37. ዬሱሴ ዓላዜሬ ሃይባፓ ዔቂሴሢ

ፔቴ ኬሊ “ዓላዜሬ ሃይቃኒ ዑኪ ሃርጊንቴኔ” ጋዓ ኪኢታ ዬሱሴ ሄሌኔ። ዓላዜሬንታ ማርታና ማይራሞና ጌይንታ ዒዛኮ ጌሮንሢንታ ዬሱሴና ዎሊ ናሽካ ላጌኬ። ዬሱሴ ዬያ ኪኢቶ ዋይዛዖ፥ “ዬይ ሃርጋ ፆኦሲ ቦንቾ ፔጋሳያኬ፥ ዎዎዻያቱዋሴ” ጌዔኔ። ዬሱሴ ዒዛኮ ላጎ ማዔዞንሢ ሚርጌና ናሽካያ ማዔቴያ ኪኢቶ ዋይዜዖ ላምዖ ኬሊ ፔኤቄኔ።

ላምዖ ኬሊኮ ጊንፃ ዬሱሴ ዒዛኮ ጊንፆ ሃንታዞንሢም፥ “ኑ ዪሁዳ ዴንዶም” ጌዔኔ። ጊንፆ ሃንታዞንሢ ጋዓንቴ “ዔርዛሢዮ! ሃሢ ዑኬ ኬሊዳ ዒኢካ ዓኣ ዓይሁዶ ዓሳ ኔና ዎዻኒ ኮይባኣዓዳ!” ጌዔኔ። ዬሱሴ ጊንሣ ዔያቶም፥ “ኑ ላጋሢ ዓላዜሬ ጊንዔኔ፤ ጊንዓስካፓ ታ ዒዛ ጴቻኒ ዴንዳንዳኔ” ጌዔኔ።

ዬሱሴኮ ጊንፆ ሃንታዞንሢ፥ “ጎዳሢዮ፤ ዓላዜሬ ጊጊንዔቴ ማይ ፖዒስካይ!” ጌዔኔ። ዬያሮ ዬሱሴ ዔያቶም ፔጌና፥ “ዓላዜሬ ሃይቄኔ። ዒንሢ ታና ጉሙርቃንዳጉዲ ታኣኮ ዒኢካ ባኣያ ማዒፆና ታ ዎዛዼኔ” ጌዔኔ።

ዓላዜሬ ሾይንቴ ካታሞ ዬሱሴ ሄላኣና ዓላዜሬ ሃይቄንቴ ዖይዶ ኬሊ ኩሚናኣኮኬ። ማርታ ዬሱሴ ሞኦኪ ዔካኒ ኬስካዖ፥ “ጎዳሢዮ! ኔ ዎንዴ ሃይካ ዓኣቴ ታ ጌርሲ ሃይቃንዳ! ጋዓንቴ ሃሢያ ኔ ሺኢቃ ሺኢጲፆ ቢያ ፆኦሲ ዋይዛንዳሢ ታ ጉሙርቃኔ” ጌዔኔ።

ዬሱሴ ማሃዖ፥ “ሃይባፓ ዔቂሳሢንታ ሼምፔና ናንጊሻሢያ ታናኬ። ታና ጉሙርቃይ ቢያ ሃይቄቴያ ሼምፔና ናንጋንዳኔ፤ ታና ጉሙርቃይ ፔቴታዖ ሃይቁዋሴ፤ ዬያ ኔ ጉሙርቃ?” ጋዓዛ ማርታ፥ “ሂዮ ጎዳሢዮ! ጎኔኬ፤ ኔኤኒ ካኣቱሞም ዶኦሞናሢ (ሜሲሄ)፥ ፆኦሲ ናኣዚ ማዒፆ ታ ጉሙርቃኔ” ጌዔኔ።

ዬካፓ ማይራማ ሙካዖ ዬሱሴኮ ቶካ ሎኦሚ፥ “ጎዳሢዮ! ኔ ዎንዴ ሃይካ ዓኣቴ ታ ጌርሲ ሃይቂንዱዋንቴቱዋይ!” ጌዔኔ። ዬሱሴያ፥ “ዓላዜሬ ዒንሢ ዎካ ጌሤይ?” ጌይ ዖኦጬኔ። ዔያታ ዬሱሴም፥ “ዒ ዱኡኪንቴኔ፥ ሃኒ ሙኪ ዛጌ” ጌዔኔ። ዬካፓ ዬሱሴ ዬኤኬኔ።

ዒ ዱኡኪንቴሢ ዴኔ ዔቴይዳኬ፤ ካሮዋ ዼኤፒ ሹቺና ዎዾናኔ። ዬሱሴ ዬያ ዱኡፖ ቤዞ ሙካዖ “ሹጮ ኮላሲ ሺኢሹዋቴ” ጌዔኔ። ማርታ ጋዓንቴ፥ “ዓላዜሬ ሃይቄንቴ ሃኖ ዖይዶ ኬሊኬ፤ ሃሢ ማይ ዛዛዓንዳኔ” ጌዔኔ።

ዬሱሴ፥ “ኔ ታና ጉሙርቄቴ ፆኦሲ ቦንቾ ኔ ዛጋንዳሢ ታ ኔኤም ኬኤዚባኣዓዳ?” ጌዔኔ። ዬያሮ ዔያታ ሹጮ ዱኡፖ ካራፓ ኮላሲ ሺኢሼኔ።

ዬካፓ ፆኦሲ ጫሪንጮ ባንሢ ዛጋዖ፥ “ዓዴ! ኔ ታኣም ዋይዛንዳሢሮ ታ ኔና ጋላታኔ። ኔኤኒ ቢያ ዎዴ ታኣም ዋይዛሢያ ታ ዔራኔ፤ ጋዓንቴ ሃሢ ኔኤኒ ታና ዳኬሢ ሃይ ዴራ ጉሙርቃንዳጉዲ፥ ሃያ ዓሶ ዛሎ ታ ጋዓኔ” ጌዔኔ። ዬካፓ ዬሱሴ፥ “ዓላዜሬ፤ ሃኒ ኬስኬ!” ጌይ ዒላቴኔ።

ዬያሮ ዓላዜሬ ኬስኬኔ! ዒዛ ሱኡዳዖ ዓሳ ቱኬ ቱርጮና ዒ ቱኡቴ ጎይሣኬ ኬስኬሢ። ዬያሮ ዬሱሴ፥ “ቡሊ ሃሹዋቴ፥ ዒ ሃንቶም” ጌዔኔ። ዓይሁዶፓ ዺቢ ዓሲ ዬያ ፆኦሲ ዎልቆና ማዺንቴ ባኮ ዛሎና ዬሱሴ ጉሙርቂ ጎናሲ ዔኬኔ።

ጋዓንቴ ዓይሁዶ ካኣዦ ሱኡጋ ዬሱሴ ዒፂ ቂኢሬኔ፤ ዬያሮ ዬሱሴንታ ዓላዜሬንታ ቢያ ዎዻኒ ዞርቲሢሮ ቡኬኔ።