32. ዬሱሴ ሜዣ ዓርቄ ዓሲስኬያና ሃርጌ ላኣሊስኬኖዋ ዻቂሼሢ

ፔቴ ኬሊ ዬሱሴንታ ዒዛኮ ጊንፆ ሃንታዞንሢንታ ዋኣፆና ፒንቆ ጎንጎና ባዞ ፒንቂ ጌርጌሴኖኔ ዓሳ ናንጋ ጉርዶ ሄሌኔ።

ባዞ ሱኮ ዔያታ ፒፒንቃኣና ፑርታ ሜዣ ዓርቄ ዓሲስኬይ ዬሱሴ ባንሢ ጳሽኪ ሙኬኔ።

ዬያ ዓሢ ዓሲ ዓርቂ ቃዙዋ ጎይሢ ዎልቃዻያኬ። ዬያሮ ዓሳ ዒዛኮ ኩጮንታ ቶኮንታ ካኒ ቢራታና ቱካኔ፤ ጋዓንቴ ዬያ ዓንጎ ዒ ዱኡዚ ዱኡዚ ኬኤራኔ።

ዬይ ዣኣዣሢ ዬኖ ቤዛ ዓኣ ዱኡፒ ካይካ ናንጊ ሮኦሮንታ ዋንቶዋ ቢያ ዒላታኔ። ዓፒላኣ ማይንቱዋሴ፤ ዑፆዋ ፔኤኮ ቲሊንጊና ቲቂ ቲቂ ሱጉሣኔ።

ዬይ ዓሢ ዬሱሴ ኮራ ሙካዖ ቶኮ ዴማ ሎኦሚ ዚጌኔ። ዬሱሴያ ዬያ ፑርቶ ዓያናሢ፥ “ሃያ ዓሢፓ ኬስኬ!” ጌይ ዓይሤኔ።

ዬይ ፑርቶ ዓያናሢ ዼጊ ጌዔ ዑኡሲና፥ “ዼኤፖ ፆኦዛሢ ናዓሦ፥ ዬሱሴ! ኔኤና ታኣናኮ ዓይጌ ዓኣይ? ሃዳራ ታና ሜታሲፖ!” ጌዒ ዒላታኔ። ዬሱሴ ፑርቶ ዓያናሢ፥ “ሱንፃ ኔኤኮ ዖናዳይ?” ጋዓዛ፥ ዒዚያ “ኑ ዺቢታሢሮ ሱንፃ ታኣኮ ሌጌዎኔኬ” ጌዔኔ (ሌጌዎኔ ጌይፃ ሮሜ ዓጮ ዖሎ ዓሶ ዺቢ ማሂ ፔቴይዳ ፓቃዖ ጌሦና ሱንሢኬ።)

ዬይ ፑርቶ ዓያና፥ “ሃዳራ ኑና ሃኪሲ ዳኪፖ!” ጌይ ዬሱሴ ሺኢቄኔ። ዒማና ዓሲኮ ቆሎ ሚርጌ ጉዱንሢ ጌሜሪዳ ሄንቃንቴ ዬያታ ፑርቶ ዓያና ዬሱሴ ኮራ፥ “ሃዳራ ሃሴኬ ጉዱንፆይዳ ኑ ዓኣዺ ጌሎም ጌዔቴራ!” ጋዓዛ፥ ዬሱሴ ዔያቶ፥ “ዒኢካ ዴንዲ ጌሉዋቴ!” ጌዔኔ።

ዬያሮ ዬይ ፑርቶ ዓያና ዣኣዣሢዳፓ ኬስኪ ጉዱንፆይዳ ጌሌኔ። ሴካ ላምዖ ሺያ ማዓ ጉዱንሢ ዲርጊ ባዞይዳ ዴንዲ ጌላዖ ዔኤዺንቲ ሃይቂ ኩዴኔ።

