19. ፆኦሲ ማሊፆ ኬኤዛ ዓሶ

ዒስራዔኤሌ ዴራ ናንጌ ዎዶይዳ ቢያ ፆኦሲ ፔ ማሊፆ ኬኤዛ ዓሶ ዳኬሢ ኬኤዚንቴኔ። ዬያታ ዓሳ ፆኦሲ ጋዓ ባኮ ፆኦሲፓ ዋይዚ፥ ዬያ ኪኢቶ ዴሮም ኬዛኔ።

ዓክዓቤ ዒስራዔኤሌይዳ ካኣታዼያና ፆኦሲ ማሊፆ ኬኤዛሢ ዔኤሊያሴኬ። ዬይ ዓክዓቤ ጎዖሢ ዴራ ባዓኣሌ ጌይንታ ሜሌ ፆኦዞ ካኣሽካንዳጉዲ ዴሮ ዔቂሴ፥ ፑርታ ካኣቶኬ። ዬያሮ ዔኤሊያሴ ዓክዓቤም፥ “ታኣኒ ጊንሣ ማሂ ኬኤዛንዳያ ሄላንዳኣና ዒስራዔኤሌይዳ ፔቴታዖ ዒርዚ ዋርቃዓኬ” ጌዔኔ። ዬይ ዓክዓቤ ሚርጌና ዻጋሴኔ።

ዔኤሊያሴ ዒዛ ዎዻኒ ኮዓ ዓክዓቤፓ ፑኒ ዓሲ ናንጉዋ ቦኦሎይዳ ዓኣ ፔቴ ዎርዚስኬኖ ዴንዳንዳጉዲ ፆኦሲ ዒዛም ኬኤዜኔ። ዬኖ ቤዞይዳ ዒ ዓኣንቴ ሳዓ ሃባርታኣና ሃባርታኣና ካፒ ዒዛም ካሣንታ ዓሽኪያ ዔኪ ዬዓኔ። ዬያሮ ካኣቲ ዓክዓቤና ዖሎ ዓሶና ዔኤሊያሴ ኮዔኔ፤ ጋዓንቴ ዔያታ ዒዛ ዴንቃኒ ዳንዳዒባኣሴ። ዬይ ናዮ ዎዳ ሚርጌ ዶዲ ዶዲ ዓኣዼሢሮ ጋፒንፆይዳ ዬና ዎሬላኣ ዓቱዋዖ ሚጬኔ።

ያዺ ማዔሢሮ ዔኤሊያሴ ዒኢካ ዑኬ ዓኣ ዓጪ ቤቴኔ። ዬኖ ዓጬሎይዳ ሉማሢ ዶዲፃፓ ዔቄያና ፔቴ ዜኤሪንዶስኬኖና ዒዞኮ ዻካ ናይስኬማናኮ ሙዖ ባኣዚ ጋፓኒ ዑኪ ዓኣያታንቴ ዔያታ ዔኤሊያሴም ሙኡዚ ካሢ ካሢ ዒንጌኔ። ዬያሮ ፆኦሲ ዬኖ ዓሴሎኮ ዺኢላ ቆኦሮይዳፓ፥ ዛይታኣ ዖታፓ ጋፑዋጉዲ ናጊሼኔ። ዬይ ናዮ ዎዳ ጋፓንዳያ ሄላንዳኣና ዔያቶኮ ሙኡዚ ባይቁዋዖ ዴዔኔ፤ ዔኤሊያሴያ ዒኢካ ሚርጌ ሌዔ ናንጌኔ።

ሃይሦ ሌዔና ዛላናኮ ጊንፃፓ ዒርዚ ዋርቃንዳያ ማዒፆ ዒስራዔኤሌ ዓጮ ዴንዲ ካኣቲ ዓክዓቤም ዔኤሊያሴ ኬኤዛንዳጉዲ ፆኦሲ ዒዛ ዓይሤኔ። ዬያሮ ዔኤሊያሴ ማዒ ሙካዛ ዓክዓቤ ዔኤሊያሴ ዴንቃዖ “ዔኤዞ ሜቶ ማዣ! ኔ ማዒ ሙኪባይ!” ጌዔኔ። ዔኤሊያሴ ማሃዖ፥ “ሜቶ ማዣ ጎዖንዶሢ ኔናኬ! ጎኔ ፆኦዛሢ ማዔ ቢያ ባኮ ዎሣ ጎዳ ኔኤኒ ሃሺ፥ ባዓኣሌ ጌይንታ ሜሌ ፆኦዞ ካኣሽኬኔ። ሃሢ ዓካሪ ዒስራዔኤሌ ዴሮ ቢያ ቄርሜሎሴ ዹካ ቡኩሴ” ጌዔኔ።

