29. ዓቶንጎ ጌይሢ ባሺንቴ ዓይሌስኬያ ሃይሴ

ፔቴ ኬሊ ጴፂሮሴ ዬሱሴ ኮራ፥ “ዔርዛሢዮ፤ ታ ዒሻሢ ታኣም ፑርታ ባኣዚ ማዺ ዻቤቴ ዋኣዼ ማይንቲ ዓቶንጎ ጎዖንዶይ? ላንካይ ማይንቲ ጎዖንዶሞ?” ጌይ ዖኦጬኔ። ዬሱሴ ጋዓንቴ፥ “ላንካይ ሌሊቱዋንቴ ላንካይታሚ ማይንቲ ላንካይ ማዓንዳኣናኬ” ጌዔኔ። ዬሱሴኮ ዬያ ጌይፃ፡ ኑም ፑርታ ማዼ ዓሲም ቢያ ዎዴ ዓቶም ኑ ጋዓንዳጉዲኬ። ዬካፓ ዬሱሴ ሂዚ ጋዓ ሃይሴ ኬኤዜኔ፦

ዬሱሴ ኬኤዛዖ፥ “ፆኦሲ ካኣቱማ ፔኤኮ ዓይላ ማዼ ማዾ ዛጋኒ ማሌ ፔቴ ካኣቲስኬያ ሃይሴጉዲኬ። ዬያ ካኣቲኮ ዓይሎፓ ፔቴስኬያ ዑፃ ፔቴ ዓሲ ሌዔ ቢያ ማዾ ማዼም ዒንጎ ሚኢሼጉዴያ (ታጶ ሺያ ሜክሊቴ) ጋሌ ጴዼኔ” ጌዔኔ።

ዬይ ዓይላሢ ዬያ ጋሎ ጪጋኒ ዳንዳዒባኣሢሮ ካኣቲ፥ “ዬያ ጋሎ ጪጋኒ ሃያ ዓሢንታ ማኣሮ ዓሶዋ ቢያ ዒዛኮ ሻንቹዋቴ” ጌዔኔ።

ዬያሮ ዬይ ዓይላሢ ካኣቲ ቤርታ ጉምዓታዖ፥ “ሃዳራ፥ ዻካ ኬሊ ታኣም ማሌ፤ ጋሎ ታ ኔኤኮ ቢያ ጪጋንዳኔ” ጌዔኔ። ካኣቲያ ዒዛም ሚጪንታዖ ጋሎ ጉቤ ዒዛም ሃሺ ማኣሬኔ።

ዬይ ዓይላሢ ካኣቲ ቤርታፓ ኬስካንቴ ዖይዶ ዓጊኒኮ ጪጎንዶ ሚኢሼጉዴያ ዒዛኮ ጋሌና ዓኣ ዓይሌስኬያ ዴንቄኔ፤ ዬያ ዒዛኮ ላጌ ማዔ ዓይላሢ ዒ ጩኡሊ ዓርቃዖ፥ “ጋሎ ታኣም ጪጌ!” ጌዔኔ።

ዬይ ዒዛኮ ላጋሢ፥ “ሃዳራ፥ ዻካ ኬሊ ታኣም ማሌ፤ ጋሎ ታ ኔኤኮ ቢያ ጪጋንዳኔ” ጌዔኔ። ጋዓንቴ ዬይ ዓይላሢ ዬያ ዋይዞ ዒፂ ፔ ላጋሢ ጋሎ ጪጋንዳያ ሄላንዳኣና ዎጌና ዓይሢሲ ቱኡሲ ማኣሪ ጌልዜኔ።

ሃንጎ ዓይሎ ማዔ ዓሳ ዬያ ሃይሶ ዋይዛዖ ዲቃቲ ማሌስካፓ ዬያ ሃይሶ ቢያ ካኣቲም ዴንዲ ኬኤዜኔ።

ዬያሮ ካኣቲ ዬያይዴ ዓይላሢ ዔኤላዖ፥ “ኔ ፑርቶ ዓይላሢ ሃይ! ኔ ታና ሺኢቄም ታ ኔኤም ጋሎ ሃሺባይ? ኔኤኒያ ዬያ ኔ ላጋሢም ዒማይዳንዳያ ኮይሳያቱዓዳ!” ጌዔኔ። ዬካፓ ካኣቲ ሚርጌና ዻጋዺ ዒዚያ ጋሎ ቢያ ካኣቲም ጪጋንዳያ ሄላንዳኣና ቱኡዞ ማኣራ ቱኪሴኔ።

ጊንሣ ሃሣ ዬሱሴ፥ “ዒንሢ ፔቴ ፔቴሢ ዒንሢኮ ጌርሲ ማዓ ላጎም ዓቶም ጌይባኣቴ ጫሪንጮ ዓዳሢያ ዒንሢ ዻቢንቶ ዒማይዳንዳኔ” ጌዔኔ።