30. ዬሱሴ ዶንጎ ሺያ ዓሲ ሙኡዜሢ

ሚርጌ ጉርዳይዳ ዴንዲ ዴንዲ ኮዦ ሃይሶ ኬኤዛንዳጉዲ ዬሱሴ ዒዛ ጊንፆ ሃንታዞንሢ ዳኬኔ። ዬካፓ ዔያታ ዬሱሴ ኮራ ማዒ ሙካዖ ማዼ ባኮ ቢያ ኬኤዜኔ። ዬሱሴያ ባዞና ዒዛና ዎላ ፒንቂ ዴንዲ ዓሲባኣ ቤስካ ዒዛና ዎላ ዻካ ሃውሻንዳጉዲ ዔያቶም ኬኤዜኔ፤ ዬያሮ ዋኣፆ ፒንቆ ጎንጎይዳ ጌሊ ባዞና ዔያታ ፒንቄኔ።

ጋዓንቴ ዬሱሴና ጊንፆ ሃንታዞንሢና ዋኣፆ ፒንቆ ጎንጎ ቶጊ ዴንዳሢ ዛጌ ዓሳ ዺቢታሢሮ ቢሪ ሶ ሱኮ ሄላኒ ጳሽኬኔ። ዬያሮ ዬሱሴና ዒዛኮ ጊንፆ ሃንታዞንሢና ሱኮ ፒቃንቴ ሚርጌ ዴሬ ቢሪ ዔያቶ ካፓኔ።

ዬይ ዴራ ላኣሎንታ ናኣቶንታ ፓይዱዎንቴ ዓቲንቃ ሌሊ ዶንጎ ሺያፓ ዑሣ ማዓያኬ። ዬሱሴ ዬያ ዴሮ ዛጋዖ ዔያታ ሄንቃ ዓሲባኣ ማራይጉዲ ማዔሢሮ ሚጪንቴኔ፤ ሚርጌ ባኣዚያ ዔያቶም ኬኤዚ ዔርዜኔ፥ ሃርጊንቴ ዓሶዋ ፓሤኔ።

ዒማና ሳዓ ዒባናያ ማዔሢሮ ዬሱሴኮ ጊንፆ ሃንታዞንሢ ዒዛ ኮራ፥ “ሳዓ ዓሜኔ፤ ኔ ዛጋሢጉዲ ሃይካ ዑኬ ካታማ ባኣሴ፤ ዔያታ ዴንዲ ሙዖ ባኣዚ ሻንቃንዳጉዲ ዴሮ ዳኬ” ጌዔኔ።

ዬሱሴ ጋዓንቴ ዔያቶም፥ “ዔያታ ሙዓንዳ ባኣዚ ዒንሢ ዒንጉዋቴ!” ጌዔኔ። ዔያታ ማሃዖ፥ “ዬያ ኑ ዎዲ ዳንዳዓንዳይ? ኑ ኮራ ዓኣዞንሢ ዶንጎ ካሣና ላምዖ ሞሎና ሌሊኬ” ጌዔኔ።

ዶንጊታሚ ዶንጊታሚ ማሂ ዴሮ ቡጮይዳ ዴይሣንዳጉዲ ዒዛኮ ጊንፆ ሃታዞንሢም ዬሱሴ ኬኤዜኔ።

ዬካፓ ዬሱሴ ዬንሢ ዶንጎ ካሦንሢና ላምዖ ሞሎንሢ ዔኪ ጫሪንጮ ባንሢ ዛጋዖ፥ ዬንሢ ሙዖሮ ፆኦሲ ጋላቴኔ።

ዬሱሴ ያዺዴስካፓ ዬንሢ ካሦንሢና ሞሎንሢያ ቡንፂ ዒዛኮ ጊንፆ ሃንታዞንሢ ዴሮም ሺኢሻንዳጉዲ ዒንጌኔ። ዬሱሴኮ ጊንፆ ሃንታዞንሢያ ሙዖ ጊሽኪሢ ዓርቄኔ፤ ጋዓንቴ ዬይ ሙዓ ጋፖ ዒፄኔ፥ ዴራኣ ቢያ ሙዒ ሚሽኬኔ።

ዬካፓ ዬሱሴኮ ጊንፆ ሃንታዞንሢ ዓቴ ዶምቦ ቡኩሴኔ፤ ዬይ ዶምባ ታጶ ላምዖ ዼኤፒ ሌኤማቴ ኩሜኔ፤ዬሱሴ ዬንሢ ዶንጎ ካሦንሢና ሞሎንሢ ሌሊታንቴ ዬያይዲ ዺቢሼኔ።