ዒማና ዒስራዔኤሌ ዓሳ ዖይዶ ፄኤታና ዶንጊታሚና ማዓ ባዓኣሌ ማሊፆ ኬኤዛ ዓሶዋ ዎላ ዔኪ ቄርሜሎሴ ዹካ ቡኬኔ። ዔኤሊያሴ ዴሮም፥ “ዋኣዺ ማይንቲ ማይንቲ ማሊፆ ዒንሢኮ ዒንሢ ሺርሻይ? ናንጊና ናንጋ ጎዳ ፆኦሲ ማዔቴ ዒዛ ካኣሽኪ ዒዛም ማዹዋቴ!” ጌዔኔ።

ዬካፓ ዔኤሊያሴ ባዓኣሌ ማሊፆ ኬኤዛ ዓሶም፥ “ፔቴ ዎፓና ሹኪጋፓ ፆኦሲም ዒንጎ ባኣዚ ማሂ ሺኢሹዋቴ፤ ጋዓንቴ ታሚ ዔኤሢፖቴ። ታኣኒያ ዒማይዳንዳኔ። ዒ ዋይዛያ ማዒፆ ዔርዛኒ ታሚና ኬዲ ጴዼሢ፥ ዬይ ጎኔ ፆኦሲኬ” ጌዔኔ። ዬያሮ ባዓኣሌ ቄኤሳ ዒንጎ ባኮ ሹኪ ሺኢሼኔ፥ ታሞ ጋዓንቴ ዔኤሢባኣሴ።

ዬካፓ ባዓኣሌ ማሊፆ ኬኤዛ ዓሳ፥ “ባዓኣሌ! ኑኡም ዋይዜ!” ጌይ ዑኡዞ ዼጊዲ ሺኢቄኔ። ዬያይዲ ሮኦሮ ጉቤ ዒላቲ ሺኢቄ ጎይሣ ፔኤቄኔ። ዔያታ ዒማና ፔኤኮ ዑፆ ዓፓሬና ሃኣዚ ሃኣዚ ሺኢቄኔ፤ ጋዓንቴ ፔቴታዖ ዔያቶ ሺኢጲፃ ዋይዚንቲባኣሴ።

ጋፒንፆይዳ ዔኤሊያሴ ፆኦሲም ሹኪ ዒንጎ ባኮ ሺኢሼኔ። ዬያኮ ቤርታ ዔኤሊያሴ ዴሮም ዓሽኮይዳ፥ ሃንፂሎይዳ፤ ጊንሣ ሃሣ ዒንጎ ባኮ ሺኢሾ ቤዞኮ ኮይሎይዳ ታጶ ላምዖ ኮሎሢ ዖቲ ዋኣሢ ዋሂ ሳዖ ዋኣሢ ሌሊ ማሂ ሃሻንዳጉዲ ኬኤዚናኣኮኬ።

ዬካፓ ዔኤሊያሴ ሺኢቃዖ፥ “ቢያ ባኮ ዎይሣ ጎዳሢዮ! (ያህዌ) ዓብራሃሜንታ ዪሳኣቄንታ ያይቆኦቤንታ ፆኦዛሢዮ! ኔኤኒ ዒስራዔኤሌኮ ፆኦሲ ማዔሢና ታኣኒያ ኔ ዓይሌ ማዒፆ ሃኖ ፔጋሲ ዻዌ። ኔኤኒ ጎኔ ፆኦሲ ማዔሢ ሃይ ዴራ ዔራንዳጉዲ ሺኢጲፆ ታኣሲ ዋይዜ” ጌዔኔ።

ዒማና ኔጉዋዖ ታሚ ጫሪንካፓ ኬዲ ዓሽኮ፥ ሃንፂሎ፥ ሹጮ፥ ኮይላ ዓኣ ቡኡሮ፤ ዬያጉዲ ዬያ ዒንጎ ባኮ ሺኢሾ ቤዞኮ ኮይላ ዋሆና ዋኣፆዋ ዓይሱዋዖ ላኣዒ ሙዔኔ። ዴራ ዬያ ዛጋዖ ሳዓ ሎኦሚ ላሂ፥ “ቢያ ባኮ ዎይሣ ጎዳሢ ጎኔ ፆኦሲኬ! ዒ ጎኔ ፆኦሲኬ!” ጌዔኔ።

ዬካፓ ዔኤሊያሴ፥ “ባዓኣሌ ማሊፆ ኬኤዛ ዓሶፓ ፔቴ ዓሲታዖ ቶሊ ዴንዱዋጉዲ!” ጌዔኔ። ዬያሮ ዴራ ባዓኣሌ ማሊፆ ኬኤዛ ዓሶ ቢያ ዓርቂ ዔኪ ዴንዲ ዎዼኔ።

ዔኤሊያሴያ ካኣቲ ዓክዓቤም፥ “ዒራ ሙኪናኣኮኬ፤ ዬያሮ ዑኬና ካታሞ ማዒ ዴንዴ” ጌዔኔ። ዒማና ጫሪንጫ ኔጉዋዖ ካርሤኔ፤ ዎልቄና ዓኣ ዒርዚያ ዋዺ ዓርቄኔ። ቢያ ባኮ ዎይሣ ጎዳሢ (ያህዌ) ጎኔ ፆኦሲ ማዔሢ ዬያይዲ ዔርዜኔ።

