35. ሚጪንታያ ማዔ ዓዶስኬያ ሃይሴ

ፔቴ ቤሲዳ ዬሱሴ ቃራፄ ሚኢሼ ጪጊሳ ሚርጌ ዓሲንታ ዺቢ ጎሜ ዓሲንታ ዒዛ ኮራ ሙኬም ዔያቶ ዒ ዔርዛኔ።

ዬኖ ቤዞይዳ ዓኣ ፆኦሲ ካኣሽካ ዓሶ ሱኡጋ ዬሱሴ ጎሞ ዓሶ ናሽኪ ዔኬሢ ዴንቃዖ ዎላ ዾንኮ ዓርቄኔ። ዬያሮ ዬሱሴ ሂዚ ጋዓ ቶሴ ሃይሴ ኬኤዜኔ።

ላምዖ ናይ ዓኣ ፔቴ ዓሲስኬያ ዓኣኔ። ዬያቶፓ ጌኤዛሢ ዓዶ ኮራ፥ “ዓዴ! ኔኤኮ ዓኣ ሚኢሾፓ ታና ሄላ ዛሎ ፓቂ ዒንጌ” ጌዔኔ። ዬያሮ ዓዳሢ ሚኢሾ ዔያቶም ጊሽኬኔ።

“ጌኤዛሢ ጋዓንቴ ሚኢሾ ቡኩሲ ዔኪ ሃኬ ዓጪ ዴንዳዖ ጎሜ ማዾ ማዺ ሚኢሾ ላኣሊ ባይዜኔ።”

“ዬይ ጌኤዛሢ ዴንዴ ዓጬሎይዳ ዼኤፒ ሉማ ኬስኬኔ፤ ሙዖንዶ ባኣዚንታ ሻንቆንዶ ሚኢሼያ ዒ ባይዜኔ። ዬያሮ ፔቴ ዓሲኮ ጉዱንሢ ሄንቃኒ ዓሲ ማኣሪ ጌሌኔ፤ ያዺ ማዔቴያ ሚርጌ ዒ ካራ ባይዚ ናይዺ ሜታዼሢሮ ጉዱንፆም ዒንጎ ሙዖ ሙዓኒ ዓፃዼኔ።”

“ጋፒንፆይዳ ፔ ዒኖና፥ ‘ታ ሃሢ ሃይካ ዓይጎዎዳይ? ታ ዓዶ ማኣራ ማዻ ዺቦ ዓሳ ሙዓ ዺቢ ባኣዚ ዓኣኔ፤ ታ ጋዓንቴ ሃይካ ናይዚና ሃይቃኔ። ዬያሮ ታኣኒ ታ ዓዶ ማኣሪ ማዒ ዴንዲ ዓይሌ ማሂ ታና ዔካንዳጉዲ ሺኢቃንዳኔ’” ጌዔኔ።

“ዬያሮ ዬይ ጌኤዛሢ ዓዶ ማኣሪ ማዒ ሙኪፆይዳ ዓኣንቴ ዓዴ ሃኬና ዒዛ ዴንቃዖ ሚጬንቴኔ፤ ዬያሮ ዒዛ ባንሢ ጳሽኪ ሙካዖ ኮንቂ ዓርቂ ሄርቄኔ።”

“ናዓሢ ጋዓዖ፥ “ዓዴ፤ ፆኦሲንታ ኔናንታ ቤርታ ታ ዻቢንቲ ማዾ ማዼኔ። ታ ኔ ናይ ጌይንታኒ ኮይሳያቱዋሴ’ ጌዔኔ።”

“ጋዓንቴ ዓዳሢ ዓይሎይዳፓ ፔቴስኬያም፥ ‘ዑኬና ዴንዲ ቃራ ማኣዖ ዔኪ ሙኪ ታ ናዓሢ ማይሴ! ኬኤሎይዳ ዢኢሮ፥ ቶኮይዳኣ ዱርሲ ዓኣሤ። ዬካፓ ኑ ሙይ ዑሽኪ ዎዛዻንዳጉዲ ፔቴ ሶቦሪ ዔኪ ሙኪ ሹኩዋቴ፤ ዓይጎሮ ጌዔቴ ሃይ ናዓሢ ታኣኮ ሃቄዖ ሃሢ ዻቄኔ! ባይቂ ጋፔዖ ጴዼኔ!” ጌዔኔ።

“ዬያይዲ ዔያታ ዎዛዺሢ ዓርቄኔ። ዒማና ሚርጌ ናጉዋዖ ጎሺ ሶኦፒ ዴንዴ ቶይዶ ናዓሢ ማዒ ሙካዖ ዋርቂንታ ባኮንታ ኮፆዋ ዋይዚ ‘ሃኖ ሃይካ ዓይጌ ማዢንቴይ?’ ጌይ ዲቃቲ ሄርሼኔ።

“ዬይ ቶይዶ ናዓሢ ዒዛኮ ጌኤዚ ሙኬም ዓሳ ዎዛዻሢ ዖኦጪ ዔራዖ ሚርጌና ዻጋዺ ኬኤፆ ጌላኒያ ኮዒባኣሴ። ዬያሮ ዓዴ ኬስኪ ቶይዳሢ ዔያቶና ዎላ ጌሊ ዎዛዻንዳጉዲ ሺኢቄኔ፥ ጋዓንቴ ዒዚ ዒፄኔ።”

“ቶይዶ ናዓሢ ዓዶ ኮራ፥ ‘ሃያጉዴ ሚርጌ ሌዔ ቢያ ታ ኔኤም ጉሙርቂንታያ ማዒ ማዼኔ! ፔቴታዖ ታኣኒ ዓይሢንቲ ዒፂባኣሴ፤ ኔኤኒ ጋዓንቴ ታ ላጎና ዎላ ሹኪ ሙዒ ታ ዎዛዻንዳጉዲ ፔቴ ዋናይታዖ ዒንጊባኣሴ። ሃይ ታ ጌኤዛሢ ጎሜ ማዾ ማዺ ሚኢሾዋ ቢያ ላኣሊ ባይዚ ሙካዛ ዎዲ ኔ ሶቦሪ ሹኬይ!።”

“ዓዴ ማሃዖ፥ ‘ታ ናዓሢዮ! ኔኤኒ ቢያ ዎዴ ታኣና ዎላኬ፤ ታኣሮ ማዔ ባካ ቢያ ኔኤሮኬ። ሃሢ ጋዓንቴ ኑኡኮ ዎዛዺፃ ፒዜኬ፤ ዓይጎሮ ጌዔቴ ሃይ ኔ ጌኤዚ ሃይቄዖኬ ዻቄሢ! ጋፒ ባይቄዖ ሃሢ ጴዼኔ” ጌዔኔ።