33. ጎሺ ጎሽካ ፔቴ ዓሲስኬያ ሃይሴ

ፔቴ ኬሊ ዬሱሴ ባዞ ዓጮይዳ ሚርጌ ዺቢ ዓሲ ዓኣንቴ ዔያቶ ዔርዚቤቃ ዔቂ ዒ ኬኤዛንዳ ቤዛ ባይቃጉዲ ጌዔሢሮ ዋኣፆና ፒንቆ ጎንጎ ባዞ ሳዞ ባንሢ ዶጪሲ ዒኢካ ጌሊ ዴዓዖ ሚርጌ ባኣዚ ኬኤዜኔ።

ዬሱሴ ፔቴ ሃይሴ ኬኤዛዖ፥ “ፔቴ ዓሲ ዜርሢ ዜራኒ ጎዦ ጋራ ዔቄኔ፤ ዒዚ ኩጫ ዔኪ ዓኣ ዜርፆ ዜራዛ ዛላ ጎይፆ ዓጫ ዴንዲ ኬዴኔ፥ ዬያሮ ካፒ ሙኪ ማንፂ ሙዔኔ” ጌዔኔ።

“ዛሎ ዜርፃ ጊንሣ ሚርጌ ዓጪ ባኣ ሹቺ ሳዓይዳ ኬዴኔ፤ ዬይ ባቃሌቴያ ፃጲ ዳካኒ ዳንዳዒባኣሢሮ ዓባ ኬስካዛ ባቃላ ሹላዖ ሜሌኔ።”

“ዛላ ዜርሢ ሃሣ ዓንጊሢ ቶሻ ባኣካ ኬዴኔ፤ ዬይ ዜርፃኣ ባቃላኔ፥ ጋዓንቴ ዓንጊፃ ሹኡሚ ዑጎ ባሼሢሮ ፔቴታዎ ዓኣፒ ዓኣፓኒ ዳንዳዒባኣሴ።”

“ዛሎ ዜርፃ ጊንሣ ቃራ ሳዓይዳ ኬዳዖ ፔቴይ ሃይሢታሚ፥ ባጋ ላሂታሚ፥ ዓቴዛ ፄኤታ ዓኣፔኔ። ዋይዛ ዋይዚ ዓኣሢ ዋይዞንጎ!”

ዬይ ሃይሳ ዒዛኮ ጊንፆ ሃንታዞንሢም ዔርቶ ዒፄኔ። ዬያሮ ዬሱሴ ዔያቶም ቡሊ ኬኤዛዖ፥ “ዜርፃ ፆኦሲ ቃኣሎኬ፤ ጎይፆ ዓጫ ኬዲፃ ዻዋሢ ፆኦሲ ቃሎ ዋይዛ ዓሶኬ፤ ጋዓንቴ ዔያታ ማሊ ጶቂሡዋኣሢሮ ፃላሄ ዒናፓ ሙኪ ቃኣሎ ዔካኔ” ጌዔኔ።

“ሹጮ ሳዖይዳ ኬዴ ዜርፃ ዻዋሢ ፆኦሲ ቃኣሎ ዋይዛዖ ዑኬና ዎዛዺ ዔካ ዓሶኬ፤ ጋዓንቴ ሜቶና ዳውሲሢና ሙካኣና ዶዲፆ ባሺንቲ ፆኦሲ ጉሙርቂፆ ሃሻኔ።”

“ዓንጊፆ ቶሾ ባኣካ ኬዴ ዜርፃኣ ዻዋሢ ፆኦሲ ቃኣሎ ዋይዛ ዓሶኬ፤ ጋዓንቴ ዴይ ቤቃ ሃያ ዓጮ ባኣዚ ማሊሢንታ ዖርጎቹሞንታ ዎዛንታ ሙካዖ ፆኦሲ ናሽኮ ናሹሞ ባይዛኔ። ዬያሮ ዋይዞና ቃኣላ ዓኣፒ ዓኣፒሱዋያ ማዓኔ።”

“ኮዦ ሳዖይዳ ኬዴ ዜርፃ ዻዋሢ ፆኦሲ ቃኣሎ ዋይዛዖ ጉሙርቂ ዔኪ ዓኣፒ ዓኣፓ ዓሶ ዛላኬ።”