20. ዒስራዔኤሌ ዴሮኮ ዲዒንቲፆና ዲዒንቶፓ ማዒፆ

ዒስራዔኤሌ ካኣቶንታ ዪሁዳ ካኣቶንታ ዎሊ ዑፃ ፆኦሲ ዖዪሳ ጎሜ ማዼኔ። ፆኦሲ ዔያቶም ማዻንዳኔ ጌይ ሲና ዹኮይዳ ጫኣቄ ጫኣቁሞንታ ዒንጊንቴ ዎጎዋ ካፖ ዒፂ ዳኣቄኔ። ዬያሮ ፆኦሲ ዔያታ ዬያ ጎሞ ማዻፓ ሃሺ ማዓንዳጉዲና ጊንሣ ፆኦሲ ካኣሽካንዳጉዲ ላቲ ኬኤዞም ዒዛ ማሊፆ ኬኤዛ ዓሶ ዳኬኔ፤ ዴራ ጋዓንቴ ዬያ ዋይዚ ዓይሢንቲባኣሴ።

ያዺ ማዔሢሮ ፆኦሲ ዔያቶኮ ሞርኮ ኩጫ ዓኣሢ ዒንጊሢና ላምዖ ካኣቶይዳ ሜቶ ዓጌኔ። ዎልቄና ዼኤፒ ማዔ ዓሶኦሬ ካኣቲ ሙኪ ዒስራዔኤሌ ካኣቶ ዖሊ ባሼኔ፤ ሚርጌና ቦንቺንታያ ማዔ ሚኢሾዋ ቡሪ ዔኪ ዴንዴኔ፤ ዺቢ ዓጪያ ሚቺ ባይዜኔ።

ዓሶኦሬ ዓሳ ዒስራዔኤሌ ዓሶኮ ሱኡጎ፥ ዖርጎጮ ዓሶ፤ ዬያጉዲ ሃኣሚ ማዒ ማዾ ማዻ ዓሶዋ ቢያ ዔኪ ፔ ዓጮ ዴንዴኔ። ዎዺንቱዋዖ ሃሣ ዲዒንቱዋዖ ዓቴዞንሢ ሚርጌና ኩፒ ማዔ ዒስራዔኤሌ ዓሶ ሌሊኬ።

ዬካፓ ዓሶኦሬ ዓሳ ዒስራዔኤሌ ዓጮይዳ ሜሌ ዴሬ ሙኪ ናንጋንዳጉዲ ዔኪ ዬዔኔ። ዬይ ሜሌ ዴራ ዒስራዔኤሌኮ ሻሂንቴ ካታሞ ካታሞ ጊንሣ ዶዲሺ ማዢ፥ ዒኢካ ዓቴ ዒስራዔኤሌ ዓሶ ዔኪያ ዔኪ ሎዒያ ሎዔኔ። ዬያ ሜሌ ዴሮና ዎላ ሲኢሪንቴ ዴራ ሳማሪያ ዓሶ ጌይንቴኔ።

ዒስራዔኤሌ ካኣታ ፆኦሲም ጉሙርቂንቲባኣያ፥ ሃሣ ዓይሢንቲባኣያ ማዔሢሮ ፆኦሲ ዔያቶ ዎያጉዴ ሜቶይዳ ዓጌቴያ ዪሁዳይዳ ዓኣ ዴራ ዛጌኔ። ያዺ ማዔቴያ ዪሁዳ ዴራ ካኣናኔ ዓጮ ዓሳ ካኣሽካ ፆኦዞዋ ቃሲ ሜሌ ፆኦዞ ካኣሽኬኔ። ፆኦሲ ዔያቶ ጎሪ ማሃኒ ዒዛ ማሊፆ ኬኤዛ ዓሶ ዳኬንቴያ ዔያታ ዬያ ዔኤቢኬ ጌይ ዔኪባኣሴ።

ዓሶኦሬ ዓሳ ዒስራዔኤሌ ካኣቶ ዓጮ ዖሊ ባይዜሢኮ ፄኤታ ሌዔኮ ጊንፃ ዪሁዳ ካኣቶ ዓጮ ዖላንዳጉዲ ፆኦሲ ባብሎኔ ዴሮ ዳኬኔ። ባብሎኔ ዒማና ሚርጌና ዎልቃዻ ካኣቶ ዓጪኬ፤ ዬያሮ ዪሁዳ ዓጮ ካኣቲ ባብሎኔ ካኣቲ ናብካዳናፆኦሬም ዓይሌ ማዒ ማዻኒ፥ ሃሣ ሌዓ ሌዓ ሚርጌ ሚኢሼ ጊኢራኒ ዔኤዔኔ።

ጋዓንቴ ዻካ ሌዔኮ ጊንፃ ዪሁዳ ካኣቶ ዓጫ ካኣቲ ናብካዳናፆኦሬም ዋይዞ ዒፄኔ። ዬያሮ ባብሎኔ ዓጮ ዓሳ ጊንሣ ሙኪ ዪሁዳ ዓጮ ዖሊ፥ ዬሩሳላሜ ካታሞዋ ባሺ ዓርቄኔ፤ ፆኦሲም ዱማዼ ጌኤዦ ማኣሮ ሻሂ ባይዚ ካታሞንታ ዬያ ጌኤዦ ማኣሮይዳ ዓኣ ባኮ ቢያ ቡሪ ዔኪ ዴንዴኔ።

