28. ፔቴ ዼጌ ዖርጎቺስኬያ ሃይሴ

ዼጌ ዖርጎቺስኬይ ፔቴ ኬሊ ዬሱሴ ኮራ ሙካዖ፥ “ኮዦ ዔርዛሢዮ! ናንጊና ናንጊ ዴንቃኒ ታ ዓይጎ ማዾንዶይ?” ጌይ ዖኦጬኔ። ዬሱሴ ማሃዖ፥ “ዓይጋ ኔ ታና ‘ኮዣሢ’ ጋዓይ ኮሺ ፔቴ ሌሊኬ፤ ዬይያ ፆኦሲ ሌሊኬ። ኔኤኒ ናንጊና ናንጊ ዴንቃኒ ኮዔቴ ፆኦሲ ዎጎም ዓይሢንቲ ማዺ ኩንሤ” ጌዔኔ።

ዬይ ዼጌሢ፥ “ዋኣቶ ዓይሢፆ?” ጌይ ዖኦጬኔ። ዬሱሴያ ዒዛም፥ “ዓሲ ዎዺፖ፥ ማቾ ሃሣ ዓኒ ማዒባኣያና ላሂፖ፥ ዉኡቂፖ፥ ሉኡቂፖ፥ ኔ ዓዶና ዒንዶና ቦንቼ፥ ኔ ላጋሢ ኔና ማሂ ዛጊ ናሽኬ” ጋዓሢሾ ጌዔኔ።

ጋዓንቴ ዬይ ዼጌሢ፥ “ናኣቶፓ ዓርቃዖ ዬያ ዎጎ ታ ካፒ ቢያ ኩንሤኔ። ናንጊና ናንጊ ዴንቃኒ ሜሌ ታ ዓይጎ ማዾንዶይ?” ጌዔኔ። ዬሱሴ ዬያ ዓሢ ናሹሞና ዛጌኔ።

ዬካፓ ዬሱሴ ዒዛም፥ “ኔኤኒ ፔቴታዖ ፓጬ ባኣዚ ባኣ ዓሲ ማዓኒ ኮዔቴ ዴንዲጋፓ ኔኤኮ ዓኣ ባኮ ሻንቺ ማንቆ ዓሶም ዒንጌ፤ ጫሪንጮይዳ ኔ ማዼ ባኮ ፃኣፒ ጌሦናያ ኔ ዴንቃንዳኔ፤ ሂዲጋፓ ሙኪ ታ ጊንፆ ሃንቴ” ጌዔኔ።

ዬይ ዼጌሢ ዬሱሴ ዬያ ጌዔሢ ዋይዛዖ ሚርጌና ዒ ዖርጎቺ ማዔሢሮ ዓኣ ባኮ ቢያ ሻንቺ ዒንጊፆ ኮዒባኣሢሮ ዖያዖ ዬሱሴይዳፓ ዓኣፖ ሺርሺ ዴንዴኔ።

ዒማና ዬሱሴ ዒዛ ጊንፆ ሃንታዞንሢም፥ “ዔዛታ! ዖርጎቺ ዓሲም ፆኦሲ ካኣቱሞይዳ ጌሊሢ ሚርጌ ሜቶኬ፤ ዋይዙዋቴ፥ ዖርጎቺ ዓሲ ፆኦሲ ካኣቱሞይዳ ጌላሢዳፓ ጋኣሎም ናርፔ ፂኢናና ጌሊፃ ሼሌዔ ማዓንዳኔ” ጌዔኔ።

ዒዛ ጊንፆ ሃንታዞንሢ ዬሱሴ ጌዔ ባኮና ዒኔ ዱጳዖ፥ “ሂዴቴ ዖ ዻቃኒ ዳንዳዓይ?” ጌዔኔ።

ዬያሮ ዬሱሴ ዒዛ ጊንፆ ሃንታዞንሢ ባንሢ ዛጋዖ፥ “ዬይ ዓሲም ዳንዳዒንታያቱዋሴ፤ ፆኦሲም ጋዓንቴ ሼሌዔኬ” ጌዔኔ።

ጴፂሮሴ ዒማና፥ “ሃይሾ፡ ኑኡኒ ቢያ ባኣዚ ሃሺ ኔ ጊንፆ ሃንታኔ፤ ኑም ዒንጊንታንዳ ባካ ዓካሪ ዓይጎዳይ?” ጌዔኔ።

ዬሱሴ ማሃዖ፥ “ታ ጋይቴ ጌዒ ፔ ማኣሮ፥ ጌርሲንሢ፥ ጌሮንሢ፥ ዓዶ፥ ዒንዶ፤ ዬያጉዲ ዓኣ ቆሎ ቢያ ሃሻ ዓይጎ ዓሲያ ዬያ ባኮ ቤዛ ፄኤታ ጳንጬ ባኣዚ ዴንቃንዳኔ፤ ናንጊና ናንጊያኣ ዒ ዻካላንዳኔ። ጋዓንቴ ቤርቲ ማሂ ፔና ጎኦቢሻ ዓሳ ጊንሢም፥ ጊንፃ ዓቴያ ማላ ላኣፖ ዓሳ ቤርቲም ማዓንዳኔ” ጌዔኔ።