1. ማዢንቲ

ሃይካፓ ሊካ ኑ ዛጋሢ ቢያ ባኣዚ ማዢፆ ባራሪ ዓርቄሢ ፆኦሲ ማዒፆኬ። ያዺዲ ፆኦሲ ሳዖንታ ጫሪንጮንታ ዒኢካ ዓኣ ባኮዋ ቢያ ላሆ ኬሊ ጋርካ ማዤኔ። ሳዖ ፆኦሲ ማዤስካፓ ሳዓ ዹሚ ሃሣ ዔኤቢያ ፔቴታዎ ባኣያ ማዒ ዓኣኔ፤ ሳዖይዳኣ ሃጊ ፔቴታዖ ማዢንቴ ባኣዚ ባኣሴ። ያዺ ማዔቴያ ፆኦሲኮ ዓያና ዋኣፆ ዑፃ ዒማና ሴካ ሃንጋ ጋዓኔ።

ዬካፓ ፆኦሲ “ፖዒ ማዖንጎ” ጌዔም ማዔኔ። ፆኦሲያ ዬይ ፖዓ ኮሺ ማዔሢ ዛጋዖ “ሮኦሪ” ጌይ ሱንሢ ጌሤኔ። ፆኦሲ ሮኦሮ ዹሞፓ ዱማሳዖ ዹሞ “ዋንቴ” ጌይ ሱንፆ ጌሤኔ። ፆኦሲ ቤርታሳ ኬሎ ፖዒ ማዤኔ።

ላምሳ ኬሎና ፆኦሲ ጫሪንጮኮ ዑፃ ሌካ ዼጌ ዓኣ ጉሪ ቤሲ ማዤኔ፤ ያዺዲ ዒዚ ዋኣፆ ሌካ ዼጌ ዓኣ ጉሮ ቤዞፓ ዱማሴኔ።

ሃይሣሳ ኬሎና ፆኦሲ ፃኣዾ ዓጮይዳፓ ዋኣፆ ዱማሴኔ። ፆኦሲ ዬያ ፃኣዾ ዓጮ “ሳዓ”፥ ዋኣፆዋ “ዼኤፒ ባዚ” ጌዔኔ። ፆኦሲያ ዬይ ዒ ማዤ ባካ ኮሺ ማዔሢ ዛጌኔ።

ዬካፓ ፆኦሲ ሳዓ ቢያ ቶኦኪ ሚሢንታ ዱማ ዱማ ባቃላ ባኣዚያ ባቃልሶንጎ ጌዔኔ፤ ዒ ጌዔ ጎይፆዋ ማዔኔ። ዬይ ዒ ማዤ ባካ ኮሺ ማዔሢ ፆኦሲ ዛጌኔ።

ማዢፆኮ ዖይዳሳ ኬሎይዳ ፆኦሲ ዓቢ፥ ዓጊኒንታ ዦኦጋሢያ ማዤኔ። ፆኦሲ ሮኦራ፥ ዋንታ፥ ሌዖንታ ዱማ ዎዶዋ ፓቄኔ። ዬይ ዒ ማዤ ባካ ኮሺ ማዔሢ ፆኦሲ ዛጌኔ።

ዶንጋሳ ኬሎና ፆኦሲ ዋኣሢዳ ናንጋ ባኮንታ ካፖዋ ቢያ ማዤኔ። ዬይ ዒ ማዤ ባካ ኮሺ ማዔሢ ፆኦሲ ዛጌኔ፥ ማዢንቴ ባኮዋ ዓንጄኔ።

ላሃሳ ኬሎ ፆኦሲ “ሳዖይዳ ቢያ ቶኦኪ ቆሎንታ ቦዖዋ ዓኣያ ማዖንጎ” ጌዔኔ። ፆኦሲ ጌዔ ጎይፆ ማዔኔ። ዬያ ባኮይዳፓ ዛላ ባይ፥ ዛላ ሳዓና ጎቺንቲ ሃንታ ማዢንቲ፥ ዛላ ካይዚ ቦዖኬ። ፆኦሲያ ዬይ ኮሺ ማዔሢ ዛጌኔ።

ፆኦሲ ሃሣ “ዓሲ ኑኡኒ ኑ ማሎና ኑና ኮኦኪንሣያ ማሂ ማዦም፤ ዔያቶኮ ሳዖ ቢያይዳ፥ ጊንሣ ሃሣ ሼምፓ ዓኣ ቆሎንታ ዱማ ዱማ ቦዖንታኮ ቢያ ዑሢ ማዒ ዎይሣ ቢታንቶ ዓኣያ ማዖንጎ” ጌዔኔ።

