2. ጎሜ ዓጮ ጌሌሢ

ዓዳኣሜና ማቾና ፆኦሲ ዔያቶም ማዢ ዒንጌ ዱማ ዱማ ሚፃ ዓኣ ቤዜሎይዳ ዓኣ ዎዶና ሚርጌና ዎዛዺ ናንጋኔ። ላምዓሢ ዬማና ዑሢ ካሎኬ፥ ጋዓንቴ ዬይ ካሉማ ዔያቶ ዎሊ ሴልቂሲባኣሴ፤ ዬይያ ጎሜ ዓጮ ሃጊ ጌሊባኣሢሮኬ። ዔያታ ዒማና ዱማ ዱማ ሚፆ ባኣኮ ሃንቲ ሃንቲ ፆኦሲናኣ ጌጌስታኔ።

ጋዓንቴ ዬያ ሚፆ ባኣካ ጌኔ ማዻ ሾኦሺ ዓኣኔ። ላኣሌሎዋ ዒዚ “ፆኦሲ ዒንሢ ጎኔ ሃያ ሚፆ ዓኣፖ ቢያ ሙዒፖቴ ጌዒያ?” ጌይ ዖኦጬኔ።

ላኣሌላኣ፥ “ፑርቶንታ ኮዦንታ ዱማሲ ዔርዛ ሚፄሎ ዓኣፖማፓ ዓታዛ ሃንጎ ሚፆ ዓኣፖ ኮዔሢጉዲ ኑ ሙዓኒ ዳንዳዓሢ ኬኤዜኔ። ጋዓንቴ ‘ዬኖ ሚፆ ዓኣፔሎ ዒንሢ ሙዔቴ፥ ሙዓ ዓታዛ ካሜቴያ ዒንሢ ሃይቃንዳኔ’ ጌይናኣኮኬ” ጌዔኔ።

ሾኦዣሢያ ላኣሌሎም ማሃዖ፥ “ዬይ ጎኔ ባኣዚቱዋሴ፤ ዒንሢ ሃይቂንዱዋሴ፥ ዒንሢ ሚፆ ዓኣፔሎ ሙሙዓማና ዓኣፓ ዒንሢኮ ቡሊንቴም ኮሺንታ ፑርታንታ ዱማሲ ዒንሢ ዔሪ ፆኦሲጉዲ ማዓንዳያታሢ ፆኦሲ ዔሬሢሮኬ ‘ሙይፖቴ!’ ዒንሢም ጌዔሢ” ጌኤኔ።

ዬና ሚፆ ዓኣፔላ ሙዒሢም ኮሺ፥ ዛጊማኣ ጊኢጋያና ዔራቶዋ ዴንቃኒ ጫናሳያ ማዔሢ ላኣሌላ ዛጌስካፓ ሚፆ ዓኣፔሎ ዔኪ ሙዔኔ። ዒዞና ዎላ ዓኣ ዓኒማኣ ዔኪ ዒዛ ዒንጌኔ። ዒዚያ ዬኖ ሚፆ ዓኣፔሎ ሙዔኔ።

ኔጉዋዖ ላምዖንሢኮ ዓኣፓ ቡሊንቴኔ። ዔያታ ካሎ ማዔሢያ ዔያቶም ዔርቴኔ፤ ዬያሮ ዒላሺ ዓፒላ ጎይሢ ዎላ ካንሢ ሲኪ ፔ ካሉሞ ዓኣቻኒ ማሌኔ።

ዓሢና ማቾና ፆኦሲኮ ዑኡዞ ዱማ ዱማ ሚፃ ቱኪንቲ ዓኣ ቤዞይዳ ዋይዛዖ ቢያሢ ፆኦሲ ቤርታፓ ፑኔኔ። ፆኦሲያ ዓዳኣሜ ዔኤሊ “ኔ ዎካ ዓኣይ?” ጌዔኔ። ዓዳኣሜያ “ሚፆ ባኣኮይዳ ኔ ሃንታሢ ዋይዚ ካሎ ታ ማዔሢሮ ፑኔኔ” ጌዔኔ።

