26. ዬሱሴ ማዾ ዓርቄሢ

ዬሱሴ ፃላሄ ባሼስካፓ ቤርታ ዒ ዓያኖ ጌኤዦ ዎልቆና ማዒ ናንጋ ጌሊላ ዓጮ ማዒ ዴንዲ ዒኢካ ሴካ ሃንጋ ሃንቲ ፆኦሲ ቃኣሎ ዔርዜኔ። ዬያሮ ዓሲ ቢያ ዒዛኮ ኩሾሞ ዛሎ ማርካዺ ኬኤዛኔ።

ዬካፓ ሃሣ ዬሱሴ ቤርታ ዒ ናንጌ፥ ናዚሬቴ ካታሞ ማዒ ዓኣዼኔ፤ ዓይሁዶኮ ሃውሾ ኬሎናኣ ካኣዦ ማኣሪ ዴንዴኔ። ዒማና ዒ ናባባንዳጉዲ ፆኦሲ ማሊፆ ኬኤዛ ዒሲያሴ ማፃኣፓ ዒንጊንቴኔ። ዬሱሴ ዬያ ማሪንቴ ማፃኣፖ ቡሊ ዛላ ቤሲ ዴሮም ናባቤኔ።

ዬሱሴ ናባቤ ቤዛ፥ “ማንቆ ዓሶም ኮዦ ሃይሴ፥ ዲዒንቲ ዔውቴ ዓሶም ዓይላቶፓ ኬስኪሢ ሃይሴ፥ ዓኣፓ ባይቄ ዓሶም ዛጊሢ ሃይሴ፥ ቱኡቲ ዓኣ ዓሶም ቡሊንቲሢ ሃይሴ ታ ኬኤዛንዳጉዲ ፆኦሲ ፔ ዓያኖ ታኣም ዒንጌኔ። ሃይ ናሽኪንታያ፥ ጎዳፓ ማዔ ሌዔኬ” ጋዓያኬ።

ዬካፓ ዬሱሴ ዴዓዛ ቢያሢ ዒዛ ጊዥ ጌይ ዛጊ ዓርቄኔ። ዔያቶም ዒማና ዒ ናባቤ ጎይፆማ ፆኦሲ ቃኣላ ካኣቱሞም ዶኦሞናሢ ዛላ ኬኤዛያኬ። ዬያሮ ዬሱሴ፥ “ዬይ ታ ዒንሢም ናባቤ ቃኣላ ጎኔ ማዒ ሃሢ ኩማኔ” ጋዓዛ ዴራ ቢያ ዲቃቲ ሄርሼኔ። ጋዓንቴ ዔያታ ጊንሣ፥ “ዓህ፥ ሃይ ዮሴፔ ናኣዚቱዋኣዓዳ?” ጌዔኔ።

ጊንሣ ሃሣ ዬሱሴ፥ “ፆኦሲ ማሊሢ ኬኤዛ ዓሲ ፔ ዓጫ ቦንቺንቱዋኣሢ ጎኔኬ፤ ፆኦሲ ማሊፆ ኬኤዛ ዔኤሊያሴ ዎዶና ዒስራዔኤሌይዳ ሚርጌ ዜኤሪንዶ ማዔ ላኣሊ ዓኣኔ። ጋዓንቴ ሃይሦ ሌዔና ዛላና ማዓያ ዒርዚ ዋርቂባኣያ ማዒፆና ሉማ ኬስኬሢሮ ፆኦሲ ዒስራዔኤሌፓ ሜሌ ዓጪዳ ዓኣ ሜታዼ ላኣሊስኬኖ ማኣዳንዳጉዲ ዳኬኔ” ጌዔኔ።

ዬሱሴ ቃሳዖ፥ “ፆኦሲ ማሊፆ ኬኤዛ ዔልሳዒ ዎዶናኣ ዒስራዔኤሌይዳ ዑስካ ኬስካ ዶርዓሢና ዓዺንቴ ሚርጌ ዓሲ ዓኣንቴ ዔልሳዒ ዔያቶፓ ፔቴ ዓሲታዎ ዓውሲባኣሴ። ጋዓንቴ ዒስራዔኤሌ ዓሶኮ ሞርኬ ማዔ፥ ዖሎ ዓሶ ዓይሣ ኒዒማኔ ጎዖሢ ሌሊ ፓሤኔ” ጌዔኔ። ዒማና ዬሱሴ ጋዓ ባኮ ዋይዛ ዓሳ ዓይሁዴ ዓሲኬ፤ ዬያ ዒ ጋዓሢ ዋይዛዖ ዬያታ ዻጋዼኔ።

ዬያሮ ናዚሬቴ ካታሞ ዴራ ዬሱሴ ካኣዦ ማኣራፓ ጎቺ ዔኪ ጎኦቢ ሂዒ ዳካኒ ፔቴ ዹካ ኬሴኔ። ጋዓንቴ ዬሱሴ ዬያ ዴሮኮ ባኣኪና ዔያታ ዔሩዋ ጎይሢ ቶሊ ኬስኪ ካታሞ ዴንዴኔ።

ዬካፓ ዬሱሴ ጌሊላ ዓጮ ቢያ ሃንቴኔ፤ ሚርጌ ዴሬያ ዒዛ ባንሢ ሙኬኔ። ዬይ ዓሳ ዒዛ ኮይላ ዓኣፒ ባይቄያ፥ ቶኪ ዎቢ ሃንቱዋያ፥ ዋይዚ ባይቄያ፥ ዻንጋ ጌስቱዋና ዬያጉዴ ዱማ ዱማ ሃርጌና ዓኣ ሚርጌ ዓሲ ዔኪ ዬዔኔ።

ሃሣ ፑርታ ዓያና ዓርቄም ዣኣሽካ ዓሲያ ዴራ ዔኪ ዬሱሴ ኮይላ ሙኬኔ። ዬያ ፑርቶ ዓያኖ ዬሱሴ ኬስካንዳጉዲ ቢታንቶና ዓይሤም ዓሶፓ ኬስኬኔ፤ ኬስካ ዎዶና ዬይ ፑርቶ ዓያና ባሼሢ፥ “ኔኤኒ ፆኦሲ ናኣዚኬ!” ጌይ ዒላታኔ። ዴራኣ ዬያ ዛጋዖ ዲቃቲ ሄርሺ ፆኦሲ ቦንቺ ካኣሽኬኔ።

ዬሱሴ ያዺዴስካፓ “ዒዛ ጊንፆ ሃንታዞንሢ” ጌይንቴ ታጶ ላምዖ ዓሲ ዶኦሬኔ። ዬያታ ጊንፃፓ “ፆኦሲ ማዾም ዳኪንቴዞንሢ” ጌይንታንዳያ ሄላንዳኣና ዒዛና ዎላ ሃንቲ ዒዛፓ ሚርጌ ባኣዚ ታማሪ ዔሬኔ።