ዔኤሊያሴ ማዼ ዎዶኮ ጊንፃ ፆኦሲ ዒዛ ማሊሢ ኬኤዛያ ማሂ ዔልሳዒ ጌይንታሢ ዶኦሬኔ። ፆኦሲ ዔልሳዒ ዛሎና ሚርጌ ፔ ዎልቄና ማዺንታ ዓኪ ባኣዚ ማዼኔ። ዬያ ማዺንቴ ዓኮ ባኮይዳፓ ፔቴ ማዔሢ ዓይጎዳይ ጌዔቴ ዑፃ ኬስካ ዶርዖና ዓርቂንቴ ኒዕማኔ ጎዖ፥ ዖሎ ዓሶ ዓይሣስኬያ ዶርዓሢፓ ዻቂሺፆኬ። ዔልሳዒ ፆኦሲ ዎልቄና ዓኪ ባኣዚ ማዻሢ ኒዕማኔ ዋይዛዖ ዴንዲ ዒዛ ፓሣንዳጉዲ ዖኦጬኔ። ዒዚያ ዮርዳኖሴ ዎሮይዳ ላንካይ ማይንቲ ኬስኪ ጌሊ ጋዓንዳጉዲ ዔልሳዒ ዒዛ ዓይሤኔ።

ዔልሳዒ ዬያ ጋጋዓዛ ኒዕማኔ ኮራ ዬይ ዔኤዩሞ ሃይሴ ማሌሢሮ ዻጋዺ፥ ዬያይዳኒ ኮይባኣሴ። ጋዓንቴ ጊንፃፓ ዒዛኮ ዓይላሢ ዒዛ ዞሬም ፔ ማሊፆ ሺርሺ፥ ዔልሳዒ ጌዔ ጎይፆ ዮርዳኖሴ ዎሮይዳ ላንካይ ማይንቲ ኬስኪ ጌሊ ጌዔኔ። ጋፒንፃ ዒ ዋኣፆፓ ኬስካኣና ዑፃ ኬስካ ዶርዓሢፓ ዒ ጋፒ ጌኤሽኬኔ! ዬያይዲ ፆኦሲ ዒዛ ፓሤኔ።

ዬካፓ ፆኦሲ ዒስራዔኤሌ ዓሶም ዒዛ ማሊሢ ኬኤዛ ሚርጌ ዓሲ ዳኬኔ። ዬያታ ኪኢቶ ዓሳ ቢያ ዒስራዔኤሌ ዴራ ሜሌ ፆኦዞ ካኣሽኪፆ ሃሻንዳጉዲ፥ ዓሲም ፒዜ ዎጌ ዎጋንዳጉዲና ሚጪንታንዳጉዲ ኬኤዜኔ። ዴራ ፑርቶ ማዾ ሃሺ ፆኦሲም ዓይሢንቲባኣቴ ፆኦሲ ዔያቶ ዻቢንቴያ ማሂ ፑርታና ዎጋንዳሢ፥ ሜቶዋ ዔያቶይዳ ዓጋንዳሢ ላቲ ኬኤዜኔ።

ሚርጌ ዎዴ ዴራ ፆኦሲም ዋይዞ ዒፂ ጌኤታዻያ ማዔኔ። ፆኦሲ ማሊፆ ኬኤዛ ዓሶኮዋ ዔያታ ቶኦኮ ዛጋ ጎይፃ ኮሺቱዋሴ፤ ፔቴ ፔቴና ዔያታ ፆኦሲ ማሊፆ ኬኤዛ ዓሶ ዎዻኔ። ፔቴና ፆኦሲ ማሊፆ ኬኤዛ ዔርሚያሴ ዴራ ዎዻኒ ማሊ ዔቴይዳ ዔኪ ዓጌም ዒኢካ ዔቶይዳ ዓኣ ዾቃሌና ዒዚ ዓዺንቴኔ። ዬያሮ ዬኖ ዎዶና ዓኣ ካኣታሢ ዔርሚያሴም ሚጪንቲ ዬያፓ ጎቺ ኬሳንዳ ዓይሌ ዳኬኔ።

ዴራ ፆኦሲ ማሊፆ ኬኤዛ ዓሶ ዒፃያ ማዔቴያ ፆኦሲ ጋዓ ባኮ ኬኤዚፆ ሃሺባኣሴ። ዴራ ጎሞ ቡኡፂባኣቴ ፆኦሲ ዔያቶይዳ ሜቶ ዓጋንዳያታሢ ላቲ ኬኤዜኔ። ጊንሣ ሃሣ ፆኦሲ ዶኦሚንቴ ካኣቲ (ሜሲሄ) ዳካኒ ጫኣቄሢ ዴራ ጶቂሣንዳጉዲያኣ ኬኤዛኔ።