36. ዬሱሴኮ ዓውካሮ ላኣሚንቶ

1. ፔቴ ኬሊ ዬሱሴ ሃይሦ ዒዛኮ ጊንፆ ሃንታስኬንሢ፡ ጴፂሮሴ፥ ያይቆኦቤንታ ዮሃኒሴንታ ዔኪ ሺኢጲሢሮ ፔቴ ዹካ ኬስኬኔ። (ዮሃኒሴ ጌይንቴ ዬሱሴ ጊንፆ ሃንታሢ ዬሱሴ ዋኣፆና ማስኬ ዮሃኒሴቱዋሴ።”

ዬሱሴ ሺኢጲፆይዳ ዓኣንቴ ዓውካራ ዒዛኮ ላኣሚንቲ ዓቢጉዲ ፖዔኔ፤ ማኣዓሢያ ቦኦሪ፥ ሳዓይዳ ዓይጎ ዓሲያ ማኣዖ ማስኪ ጌኤሺ ቦኦሪሳያይዳፓ ባሼ ቦኦሬኔ።

ዒማና ሙሴና ዔኤሊያሴና ፔጋዺ ጴዼኔ። ዬያታ ዓሳ ፄኤታና ፓይዲንታ ሌዔኮ ቤርታ ሳዖይዳ ናንጌያኬ። ዬያታ ዓሳ ዬሱሴ ዬሩሳላሜይዳ ሃይቃንዳ ጎይፆ ዒዛና ጌስቴኔ።

ሙሴንታ ዔኤሊያሴንታ ዬሱሴና ዎላ ጌስታ ጎይሣ ዓኣንቴ ጴፂሮሴ ዬሱሴ ኮራ፥ “ኑ ሃይካ ናንጋቴ ኮሺኬ። ፔቴ ኔኤም፥ ፔቴ ሙሴም፥ ፔቴ ዔኤሊያሴም ሃይሦ ዉዲ ኑ ማዦም” ጌዔኔ። ጴፂሮሴ ዓይጎ ጋዓቴያ ዔሪባኣዖ ባልባቲሢ ጎይሢኬ ዬያ ጌዔሢ።

ጴፂሮሴ ዬያ ኬኤዛ ጎይሣ ዓኣንቴ ቦኦሬ ሻኣሬ ሙኪ ዔያቶ ባይዛዛ ዬያ ባኣካፓ፥ “ታ ዒዛና ሚርጌ ዎዛዻ ናዓሢ ታኣኮ ሃያኬ፤ ዒዚ ጋዓሢ ዋይዙዋቴ” ጋዓ ዑኡሲ ዋይዚንቴኔ። ዒማና ሃይሦ ዬሱሴ ጊንፆ ሃንታዞንሢ ዲቃቲ ሳዓ ሎኦሜኔ።

ዬያሮ ዬሱሴ ዔያቶኮ ዑፆ ካኣማዖ፥ “ዲቃቲፖቴ፥ ዔቁዋቴ” ጌዔኔ። ዒማና ዔያታ ኮይሎ ዛጋንቴ ዬሱሴፓ ዓታዛ ዖኦኒያ ባኣሴ።

ዬካፓ ዬሱሴንታ ዒዛኮ ጊንፆ ሃንታ ሃይሦንሢንታ ዹካፓ ኬዴኔ። ዒማና ዬሱሴ ፔ ጊንፆ ሃንታዞንሢም፥ “ሃይካ ሃሢ ማዺንቴ ባኮ ዓይጎ ዓሲማኣ ኬኤዚፖቴ። ታኣኒ ሚርጌ ፔኤቃዓኬ፥ ሃይቃንዳኔ፤ ዬካፓ ታ ሃይባፓ ዻቂ ዔቃንዳኔ። ዬካፓ ዒንሢ ዓሶም ኬኤዛኒ ዳንዳዓኔ” ጌዔኔ።