23. ዬሱሴኮ ሾይንቶ

ማይራማ ዒማና ዮሴፔ ጌይንታ ፂሎ ዼጌስኬይ ዒዞ ዖኦጫያኬ፤ ዬያሮ ዒዛኮ ዖኦጮዛ ማይራማ ጎጲ ዔኬሢ ዒ ዋይዛዖ ናዓ ዬይ ዒዛሮቱዋኣሢ ዔሬኔ። ያዺ ማዒፆና ማይራሞ ዒ ዻውሲሳኒ ኮይባኣሢሮ ዓሲ ዔሩዋንቴ ዴሜና ዒዞ ሃሻኒ ኮዔኔ። ጋዓንቴ ዮሴፔ ዬያ ማዻንዳሢኮ ቤርታ ፆኦሲ ኪኢታንቻ ሙኪ ዒዛም ኬኤዜኔ።

ዬይ ኪኢታንቻሢ ኬኤዛዖ፥ “ዮሴፔ፤ ኔ ዖኦጫ ማይራሞ ዔኪፆ ዒጊጪፖ። ዒዛ ጎጳዼሢ ዓያና ጌኤሺፓ ማዔያኬ። ዒዛ ዓቲንቄ ናይ ሾዓንዳኔ፤ ሱንፆዋ ኔ ዒዛኮ ዬሱሴ ጌይ ጌሤ (ዬሱሴ ጌይፃ፦ ‘ቢያ ባኮ ዎይሣ ጎዳ (ያህዌ) ዓውሳያኬ’ ጌይሢኬ) ጌዔኔ፤ ዒዚያ ዓጮ ዴሮ ጎማፓ ዓውሳንዳኔ” ጌዔኔ።

ዬያሮ ዮሴፔ ማይራሞ ዔኬኔ፤ ጋዓንቴ ዒዛ ሾዓንዳያ ሄላንዳኣና ዒዞና ላሂባኣሴ።

ማይራሞኮ ሾይፆ ዎዳ ሄሌንቴ ሮሜ ዓጮ ካኣቲ ዴራ ቢያ ፓይዲንታኒ ቤርታ ሾይንቴ ካታሞ ካታሞ ዴንዶንጎ ጌይ ዓይሤኔ። ዬያሮ ዮሴፔና ማይራሞና ዔያታ ናንጋ ናዚሬቴ ካታማፓ ሚርጌ ኬሊ ሃንቲ ቤኤቴሌሄሜ ካታሞ ዴንዴኔ፤ ዓይጎሮ ጌዔቴ ዬና ካታማ ዔያቶኮ ቤርታኣ ማዓሢ፥ ዳውቴ ካታሞታሢሮኬ።

ቤኤቴሌሄሜ ዔያታ ሄላዖ ዎርቆንዶ ኬኤሲ ባይዜኔ፤ ዬያሮ ቆልሞ ዎርቃ ሞኦሢ ጌሌኔ። ዬኖ ዋንቶ ማይራሞ ሾይፃ ዓርቄም ሾዓዖ ላይሦንዶ ቤዛ ባይቄሢሮ ባኣቶ ጎንጋሎይዳ ናዖ ላይሤኔ፤ ሱንፆዋ ናዓሢኮ “ዬሱሴ” ጌይ ጌሤኔ።

ዬኖ ዋንቶ ሃሣ ዒኢካ ቦኦሎይዳ ቆልሞ ሄንቂ ዎርቄ ቆልሞ ናይ ዓኣንቴ ዔያታ ዔሪባኣ ጎይሢና ፖፖዓ ፆኦሲ ኪኢታንቾ ጴዼሢሮ ዔያታ ዒጊጬኔ። ኪኢታንቻሢ ጋዓንቴ፥ “ዲቃቲፖቴ፤ ታ ዒንሢም ኬኤዛንዳ ኮሺ ሃይሴ ዓኣኔ። ካኣቱሞም ዶኦሚንቴ፥ ጎዳሢ ቤኤቴሌሄሜይዳ ሾይንቴኔ!” ጌዔኔ።

ሃሣ ዒ ኬኤዛዖ፥ “ዴንዲ ናዓሢ ኮዑዋቴ፤ ቱርጫና ካንቂ ባይ ጎንጋላይዳ ላይሦናንቴ ዒንሢ ዴንቃንዳኔ” ጌዔኔ። ሃሣ ዔርቲባኣንቴ ጫሪንጫ ፆኦሲ ኪኢታንቾና ኩሜኔ፤ ዬያታ ፆኦሲ ጋላቲ ጋላቲ፥ “ቦንቾ ጫሪንጮይዳ ፆኦሲም ማዖንጎ! ዓሲማኣ ሳዖይዳ ኮሹሞ ማዖም!” ጋዓኔ።

ቆልሞ ናኣታ ዑኬና ዴንዳዖ ኪኢታንቻሢ ጌዔ ጎይፆማ ናዓሢ ባኣቶ ጎንጋላ ላሂ ዓኣንቴ ዴንቂ ሚርጌና ዎዛዼኔ። ማይራማኣ ሚርጌና ዎዛዼኔ። ዬካፓ ቆልሞ ናኣታ ዔያታ ዋይዜ ባኮንታ ዛጌ ባኮንታሮ ቢያ ፆኦሲ ጋላቲ ጋላቲ ጊንሣ ሞኦፆ ማዒ ዴንዴኔ።

ዻካ ጋዓዖ ሃኬ፥ ዓባ ኬስካ ባንፃ ዓኣ ዔሮ ዓሳ ጫሪንጮይዳ ፔቴ ዦኦጌ ዴንቄኔ። ዬይ ዓይሁዶኮ ዓኪ ካኣቲ ሾይንቴያ ማዒፆ ዻዋሢያ ዔያታ ዔሬኔ። ዬያሮ ዔያታ ዬያ ካኣታሢ ዛጋኒ ሚርጌ ኬሊ ዦኦጋሢ ዛጊ ዛጊ ሃንቲ ቤኤቴሌሄሜ ሙካዖ ዬሱሴንታ ዒዛኮ ዒንዶንሢያ ዓኣ ማኣሮ ዴንቄኔ።

ዬያታ ዔሮ ዓሳ ዬሱሴንታ ዒንዶዋ ዴንቃዖ ሳዓ ሎኦሚ ላሂ ዚጌኔ፤ ዬሱሴም ሚርጌና ቦንቺንታ ዒንጎ ባኣዚያ ዒንጌኔ፤ ዬካፓ ፔ ዓጮ ዔያታ ማዒ ዴንዴኔ።