ዬያሮ ፆኦሲ ሳዖ ዓጮይዳፓ ዔኪ ዓሲ ማሂ ማዢ፥ ሼምፖ ዑሲያ ዒንጌኔ። ዬያ ዓሢኮ ሱንፃ ዓዳኣሜ ጌይንቴኔ። ዓዳኣሜ ናንጋ ቤዞይዳ ፆኦሲ ዱማ ዱማ ዓኣፖዋ ሙሙዖ ሚሢ ቱኪ፥ ዬያ ባኮኮ ዓጮ ቦኦኪ ዋኣሢያ ዑሺ ሚዛጲሲ ቆላንዳጉዲ ዒኢካ ዒዛ ጌሤኔ።

ዬያ ሚፆ ባኣካ ፆኦሲ ላምዖ ዱማዻ ሚሢ ቱኬኔ፤ ዬንሢ ሚፆንሢ ናንጊ ዒንጋ ሚሢ፥ ኮሺና ፑርታና ዱማሲ ዔርዛ ዔራቶ ዒንጋ ሚሢ ጌይንታያኬ። ዓዳኣሜ ዬኖ ፑርቶና ኮዦና ዱማሳ ዔራቶ ዒንጋ ሚፄሎ ዓኣፓፓ ዓታዛ ሃንጎ ሚፆኮ ዓኣፖ ቢያ ኮዔሢ ጎይፆ ሙዓኒ ዳንዳዓሢ ፆኦሲ ዒዛም ኬኤዜኔ። ጋዓንቴ ዬኖ ፑርቶና ኮዦና ዱማሲ ዔርዛ ሚፆ ዓኣፔሎ ሙዔቴ ዒ ሃሃይቃንዳያታሢ ላቴኔ።

ዓሲ ፔኤሮ ሴሎ ማዒፃ ኮሺቱዋኣሢ ፆኦሲ ኬኤዜኔ። ዬያ ዱማ ዱማ ቆሎንታ ቦዖንታ ባኣካፓ ፔቴታዖ ዓዳኣሜ ማኣዳያ ማዓኒ ዳንዳዔይ ባኣሴ።

ዬካፓ ፆኦሲ ዓዳኣሜ ሃሃይቄጉዲ ጊንዒሼኔ፤ ያዺ ዒ ጊንዒ ዓኣንቴ ጎኦቦ ባራንፃፓ ፔቴ ሜጌሢ ዔኪ ላኣሊ ማሂ ማዣዖ ዓዳኣሜ ኮይላ ዔኪ ዬዔኔ።

ዓዳኣሜ ዒዞ ዴንቃዖ “ሃና ታና ቤዛ ማላያኬ፤ ዓቲንቄፓ ዒዛ ጴዼሢሮ ‘ላኣሊ’ ጌይንቶጎ” ጌዔኔ። ዬያሮ ዓሲ ዒንዶንታ ዓዶንታ ሃሺ ፔ ማቾና ዎላ ፔቴ ማዓኔ።

ፆኦሲ ዬያይዲ ዓቲንቄንታ ላኣሊንታ ፔ ማሎና ማዤኔ። ፆኦሲ ዔያቶ ዓንጄኔ፤ “ሚርጌ ናይ፥ ናይኮዋ ናይ ዒንሢኮ ዓኣያ ማዖንጎ፥ ሳዖዋ ኩሙዋቴ” ጌዔኔ። ፆኦሲ ዒ ማዤ ባካ ሚርጌና ኮሺ ማዔሢ ዛጌኔ። ቢያ ባኮናኣ ፆኦሲ ዎዛዼኔ፥ ዬይ ቢያ ላሆ ኬሊዳ ማዔኔ።

ላንካሳ ኬሎይዳ ፆኦሲ ማዢፆ ማዾ ቢያ ጋፒሴኔ፤ ዬያሮ ዬኖ ኬሎ ፆኦሲ ማዾ ሃሼኔ። ዬኖ ላንካሳ ኬሌሎ ዒ ዓንጄኔ፥ ፔኤማኣ ዱማሴኔ፤ ዓይጎሮ ጌዔቴ ዬኖ ኬሎ ማዾ ቢያ ጋፒሲ ዒ ሃሼሢሮኬ። ፆኦሲ ጫሪንጮንታ ሳዖንታ ዒኢካ ዓኣ ባኮዋ ቢያ ማዤያና ማዺንቴ ባካ ያዼኬ።