25. ዬሱሴ ዎይታቴያ ዛጋኒ ፃሌኮ ጌሺፆ

ዬሱሴ ዋኣፆና ማስቴስካፓ ኔጉዋዖ ዓያና ጌኤሺ ዒዛ ዔኪ ዓሲ ናንጉዋ ዳውሎ ዴንዴኔ፤ ዒኢካ ዒዚ ዖይዲታሚ ሮኦሪና ዋኣንቴና ሙኡዚ ሃሺ ፆኦሜኔ። ዬካፓ ፃላሄ ጎሜ ማዺሻኒ ኮዒ ዬሱሴ ኮራ ሙኪ ጌሼኔ።

ፃላሄ ዬሱሴ ኮራ፥ “ኔኤኒ ሂንዳ ፆኦሲ ናይታቴ ሙዓኒ ሃያ ሹጮ ካሣ ማሄ” ጌይ ማልቴኔ።

ዬሱሴ ጋዓንቴ፥ “ ‘ዓሲ ሼምፔና ናንጋኒ ካሣ ሌሊ ኮይሱዋሴ፤ ፆኦሲ ኬኤዛ ቃኣላ ኮይሳያኬ’ ጌይንቲ ጌኤዦ ማፃኣፖይዳ ፃኣፒንቴኔ” ጌዔኔ።

ዬካፓ ሃሣ ፃላሄ ዬሱሴ ዔኪ ጌኤዦ ማኣሮኮ ሙስኩላ ኬሲ ዔቂሳዖ፥ “ኔ ሂንዳ ፆኦሲ ናይታቴ ኔና ሊካ ኬኤሬ፤ ዓይጎሮ ጌዔቴ፥ ‘ሹጫ ኔኤኮ ቶኮ ዹቁዋጉዲ ዓርቂ ዓይሳኒ ፆኦሲ ፔ ኪኢታንቾ ዓይሣንዳኔ’ ጌይንቲ ፃኣፒንቴኔ” ጌዔኔ።

ጋዓንቴ ዬሱሴ ፆኦሲ ቃኣላፓ ዔኪ ኬኤዚ ኬኤዚ ፃላሄ ማኬኔ። ዒዚ ጋዓዖ፥ “ጌኤዦ ማፃኣፖይዳ ‘ኔ ጎዳ ፆኦዛሢ ዎይታቴያ ዛጋኒ ጌሺፖ’ ጌይ ዴሮም ኬኤዞናኔ” ጌዔኔ።

ዬካፓ ሃሣ ፃላሄ ሃያ ዓጮኮ ካኣቱሞንታ ቦንቾንታ ቢያ ዬሱሴ ዻዋዖ፥ “ሎኦሚ ላሂ ኔ ታኣም ዚጌቴ ሃያ ቢያ ታ ኔኤም ዒንጋንዳኔ” ጌዔኔ።

ዬሱሴያ፥ “ፃላሄ፥ ሴካ ሺኢኬ! ጌኤዦ ማኣፃኣፖይዳ ዴሮም ‘ኔ ጎዳ ኔ ፆኦዛሢም ዚጌ፤ ዒዛ ሌሊ ካኣሽኬ’ ጌይ ዓይሦናኔ” ጌዔኔ።

ያዺ ማዒፆና ዬሱሴ ፃላሄም ባሺንቲ ኩቺ ዒንጊባኣሴ፤ ዬያሮ ፃላሄ ዒዛ ዻካሮ ሃሺ ዴንዴኔ። ዬካፓ ፆኦሲ ኪኢታንቻ ሙኪ ዬሱሴ ማኣዴኔ።