18. ዒስራዔኤሌኮ ፓቂንቴ ካኣቶ

ሚርጌ ሌዔኮ ጊንፃ ዳውቴ ሃይቄኔ፤ ናኣዚ ሴሎሞኔ ዒስራዔኤሌይዳ ካኣታዺ ዎይሢፆ ዓርቄኔ። ፆኦሲ ሴሎሞኔ ኮይላ ዒ ባሼ ዓይጎ ኮዓቴያ ዖኦጬኔ። ሴሎሞኔ ጋዓንቴ ዔራቶ ሺኢቄኔ፤ ዬያሮ ፆኦሲ ዒዛ ሳዖይዳ ዓኣ ዓሶፓ ቢያ ባሼ ጪንጫ ዓሲ ማሄኔ። ሴሎሞኔ ሚርጌ ባኣዚ ታማሪ ዔሪ ዔራቶና ጌኤሲ ቲቃያ ማዔኔ። ሃሣ ፆኦሲ ዒዛ ሚርጌ ዖርጎቼኔ።

ሴሎሞኔ ዒዛኮ ዓዴ ዳውቴ ዬሩሳላሜይዳ ፆኦሲም ዱማዼ ማኣሮ ማዣኒ ማሊ ጊኢጊሼ ባኮና ጌኤዦ ማኣሮ ማዤኔ። ዬያሮ ዴራ ዓፒሎና ማዢንቴ ማኣሮ ሃሺ ዬያ ፆኦሲም ዱማዼ ጌኤዦ ማኣሮይዳ ፆኦሲም ዒንጎ ባኮ ዒንጊ ዒንጊ ካኣሽኬኔ። ፆኦሲያ ዒኢካ ሙኪ ጴዼኔ፤ ዴሮና ዎላኣ ናንጌኔ።

ሴሎሞኔ ሜሌ ዴሮይዳፓ ማዔ ሚርጌ ላኣሊ ናሽኬኔ። ዬያሮ ዎሊ ዑፃ ሴካ ሺያ ማዓንዳ ላኣሊ ዔኪ ፆኦሲም ዋይዚ ዒፃያ ማዔኔ! ዬያቶፓ ዺቦ ላኣላ ሜሌ ዓጪፓ ሙኬያ ማዓዖ ካኣሽኮ ፆኦዞዋ ፔኤና ዎላ ዔኪ ዬዒ ካኣሽኪሢ ዓርቄኔ። ሴሎሞኔያ ጋርቼሢኮ ጊንፃ ዬያ ፆኦዞ ካኣሽሢዳ ጌሌኔ።

ዬያሮ ፆኦሲ ሴሎሞኔይዳ ዻጋዼኔ፥ ሴሎሞኔ ፆኦሲም ጉሙርቂንቱዋ ማዔሢሮ ዒዚ ሃይቄስካፓ ዒስራዔኤሌ ላምዖ ካኣቶ ማዒ ፓቂንታንዳሢ ፆኦሲ ኬኤዜኔ፤ ፆኦሲ ዒስራዔኤሌ ዓሶ ሻርሺሢሮ ዬያ ማዼኔ።

ሴሎሞኔ ሃይቄስካፓ ዒዛ ቤዛ ዒዛኮ ናኣዚ ሮቢዓሜ ካኣታዼኔ። ሮቢዓሜ ዔኤያ ዓሲኬ። ዒስራዔኤሌ ዴራ ጋዓንቴ ካኣቲ ኩሙሢና ካኣታሳኒ ሙኪ ቡኬኔ። ሴሎሞኔ ዔያቶ ሚርጌ ዴኤሢ ማዾ ማዺሼሢንታ ዺቢ ጊኢራኣ ጊኢሪሼሢ ዾንኪ ኬኤዜኔ።

