34.ዬሱሴ ኬኤዜ ሜሌ ሃይሴ

ዬሱሴ ፆኦሲ ካኣቱሞ ዛሎ ኮኦኪንሢና ሚርጌ ሃይሴ ኬኤዚ ዴሮ ዔርዜኔ። ኮኦኪንሦ ኬኤዛዖ፥ “ፆኦሲ ካኣቱማ ዓሲ ሴናፒጬ ጌይንታ ዜርሢ ቢያፓ ዻካ ዜርሢስኬማ ዜርቄ ሃይሴ ማላኔ” ጌዔኔ።

“ጋዓንቴ ዬማ ዜርፆማ ባቃላዖ ሃንጎ ቱኮና ባኮይዳፓ ቢያ ባሼ ዼኤፒ፥ ካፒያ ሙኪ ማኣሪ ማዣያ ማዓኔ።”

ዬሱሴ ሃሣ ሜሌ ሃይሴ ኬኤዛዖ፥ “ፆኦሲ ካኣቱማ ፔቴ ላኣሊ ዲርኪንቴ ዺኢሊዳ ዋሃ ዻካ ሙኑቃ ፃኣዛ ማላኔ።”

“ሃሣ ጊንሣ ፆኦሲ ካኣቱማ ዓሲ ጎሺ ጋርካ ዓኣቺ ጌሤ ማዝጋቤ ማላኔ። ዬኖ ዒ ዓኣቺ ጌሤዞ ሜሌ ዓሲ ዴንቃዖ ጊንሣ ማሂ ዱኡካዖ ዴንዲ ፔኤኮ ዓኣ ባኮ ቢያ ሻንቺ ዬኖ ጎዤሎ ሻንቄኔ።”

“ዬያጉዲ ፆኦሲ ካኣቱማ ሻንቾቴ ሚርጌ ሚኢሼ ኬሳንዳ ሚዛጶ ሹጮ ማላኔ። ዬያ ሚዛጶ ሹጮ ኮርማ ዓሲ ዴንቃዖ ዓኣ ባኮ ቢያ ሻንቺ ዬኖ ሻንቄኔ።”

“ዬካፓ ዬሱሴ ፔ ማዼ ማዾና ጉሙርቂንቲ ሄርሺንታ ዓሶንታ ሜሌ ዓሶ ቶኦቻ ዓሶም ሂዚ ጌይ ቶሴ ሃይሴ ኬኤዛዖ፥ ‘ላምዖ ዓሲ ፆኦሲ ሺኢቃኒ ጌኤዦ ማኣሪ ዴንዴኔ። ዬያቶፓ ፔቴሢ ዴሮ ቃራፄ ሚኢሼ ጪጊሻያኬ፥ ሃንጎሢ ፆኦሲ ካኣሽካ ዓሶኮ ሱኡጌኬ” ጌዔኔ።

“ፆኦሲ ካኣሽካ ዓሶ ሱኡጋሢ ሺኢቃዖ፥ ‘ፆኦሲዮ! ሜሌ ዓሶጉዲ ታ ቡሩዋያ፥ ዋይዚ ዒፁዋያ፥ ማቾ ሃሣ ዓኒ ማዒባኣያና ላሁዋያ፥ ሃያ ዓሢ ጎይፆዋ ቃራፄ ሚኢሼ ጪጊሺ ሺሩዋያ ማዔሢሮ ታ ኔና ጋላታኔ’ ጌዔኔ።”

“ታኣኒ ቃልሾ ኬሎ ጋራ ላምዒ ማይንቲ ሙዖ ሃሺፆ ዳምቦ ካፓኔ፥ ታ ዴንቃ ሚኢሾንታ ዱማ ዱማ ባኮይዳፓ ታጳፓ ፔቴ ኬሲ ኬሲ ኔኤም ዒንጋኔ።”

“ቃራፆ ሚኢሾ ጪጊሻሢ ጋዓንቴ ዬያ ፆኦሲ ካኣሽካ ዓሶ ሱኡጋሢፓ ሃኬ ዶጪ ዔቃዖ፥ ሌካ ጫሪንጮዋ ዛጋኒ ጫርቂባኣሴ። ዬያ ሃሻዖ ፔ ኩጮና ዳዶ ባዒ ባዒ ‘ፆኦሲዮ! ታ ጎሜናኬ፤ ሃዳራ ታና ማኣሬ’ ጌዔኔ።”

ዬካፓ ዬሱሴ ሂዚ ጌዔኔ፦ “ጎኔ ታ ዒንሢም ጋዓኔ፤ ፆኦሲ ዬያ ቃራፆ ሚኢሾ ጪጊሳሢ ሺኢጲፆ ዋይዚ ፂሊሴኔ። ፆኦሲ ካኣሽካ ዓሶ ሱኡጋሢ ጌዔ ባኮ ጋዓንቴ ፆኦሲ ናሽኪ ዔኪባኣሴ። ፔና ዼግ ዼጊዳሢ ቢያ ፆኦሲ ዻውሲሳኔ፤ ፔና ሂርኪዳሢያ ዼጊዲ ቦንቺሳኔ።”