ፆኦሲያ “ኔ ካላዼሢ ዖ ኔኤም ኬኤዜይ? ታ ኔና ሙይፖ ጌዔ ሚፄሎ ዓኣፖ ኔ ሙዒያ?” ጌዔኔ። ዓዳኣሜያ፥ “ሃና፡ ኔ ታኣና ዎላ ናንጋንዳጉዲ ዒንጌ ላኣሌላ ሚፄሎ ዓኣፖ ዔኪ ዒንጌም ታ ሙዔኔ” ጌዔኔ። ፆኦሲ ላኣሌሎ ኮይላ “ዬይ ኔ ማዼ ባካ ዓይጎ ማዾዳይ?” ጌዔኔ። ዒዛኣ፥ “ሾኦዣሢ ታና ዻቢሼም ታ ሙዔኔ” ጌዔኔ።

ፆኦሲ ሾኦዣሢ ኮይላ፥ “ኔ ጋዳንቂንቴያኬ፤ ዳዲና ጎቺንቲ ኔ ሃንታንዳኔ፥ ዓጪያ ኔ ሙዓንዳኔ፥ ኔኤና ላኣሎና ኮሜ ዓሲ ማዒ ናንጋንዳኔ፥ ኔ ናኣቶና ዒዞ ናኣቶና ዒማዺ ዎሊኮ ሞርኬ ማዒ ዓታንዳኔ፤ ላኣሌሎ ዜርፃሢ ኔኤኮ ቶኦኮ ዳኣፃንዳኔ፥ ኔኤኒያ ዒዛኮ ቶኮ ዻዓንዳኔ” ጌዔኔ።

ፆኦሲ ላኣሌሎም፥ “ሾይፆሮ ኔ ባና ዎዶና ዋኣዪፆ ታ ኔኤም ዺቢሻንዳኔ፤ ማዔቴያ ኔ ዓኒ ኔኤኒ ሱኡካዻንዳኔ፥ ዒዚ ኔኤኮ ዑፃሢ ማዓንዳኔ” ጌዔኔ።

ዓዳኣሜም ፆኦሲ፥ “ኔ ማቾ ጌኤዞ ኔ ዋይዚ ታ ኔና ‘ሙይፖ’ ጌዔ ሚፆ ዓኣፖ ኔ ሙዔሢሮ ሳዓ ኔ ማዼ ማዾና ጋዳንቂንቴኔ። ኔ ናንጎ ዎዶ ቢያይዳ ላቢ ማዺ ጮጋቲ ሙዖ ባኣዚ ኔ ዴንቃንዳኔ። ዬካፓ ኔ ሃይቃንዳኔ፤ ኔኤኒ ዓጪታሢሮ ዓጮ ባንሢ ማዓንዳኔ” ጌዔኔ። ዓዳኣሜያ ፔ ማቾ ዒዛ ሼምፓ ዓኣ ማዢንቶኮ ቢያ ዒንዶኬ ጌዒ ሱንፆ ዒዞኮ “ሂዋኣኖ” ጌይ ጌሤኔ፤ ዬይ ጌይፃ “ሼምፖ ዒንጋ ዒንዶ” ጌይሢኬ። ፆኦሲያ ቆሎኮ ዒልዒና ማኣዖ ኮሺ ዓዳኣሜና ሂዋኣኖና ማይሴኔ።

ዓሲ ኮሺንታ ፑርታንታ ዱማሲ ዔሪፆና ዓዳ ኑናጉዲ ማዔሢሮ ላሚ ጊንሣ ዒ ፔ ኩቻ ናንጊ ዒንጋ ሚፆ ዓኣፖ ዱኡዚ ሙዑዋጉዲና ናኣናና ዒ ናንጉዋጉዲ ዓዳኣሜንታ ሂዋኣኖንታ ሚዛጶ ማዔ ዱማ ዱማ ሚፃ ዓኣ ቤዜሎፓ ‘ኑ ኬሶም” ጌዒ ፆኦሲ ዒኢፓ ዔያቶ ሺኢሼኔ። ዬካፓ ናንጎ ዒንጋ ሚፆ ባንሢ ዔኪ ጌልዛ ጎይፆ ካፓንዳጉዲና ዬኖ ሚፆ ዓኣፖ ዱኡዚ ሙዑዋጉዲ ላኣጋኒ ዎልቄና ዶዲ ማዔ ኪኢታንቻ ዱማ ዱማ ሚፃ ዓኣ ቤዞይዳ ጌሤኔ።