ዪሁዳ ካኣቲ ናብካዳናፆኦሬም ዋይዞ ዒፄሢሮ ሻርሻኒ ኮዒ ዪሁዳ ካኣቲኮ ናኣዚ ቶይዲ ዒዛኮ ቤርታ ዎዼኔ፤ ዪሁዳ ካኣቲኮዋ ዓኣፖ ዋቂ ኬሲ ባይዜኔ። ዬካፓ ዪሁዳ ካኣቲ ባብሎኔ ዓጫ ቱኡዞ ማኣራ ቱኡቲ፥ ዒኢካ ሃይቃንዳጉዲ ዔኪ ዴንዴኔ።

ናብካዳናፆኦሬንታ ዒዛኮ ዖሎ ዓሶንታ ኩፒ ማዔ ዓሳ ፔ ዓጫ ዓቲ ሳዖ ጎሽኪ ጎሽኪ ዴዓንዳጉዲ ሃሻዖ ባሼ ዺቦ ዪሁዳ ዴሮ ባብሎኔ ዔኪ ዓኣዼኔ። ዒስራዔኤሌ ዴራ ዔያቶም ዎዛ ማሂ ዒንጊንቴ ዓጮ ሃሺ ዴንዳንዳጉዲ ዎልቄና ዔውቴሢ “ዲዒንቲ” ጌይንቴኔ።

ዎዚ ፆኦሲ ዴሮ ዔያታ ማዼ ጎሞሮ ዲዒሲ ዔኪ ዳኪ ሜቶይዳ ዓጌቴያ ዔያቶንታ ዔያቶም ማዻንዳኔ ጌይ ጫኣቄ ጫኣቁሞዋ ዋሊባኣሴ። ፆኦሲ ፔ ዴሮ ካፒፆንታ ዒዛ ማሊፆ ኬኤዛ ዓሶዋ ዳኪፆ ዴራ ዴንዴ ቤዛታዖ ሃሺባኣሴ። ላንካይታሚ ሌዔኮ ጊንፃ ዔያቶሮ ማሂ ዒንጊንቴ ዓጮ ዔያታ ማዓንዳሢ ሃጊ ማዓንዳ ዎዛ ማሂ ኬኤዜኔ።

ላንካይ ሌዔ ማዓ ዎዴይዳ ፓሪሴ ካኣቲ ባብሎኔ ዖሊ ባሼኔ፤ ዬያሮ ፓሪሴ ካኣቲ ባብሎኔ ካኣቲ ቤዛ ማዒ ዓጮ ዎይሤኔ። ሃሢ ዒስራዔኤሌ ዓሶ ጌይንታ ዓሳ ዓይሁዴ ዴሬ ጌይንቴኔ፤ ባሼ ዓሳ ሚርጌ ሌዔ ናንጌሢ ባብሎኔይዳኬ። ዻካ ጋርቺ ዓሲ ሌሊ ዪሁዳ ዓጮ ጶቂሢ ዔሬኔ።

ፓሪሴ ካኣቲ ሚርጌና ዶዲ ዎልቄና ዓኣያኬ፤ ጋዓንቴ ዒ ዖሊ ባሺ ዓርቄ ዴሮም ሚጪንታኔ። ቂኢሮሴ ጌይንታ ካኣቲ ፓሪሴይዳ ካኣታዼንቴ ዻካ ሌዔኮ ጊንፃ ዪሁዳ ዓጮ ማዓኒ ኮዓ ዓይሁዴ ዓሲ ቢያ ዴንዳኒ ዳንዳዓሢ ኬኤዜኔ። ፆኦሲም ዱማዼ ጌኤዦ ማኣሮ ጊንሣ ጊኢጊሺ ማዣንዳጉዲ ሚኢሼያ ዓይሁዶም ዒንጌኔ። ዬያሮ ዓይሁዶ ዓሳ ዲዒንቶይዳ ላንካይታሚ ሌዔ ዴዔስካፓ ዻካ ዛላ ዓይሁዴ ዓሲ ዪሁዳይዳ ዓኣ ዬሩሳላሜ ካታሞ ማዒ ዴንዴኔ።

ዓይሁዶ ዴራ ዬሩሳላሜ ሙኪ ሄላዖ ፆኦሲም ዱማዼ ጌኤዦ ማኣሮንታ ካታሞዋ ጊንሣ ዓካሲ ኮሼኔ። ዎዚ ዔያታ ሜሌ ዴሬ ዴንካ ዎርቄቴያ ላሚ ጊንሣ ማዒ ሙኪ ዔያቶም ዒንጎና ዓጬሎይዳ ናንጊ፥ ጌኤዦ ማኣሮይዳኣ ፆኦሲ ካኣሽኬኔ።