27.ፔቴ ኮሺ ሳማሪያ ዓሲስኬያ ሃይሴ

ፔቴ ኬሊ ዓይሁዶኮ ዎጎ ዔርዛ ፔቴ ዓሲስኬይ ዬሱሴ ዎዚ ጋዓቴያ ዛጋኒ ዬሱሴ ኮራ ሙካዖ፥ “ዔርዛሢዮ! ናንጊና ናንጊ ዴንቃኒ ታ ዎይታንዳያ ኮይሳይ” ጌዔኔ። ዬሱሴ ማሃዖ፥ “ፆኦሲ ዎጎይዳ ዎዚ ጌይ ፃኣፒንቴይ?” ጌዔኔ።

ዬይ ዎጎ ዔርዛሢ፥ “ፆኦሲ ዎጎይዳ ‘ኔ ጎዳ ፆኦዛሢ ጉቤ ዒኔፓ፥ ጉቤ ሼምፓፓ፥ ጉቤ ዎልቃፓ፥ ጉቤ ማሊፃፓ ናሽኬ፤ ኔ ላጋሢያ ኔና ማሂ ናሽኬ’ ጋዓኔ” ጌኤኔ። ዬያሮ ዬሱሴ፥ “ኔ ፒዜ ማሄኔ! ዬያ ማዺ ኩንሤ፤ ሼምፔና ኔ ናንጋንዳኔ” ጌዔኔ።

ጋዓንቴ ዎጎ ዔርዛሢ ፔና ጌኤሺ ማሃኒ ኮዓዖ፥ “ታ ላጋሢ ዖናዳይ?” ጌይ ዖኦጬኔ።

ዬያሮ ዬሱሴ ፔቴ ማዺንቴ ሃይሴ ኮኦኪንሢ ማሂ ኬኤዛዖ ሂዚ ጌዔኔ፦ “ፔቴ ዓይሁዴ ዓሲስኬይ ዬሩሳላሜፓ ዒያርኮ ዴንዳኔ።”

“ዬያ ዓሢ ጎይፆይዳ ሱላ ዴንቃዖ ዓርቂ ሼምፖማ ሌሊ ሃሺ ጳርቄስካፓ ዓኣ ባኮ ቢያ ቡሪ ዔኪ ዴንዴኔ።”

“ዬካፓ ኔጉዋዖ ዬኖ ጎይፆና ፔቴ ዓይሁዴ ቄኤሴስኬይ ሙኬኔ፤ ዬይ ካኣዦ ሱኡጋሢ ዬያ ቡሪንቲ ሃሣ ጳዺንቲ ላሄ ዓሢ ዴንቃዖ ዔኤቢ ዓቴኔ ጌዒ ማኣዱዋዖ ጱሪ ዴንዴኔ።”

“ጊንሣ ሃሣ ኔጉዋዖ ፔቴ ሌዊ ዓሲ ዒኢና ሙኬኔ (ዬና ሌዊ ዓሳ ጌኤዦ ማኣሮይዳ ቄኤሶ ማኣዲ ማዻ ዓይሁዴ ዓሲኬ።) ዬይ ሌዊ ዓሣሢያ ዬያ ጳዺንቲ ላሄ ዓሢ ማኣዱዋ ጱሪ ዴንዴኔ።”

“ዬኖ ጎይፆ ሄሊሲ ሙኬሢ ፔቴ ሳማሪያ ዓሲስኬያኬ (ሳማሪያ ዓሶ ጌይንታ ዓሳ ሜሌ ዓጮና ዎላ ዔፒና ሲኢሪንቴ ዓይሁዴ ዜርፆኬ። ሳማሪያ ዓሶና ዓይሁዶና ዎሊ ዒፂ ዱማዺ ናንጋያኬ።” ጋዓንቴ ዬይ ሳማሪያ ዓሢ ዬያ ጳዺንቲ ላሄ ዓሢ ዛጋዖ ሚጪንቴኔ፤ ዬያሮ ሙኪ ዓሢኮ ኪፆ ቱርጫና ቱኪ ማኣዴኔ።

“ዬካፓ ዬይ ሳማሪያ ዓሢ ዬያ ጳዺንቴ ዓሢ ሳዓፓ ዔቂሲ ፔ ሃሮ ቶጊሳዖ ሾኦጫ ዎርቃ ኬኤፆ ዔኪ ዴንዲ ማይሤኔ።”

“ዚሮ ጉቴሎ ሳማሪያ ዓሢ ፔ ጎይፆ ዴንዳሢሮ ሾኦጮ ማኣሮ ዎይሣሢም ሚኢሼ ዒንጋዖ፥ ‘ሃያ ዓሢ ታኣም ዛጊ ማይሤ፤ ሜሌ ሚኢሼያ ኔ ዒዛ ዛሎ ጪጌቴ ታ ኔኤም ማሂ ዒንጋንዳኔ’ ጌዔኔ።”

ዬካፓ ዬሱሴ ዎጎ ዔርዛሢ ኮይላ፥ “ኔኤም ዓይጎ ማላይ? ዬያ ሱሎና ጳዺንቴሢም ላጎ ማዔሢ ሃይሦ ዓሶፓ ዎያዳይ?” ጌዔኔ። ዒዚ ማሃዖ፥ “ሚጪንቲ ዒዛ ማኣዴሢሾ” ጌዔኔ። ዬያሮ ዬሱሴ፥ “ኔያ ዴንዳዖ ዒማይዴ” ጌዔኔ።