24. ዮሃኒሴ ዬሱሴ ዋኣፆና ማስኬሢ

ዛካሪያሴና ዔልሳቤፆናኮ ናዓሢ፥ ዮሃኒሴ ዑጊ ፆኦሲ ማሊሢ ኬኤዛያ ማዔኔ። ዬካፓ ዒ ዓሲ ናንጉዋ ቦኦሎ ዴንዲ ዑቶ ዔኤሲንታ ዓቢሢያ ሙዒ ሙዒ ናንጌኔ፤ ዒ ጋኣሎ ጋፓኔና ኮሺንቴ ማኣዖ ማይንቲ ኬርና ቃልሾ ቱካኔ።

ዒማና ሚርጌ ዴሬ ዮሃኒሴ ጋዓሢ ዋይዛኒ ዬያ ዓሳ ናንጉዋ ቦኦሎ ሙኬኔ። ዒዚያ ዔያቶም፥ “ፆኦሲ ካኣቱማ ዑኬሢሮ ጎሞ ዒንሢኮ ቡኡፁዋቴ” ጌዒ ዼጊዲ ኬኤዜኔ።

ዴራ ዬያ ዮሃኒሴ ኬኤዛ ባኮ ዋይዜስካፓ ሚርጌሢ ጎሞ ፔኤኮ ቡኡፄኔ፤ ዮሃኒሴያ ዔያቶ ዋኣፆና ማስኬኔ። ዓይሁዶ ካኣዦኮ ሱኡጌ ማዓ ሚርጌ ዓሲያ ዮሃኒሴ ኮራ ዋኣፆና ማስቶሮ ሙኬኔ፤ ጋዓንቴ ዔያታ ጎሞ ፔኤኮ ቡኡፂባኣሴ።

ዒማና ዮሃኒሴ ዬያ ካኣዦኮ ሱኡጎ ማዓ ዓሶም፥ “ዒንሢ ሃይ ሾኦዣ! ጎሞ ዒንሢሲ ቡኡፂ ዒንሢ ሃንታ ጎይፆዋ ላኣሙዋቴ፤ ኮሺ ዓኣፒ ዓኣፑዋ ሚሢ ቢያ ቲቂንቲ ታሚዳ ዓጊንታንዳኔ” ጌዔኔ። ዮሃኒሴ ዬያይዲ ፆኦሲ ማሊፆ ኬኤዛ ዓሳ “ሃይሾ፥ ኔኤኮ ጎይፆ ጊኢጊሻንዳ ታኣኮ ኪኢታ ዓሲ ታ ዳካንዳኔ” ጌዔሢ ኩንሤኔ።

ፔቴ ፔቴ ዓይሁዶ ዓሳ ዒዚ ካኣቱሞም ዶኦሞናሢ (ሜሲሄ) ታቴ ጌይ ዮሃኒሴ ዖኦጬኔ። ዮሃኒሴ ጋዓንቴ፥ “ታኣኒ ካኣቱሞም ዶኦሞናሢቱዋሴ፤ ጋዓንቴ ታኣኮ ጊንፃፓ ሙካንዳ ፔቴ ዓሲ ዓኣኔ። ዬይ ታኣኒ ዒዛኮ ቶኮ ዱርዞ ሱዞታዖ ቡላኒ ኮይሱዋ ዼኤፒ ቦንቺንታያኬ” ጌዔኔ።

ሄሊሴ ኬሎ ዬሱሴ ዮሃኒሴ ኮራ ዋኣፆ ማስታኒ ዬዔኔ። ዮሃኒሴ ዒዛ ዴንቃዖ፥ “ሃያ ዛጉዋቴ! ሃይ፥ ዓጪ ዴሬኮ ጎሞ ጌኤሻ ፆኦሲ ማራይኬ!” ጌዔኔ።

ዮሃኒሴ ዬሱሴ ኮራ፥ “ታ ኔና ዋኣፆና ማስካኒ ታኣኒ ጊዳ ዓሲቱዋሴ፤ ኔናኬ ታና ማስካኒ ኮይሳሢ” ጌዔኔ።ዬሱሴ ጋዓንቴ፥ “ማዻኒ ኮይሳ ፒዜ ማዾታሢሮ ኔ ታና ማስካኒ ኮይሳኔ” ጌዔኔ። ዬሱሴ ፔቴታዖ ጎሜ ማዺባኣቴያ ዮሃኒሴ ዬሱሴ ዋኣፆና ማስኬኔ።

ዬሱሴ ዋኣፆና ማስቲ ኬኬስካኣና ፆኦሲኮ ዓያና ዶኦሌ ማሎና ኬዲ ጴዺ ዒዛ ዑፃ ዴዔኔ። ዒማና ፆኦሲኮ ዑኡሲ ጫሪንካፓ፥ “ኔኤኒ ታ ኔና ናሽካ፥ ታኣኮ ናዓሢኬ፤ ታ ኔ ዛሎና ሚርጌ ዎዛዻኔ” ጌዔኔ።

ፆኦሲ ዮሃኒሴም፥ “ዓያና ጌኤሺ ኬዲ ኔኤኒ ዋኣፆና ማስካ ዓሢ ዑፃ ዴዓንዳኔ፤ ዬይ ዓሢ ፆኦሲ ናይኬ” ጌይ ቤርታ ኬኤዚናኣኮኬ። ፔቴ ፆኦሲ ሌሊ ዓኣኔ። ጋዓንቴ ዮሃኒሴ ዬሱሴ ዋኣፆና ማስኬያና ፆኦሲ ዓዴ ጌስታሢ ዒ ዋይዜኔ፤ ፆኦሲ ናዖዋ ዒ ዛጌኔ፥ ዬይ ዬሱሴኬ፤ ዓያኖ ጌኤዦዋ ዒ ዴንቄኔ።