ሮቢዓሜ ፔ ዔኤያቶና ማሃዖ፥ “ታ ዓዴ፥ ሴሎሞኔ ዒንሢ ሚርጌ ማዾ ማዺሼኔቱዋ ዒንሢ ጋዓሢ፤ ታ ዒዛስካፓ ባሼ ዴኤሢ ማዾ ዒንሢ ማዺሺባኣቴ ዛጉዋቴ፤ ዒዚ ዒንሢ ሻርሼስካፓ ባሼ ታ ዒንሢ ጳርቃንዳኔ” ጌዔኔ።

ዬያሮ ታጶ ዒስራዔኤሌ ፃጳ ሮቢዓሜም ዋይዞ ዒፂ ጌኤታዼኔ። ዓቴ ላምዖ ፃጶንሢ ሌሊ ካኣቲ ሮቢዓሜም ጉሙርቂንታያ ማዔኔ፤ ዪሁዳ ካኣቶ ዴሬያ ማዔኔ።

ሮቢዓሜም ዋይዞ ዒፄ ታጶ፥ ዒስራዔኤሌ ፃጳ ዒዮርቢዓሜ ጌይንታያ ካኣቲ ፔኤኮ ካኣታሤኔ። ዬያታ ዒስራዔኤሌኮ ኬዶ ዛሎ ካኣቶ ማዔኔ፤ ሱንፃኣ ዒስራዔኤሌ ካኣቶ ዴሬ ጌይንቴኔ።

ዬይ ዒዮርቢዓሜ ፆኦሲም ዋይዞ ዒፂ፥ ዴሮዋ ጎሜ ማዺሼኔ። ዔያታ ዎዎዴይ ጌዔቴ ዪሁዳ ካኣቶ ዓጮይዳ ዓኣ፥ ፆኦሲም ዱማዼ ማኣሮይዳ ፆኦሲ ካኣሽኪፆ ሃሺ ዴራ ካኣሽካንዳጉዲ ላምዖ ፆኦዞ ዔያቶም ማዤኔ።

ዪሁዳ ካኣቶና ዒስራዔኤሌ ካኣቶና ዎሊኮ ሞርኬ ማዒ ዺቢ ዎዴ ዖልቴኔ።

ዬኖ ዓኮ ዒስራዔኤሌ ካኣቶ ዓጮ ጌይንቴዞይዳ ካኣታዻ ካኣታ ቢያ ሚርጌና ፑርታኬ፤ ዔያቶፓ ባሼሢ ዔያቶ ቤዛ ኬስኪ ካኣታዻኒ ኮዓ ዓሳ ዎዺ ኩርሴኔ።

ዒስራዔኤሌ ካኣቶ ቢያሢንታ ዴሮንታ ፆኦሲ ሃሺ ሜሌ ፆኦዞ ካኣሽኬኔ። ዬያ ሜሌ ፆኦዞ ዔያታ ካኣሽካ ጎይፃ ዓሱሞ ዒኔና ማዾ ማዾፓ ኬስኬያኬ፤ ዬይያ ካኣዦሮኬ ጌይ ዓኒ ሃሣ ማቾ ማዒባኣ ዓሲና ላሂ ላሂ፥ ናይያ ሹኪ ዒንጊ ዒንጊ ካኣሽኮያኬ።

ዪሁዳ ካኣቶ ጌይንቴ ዓሳ ዳውቴ ዜርፆኬ። ዬያቶ ካኣቶፓ ፔቴ ፔቴ ካኣታ ፒዜ ጎይሢና ዴሮ ዎይሤያ፥ፆኦሲያ ካኣሽኬ ቃራ ካኣቶኬ። ጋዓንቴ ዺቦ ካኣታ ፑርታ፥ ዒኢቴ ማዾዋ ማዼያኬ፤ ሜሌ ፆኦዞዋ ዔያታ ካኣሽኬኔ። ዬያቶፓ ፔቴ ፔቴዞንሢ ፔኤኮ ናኣቶ ጎኔ ፆኦሲቱዋ ሜሌ ፆኦዞም ሹኪ ዒንጌኔ። ዬያጉዲ ዪሁዳኮ ዺቢ ዴሬ ፆኦሲም ጌኤታዺ ሜሌ ፆኦዞ ካኣሽኬኔ።