታዞንሢም፥ “ዒንሢፓ ፔቴሢ ታና ሃይቃንዳጉዲ ዓኣሢ ዒንጋንዳኔ” ጌዔኔ። ዬያሮ ዒዛኮ ጊንፆ ሃንታዞንሢ ዲቃታዖ፥ “ዬያጉዴ ባኣዚ ዖ ማዻኒ ዳንዳዓይ?” ጌይ ዖኦጬኔ። ዬሱሴ ዒማና፥ “ሃያ ካሦ ታ ኩልሳሢኬ ታና ዓኣሢ ዒንጋሢ” ጋዓዖ ካሦ ዪሁዳ ኩልሴኔ።

ዪሁዳ ካሦ ኩኩኡላዛ ፃላሄ ዒዛይዳ ጌሌኔ፤ ዬያሮ ዓይሁዶ ሱኡጋ ዬሱሴ ዓርቃንዳ ጎይፆ ኬኤዛኒ ዴንዴኔ። ሳዓ ዒማና ዹሚኬ።

ዬሱሴና ዒዛኮ ጊንፆ ሃንታዞንሢና ካዋሢ ሙዔስካፓ ዛይቴ ሪሚቲ ዹካ ጎዖ ዹካ ዴንዴኔ። ዬሱሴ ጊንፆ ሃንታዞንሢም፥ “ሃኖ ዒባኒ ዒንሢ ቢያሢ ታና ሃሺ ዴንዳንዳኔ፤ ‘ቆልሞ ሄንቃሢ ታ ጳርቃንዳኔ፤ ማራታኣ ቢያ ዣኣላንዳኔ’ ጌይንቲ ጌኤዦ ማፃኣፖይዳ ፃኣፒንቴኔ” ጌዔኔ።

ጴፂሮሴ፥ “ሃንጎዋታ ኔና ቢያ ሃሺ ዴንዴቴያ ታ ኔና ማሊ ሃሺ ዴንዳዓኬ” ጌዔኔ። ዒማና ዬሱሴ ጴፂሮሴም፥ “ፃላሄ ዒንሢ ቢያሢ ፔ ዓሲ ማሃኒ ኮዓኔ፤ ጋዓንቴ ዋይዜ ጴፂሮሴ፡ ኔ ጉሙርፃ ሺኢቱዋጉዲ ታኣኒ ፆኦሲ ሺኢቄኔ። ያዺ ማዔቴያ ሃኖ ዒባኒ ኮይዳ ቂኢቃንዳሢኮ ቤርታ ሃይሢ ማይንቲ ኔኤኒ ‘ታ ዒዛ ዔሩዋሴ’ ጋዓንዳኔ” ጌዔኔ።

ዒማና ጊንሣ ጴፂሮሴ ዬሱሴም፥ “ሃይቂ ሃይቆቴያ ታ ኔና ‘ዔሩዋሴ’ ጋዓዓኬ” ጌዔኔ። ሃንዋታኣ ቢያ ዒማዺ ጌይሢ ዓርቄኔ።

ዬካፓ ዬሱሴ ዒዛ ጊንፆ ሃንታዞንሢና ዎላ ጌኤቴሴማኔ ጌይንታ ቤሲ ዴንዴኔ። ዒኢካ ዒዛኮ ጊንፆ ሃንታዞንሢም፥ “ዻቢሻኒ ጌሾ ጌሺሢዳ ዒንሢ ጌሉዋጉዲ ሺኢቁዋቴ” ጌዔኔ። ዬሱሴያ ፔኤሮ ሺኢቃኒ ዔያቶፓ ዱማዺ ዴንዴኔ።

ዬሱሴ ሃይሢ ማይንቲ ሺኢቄስካፓ፥ “ታ ዓዴ! ኔኤም ዳንዳዒንታቴ ሃያ ሜቶ ዑዦ ታ ቤርታፓ ሺኢሼ። ጋዓንቴ ዓሲኮ ጎሜ ዓቶም ጌይሢሮ ሃይ ማዺንታሢሮ ኔ ማሊፃ ኩሞንጎ” ጌዔኔ። ዬሱሴ ዒማና ሚርጌ ዲቃቴሢሮ ሱጉሢ ማላ ጮጋቺ ዒዛ ዑፃፓ ፆዻኔ። ፆኦሲ ዒዛ ዶዲሻንዳጉዲ ኪኢታንቻ ዳኬኔ።

ዬሱሴ ዬያ ሺኢጲፆ ቢያ ሺኢቂ ጋዓዖ ዒዛኮ ጊንፆ ሃንታዞንሢ ኮራ ማዒ ሙካንቴ ዔያታ ጊንዖይዳኬ። ሃይሣሶ ዒ ሙካዖ፥ “ዔቁዋቴ! ታና ዓኣሢ ዒንጋሢ ሃይሾ ሙኬኔ” ጌዔኔ።

ዓይሁዶ ሱኡጋ ዖልዚ ዓሲንታ ሚርጌ ዴሬናኣ ዎላ ሙኬኔ፤ ዬይ ዓሳ ኩጮይዳ ጬንቻ ዓራፖንታ ኮኦሎንታ ዔኪ ዓኣኔ። ዬካፓ ዪሁዳ ዬሱሴ ባንሢ ዶጫዖ፥ “ዔርዛሢዮ፤ ኮሹሞ ኔኤም ማዖንጎ” ጌዒ ሄርቄኔ። ዓይሁዶ ሱኡጎም ዒ ቤርታዺ ዬይ ኬኤዜ ማላቶኬ፤ ዬሱሴያ፥ “ዪሁዳ፡ ኔ ታና ሄርቂ ዓኣሢ ዒንጋንዳ!” ጌዔኔ።

ዖሎ ዓሳ ዬሱሴ ዓዓርቃዛ ጴፂሮሴ ፔ ዓራፖ ቱጋዖ ቄኤሶ ዑፃሢም ማዻ ዓይሌስኬያኮ ዋዮ ቆፂ ቲቄኔ። ዬሱሴ፥ “ዓራፖ ኔኤኮ ጎንጎና ማሂ ዳኬ! ታና ዓውሳኒ ዖሎም ሚርጌ ኪኢታንቾ ዳካንዳጉዲ ታ ዓዶ ታ ዖኦጫንዳያታዖኬ” ጌዔኔ። ዬካፓ ዬሱሴ ዬያ ዓሢኮ ዋዮ ጊንሣ ዓይሢ ፓፂሴኔ። ዬያይዲ ዬሱሴ ዓዺንቴስካፓ ዒዛኮ ጊንፆ ሃንታዞንሢ ጳሽኪ ፑኔኔ።