ዬያ ጉዱንፆ ሄንቃ ዓሳ ዬያ ባኮ ዛጋዖ ካታሞ ጳሽኪ ዴንዲ ዬሱሴ ማዼ ባኮ ዴንቄ ዓሲም ቢያ ኬኤዜኔ። ዬያሮ ካታሞ ዓሳ ጳሽኪ ሙኪ ዛጋንቴ ዬይ ዣኣዣሢ ዻቂ ፔኤኮ ማኣሢያ ዳምቤና ማይንቲ፥ ዚቲ ጌይ ዴዒ ዓኣንቴ ዴንቄኔ።

ዓሳኣ ሚርጌና ዲቃቲ ዒጊጫዖ ዬሱሴ ዔያቶኮ ዓጮ ሃሺ ዴንዳንዳጉዲ ዖኦጬኔ። ዬያሮ ዬሱሴ ዋኣፆና ፒንቆ ጎንጎ ቶጊ ዓኣዺፆሮ ጊኢጊንቴኔ፤ ዒማና ዣኣዣሢፓ ዻቄ ዓሢ ዬሱሴና ዎላ ዴንዳኒ ሺኢቄኔ።

ጋዓንቴ ዬሱሴ፥ “ያዺ ጌይፖ፤ ኔ ማኣሪ ዴንዲጋፓ ፆኦሲ ኔኤም ማዼ ባኮ ቢያ፥ ኔና ዒ ዎማዺ ሚጪንቲ ማኣዴቴያ ኔ ዒጊኖንታ ኔኤኮ ማኣሮ ዓሶንታም ኬኤዜ” ጌዔኔ።

ዬያሮ ዓሢ ዴንዳዖ ዬሱሴ ማዼ ባኮ ዓሲም ቢያ ኬኤዜኔ። ዬያ ሃይሶ ዋይዜ ዓሳ ቢያ ሚርጌና ዲቃቲ ሄርሼኔ።

ዬካፓ ዬሱሴ ጊንሣ ባዞና ፒንቂ ቤርታኣ ቤዞ ዓኣዼኔ። ዒኢካ ዒዚ ሄላዛ ሚርጌ ዓሲ ዒዛኮ ኮይላ ቡኪ ቱቺ ሜታሴኔ። ዒማና ዬያ ዴሮ ባኣኮይዳ ታጶ ላምዖ ሌዔ ጉቤ ሱጉሢ ሾኦቲ ሜታሳ ላኣሊስኬና ዓኣኔ። ዒዛ ፖዓኒ ሚኢሾ ፔኤኮ ዼኤሾ ዔራ ዓሶም ጪጊ ኩርሴቴያ ሃቺም ሴካ ባባሼኔ።

ዬሱሴ ሚርጌ ዶርዖ ዓሲ ፓሤሢ ዒዛ ዋይዛዖ፥ “ዬሱሴኮ ማኣዓሢታዖ ታ ካኣሜቴ ዻዻቃንዳኔ!” ጌይ ማሌኔ። ዬካፓ ዬሱሴኮ ጊንፆ ዒዛ ቃኣፂ ሙኪ ማኣዓሢኮ ዓጮ ካኣማዛ፥ ዒዞኮ ሾኦታ ሱጉፃ ቤዞና ዔቄኔ።

ዬሱሴ ኔጉዋዖ ዎልቄ ዒዛይዳፓ ኬስኬሢ ዔሬኔ። ዬያሮ ጊንሢም ሺሪ ዛጋዖ፥ “ዖናዳይ ታና ሄሌሢ?” ጌዔኔ። ዒዛ ጊንፆ ሃንታዞንሢ፥ “ሃያ ኔ ኮይሎይዳ ቱቺንታ ዺቦ ዓሶ ኔ ዛጌያታዖ ‘ዖ ታና ሄሌይ?’ ጌዒ ኔ ዎይቲ ዖኦጫይ?” ጌዔኔ።

ዓሴላ ዒማና ዒጊቹሞና ጎጋይቂ ጎጋይቂ ሙኪ ዬሱሴኮ ቶኮ ዴማ ሎኦሜኔ። ዬካፓ ዒዛ ማዼ ባኮንታ ዶርዓሢፓኣ ዒዛ ፖዔሢ ኬኤዜኔ። ዬሱሴያ ዒዞም፥ “ኔ ጉሙርቂፃ ኔና ዻቂሼኔ፤ ኮሺ ዓኣዼ” ጌዔኔ።