31. ዬሱሴኮ ዼኤፖ ባዞይዳ ሃንቲፆ

ዬካፓ ዬሱሴ ዴሮ ዳኪፆይዳ ዓኣዖ ዋኣፆና ፒንቆ ጎንጎ ቶጊ ዒዛኮ ጊንፆ ሃንታዞንሢ ሱኮ ፒንቃንዳጉዲ ዓይሤኔ። ዴራ ዴንዴስካፓ ዬሱሴ ሺኢጲሢሮ ፔቴ ዹካ ኬስኬኔ፤ ዒዚ ዒኢካ ፔኤሮ ሌሊ ዴንዲ ሳዓኮ ጊዲሚሺ ሄላንዳኣና ሺኢቂ ዴዔኔ።

ዬያ ሄላንዳኣና ዒዛኮ ጊንፆ ሃንታዞንሢ ዋኣፆና ፒንቆ ጎንጎ ዒሺ ዒሺ ዼኤፖ ባዞኮ ሳዞ ሄሌኔ፤ ዒማና ዼኤፒ ዢባሬ ዢባርሻሢሮ ዔያታ ዋኣፆና ፒንቆ ጎንጎ ዔኪ ዴንዳሢ ሚርጌ ሜቶናኬ።

ዬሱሴያ ሺኢጲፆ ጋፒሴስካፓ ዬያ ባዞ ዋኣፆይዳ ሃንቲ ሃንቲ ባዞ ሳዛ ዓኣ ዒዛኮ ጊንፆ ሃንታዞንሢ ኮይላ ሙኬኔ።

ዒዛኮ ጊንፆ ሃንታዞንሢያ ዬሱሴ ዴንቃዖ ዓሲኮ ዔኤዤ ዔያቶ ኮራ ማሌም ሚርጌና ዒጊጬኔ፤ ዔያታ ዒጊጬሢ ዬሱሴ ዔራዖ ዼጌ ዑኡሲና ዔያቶም፥ “ዲቃቲፖቴ፤ ታናኬ!” ጌዔኔ።

ዒማና ጴፂሮሴ ዬሱሴ ኮራ፥ “ዔርዛሢዮ፤ ኔናታቴ ታኣኒያ ዋኣፆይዴና ሃንቲ ኔ ኮራ ሙኮም” ጌዔኔ።ዬሱሴያ ጴፂሮሴም፥ “ሃኒ ዬዔ!” ጌዔኔ።

ዬያሮ ጴፂሮሴ ዋኣፆና ፒንቆ ጎንጋፓ ኬዲ ዬሱሴ ባንሢ ዋኣፆይዴና ሃንቲሢ ዓርቄኔ። ጋዓንቴ ዻካ ዒ ሃንቴስካፓ ዬሱሴፓ ዓኣፖ ሺርሺ ኮይላ ዓኣ ዋኣፆ ጉዳሢ ዛጌኔ።

ጴፂሮሴያ ዒጊቹሞ ዒዛይዳ ጌሌም ዋኣፃ ዒዛ ዔኤዺሢ ዓርቄኔ፤ ዬያሮ “ዔርዛሢዮ፤ ታ ጋፔኔ፥ ታና ዓውሴ!” ጌይ ዒላቴኔ። ዬያሮ ኔጉዋዖ ዬሱሴ ዒዛኮ ኩጮ ዓርቂ፥ “ሃይ ኔ ጉሙርፃ ፓጬሢዮ! ዓይጋ ኔ ዓልቴይ?” ጌዔኔ።

ጴፂሮሴንታ ዬሱሴንታ ዋኣፆና ፒንቆ ጎንጎ ጋሮ ጌላዛ ጉዳሢ ዢባራ ዢባርሲፆ ሃሼም ቢያ ባካ ዚቲ ጌዔኔ። ዬያሮ ዬሱሴኮ ጊንፆ ሃንታዞንሢ ዲቃቲ ሄርሻዖ፥ “ጎኔ ኔኤኒ ፆኦሲ ናይኬ!” ጌይ ዬሱሴም ዚጌኔ።