17. ፆኦሲ ዳውቴም ማዻኒ ጫኣቄ ጫኣቁሞ

ዒስራዔኤሌኮ ቤርታሳ ካኣታሢ ሳኣዖኦሌ ጌይንታያኬ፤ ዬይ ካኣታሢ ዴራ ኮዔ ጎይፆጉዴያ ዖዶሲ ሃሣ ዓውካራኣ ሚርጌ ሚዛጲኬ። ሳኣዖኦሌ ካኣታዺ ዎይሢፆ ዓርቄዖ ዻካ ሌዔ ጋርካ ሌሊ ኮሺ ካኣቲ ማዒ ዎይሤኔ። ጊንፃፓ ጋዓንቴ ፆኦሲም ዋይዙዋ ፑርታ ዓሲ ማዔኔ፤ ዬያሮ ፆኦሲ ፔቴ ኬሊ ሳኣዖኦሌ ቤዞይዳ ካኣታዻንዳ ሜሌ ዱማ ዓሲ ዶኦሬኔ።

ፆኦሲ፡ ካኣቲ ሳኣዖኦሌኮ ጊንፃፓ ካኣታዻንዳያ፥ ዳውቴ ጌይንታ ፔቴ ዒስራዔኤሌ ዼጌስኬያ ዶኦሬኔ። ዳውቴ ቤኤቴሌሄሜ ካታማ ሾይንቴያ፥ ማራይ ሄንቃ ናይኬ። ዳውቴ ዺቢ ኬሊዳ ዒዛኮ ማራቶ ሙዓኒ ሙካ ዞቦንታ ዲቤ ጌይንታ ቦዖዋ ዎዺ ዔራያኬ። ዳውቴ ፆኦሲ ጉሙርቂ ዒዛም ዓይሢንታያ፥ ሼሌዔ ሃሣ ፂሎ ዓሲኬ።

ዬካፓ ዳውቴ ዼኤፒ ዖልዚ ዓሲ፥ ሃሣ ሱኡጌ ማዔኔ። ዳውቴ ሃጊ ዔቃ ዼጌ ዓኣዖ ጎሊያዴ ጌይንታ ዼኤፒ፥ ዎልቄናኣ ዶዲ ማዔ ዖልዚ ዓሲስኬያና ዖልቴኔ። ጎሊያዴ ዖልዚ ዖሎ ጎይሢ ታማሪ ዔሬያ፥ ዶዲ ዎልቄ ዓኣያ፥ ዔጳኣ ላሆ ዋዻ ማዓ ዼኤፒ ዓሲኬ። ጋዓንቴ ዳውቴ ጎሊያዴ ዎዺ፥ ዒስራዔኤሌ ዓሶ ዓውሳንዳጉዲ ፆኦሲ ዒዛ ማኣዴኔ። ዬካፓ ዒስራዔኤሌ ዴራ ዒዛ ሚርጌና ሄርሺ ጋላታንዳያ ሄላንዳኣና ዔያቶኮ ሞርኮ ባሺሢና ሚርጌ ማዾ ዳውቴ ማዼኔ።

ዳውቴ ዓሳ ባሼ ናሽኬሢሮ ሳኣዖኦሌ ዒፂሢ ቂኢሩሞ ዒዛ ቂኢሬኔ። ዬያሮ ሳኣዖኦሌ ሚርጌ ኬሊ ዳውቴ ዎዻኒ ካራ ኮዔኔ፤ ዳውቴያ ሳኣዖኦሌፓ ቶላኒ ፑኔኔ። ፔቴ ኬሊ ሳኣዖኦሌ ዳውቴ ዎዻኒ ኮይፆይዳ ዓኣዖ ዳውቴ ዓኣሺንቲ ዓኣ ዴኖ ዔቶ ባኣኮ ሼኤሺዳ ጌሊ ዴዔኔ፤ ጋዓንቴ ዒ ዳውቴ ዴንቃኒ ዳንዳዒባኣሴ። ዳውቴ ጋዓንቴ ሳኣዖኦሌ ጫርጊ ዎዻንዳጉዴያ ቃኣፂ ሙኪ ዑኬዖ ዎዺፆ ሃሺ፥ ዎዺ ቤዛ ካኣታዻኒ ኮዒባኣሢ ሳኣዖኦሌ ዔራንዳጉዲ ሳኣዖሌኮ ማኣዓሢ ዓጫፓ ዻካ ቤሲ ቲቂ ዔኬኔ።

ጋፒንፆይዳ ሳኣዖኦሌ ዖልዚዳ ሃይቄኔ፤ ዳውቴያ ዒስራዔኤሌይዳ ካኣታዼኔ። ዳውቴ ኮሺ ካኣቲ ማዔሢሮ ዴራ ዒዛ ናሽኬኔ። ፆኦሲያ ዳውቴ ዓንጄኔ፥ ዔቦ ቢያ ዒዛም ጊኢጊሼኔ። ዳውቴ ሚርጌ ዖልዚ ዖልቴኔ፥ዬያ ቢያይዳ ፔ ሞርኮ ዒ ባሻንዳጉዲ ፆኦሲ ዒዛ ማኣዴኔ። ዳውቴ ዬሩሳላሜ ካታሞ ዖሊ ባሺ ዓርቂ ዒ ዴዒ ዎይሣ ዼኤፒ ካታማ ማሄኔ። ዳውቴ ካኣታቴ ዎዶይዳ ቢያ ዒስራዔኤሌ ሚርጌና ዶዲ፥ ሃሣ ዖርጎቺ ዓጪያ ማዔኔ።

ዒስራዔኤሌ ዓሳ ቢያ ፆኦሲ ካኣሽካያና ፆኦሲም ዒንጎ ባኣዚ ዔኪ ሺኢሻንዳ ፆኦሲም ዱማዼ ጌኤሺ ማኣሪ ማዣኒ ዳውቴ ኮዔኔ። ዴራ ዒማና ዖይዶ ፄኤታ ሌዔኮ ቤርታ ሙሴ ማዢሴ ፆኦሲ ዴሮና ካኣማ ዓፒሎና ማዢንቴ ኬኤፆይዳ ሌሊ ፆኦሲ ካኣሽካኔ፥ ሃሣ ዒንጎ ባኣዚያ ዒኢካ ሺኢሻኔ።

ጋዓንቴ ፆኦሲ ሂዚ ጋዓ ኪኢታና ፆኦሲ ማሊሢ ኬኤዛ ናኣታኔ ዳውቴ ኮይላ ዳኬኔ፦ “ኔኤኒ ዖልዚ ዓሲ ማዔሢሮ ዬያ ታኣም ዱማዼ ማኣሮ ኔ ማዢንዱዋሴ፤ ጋዓንቴ ኔ ናኣዚ ማዣንዳኔ፥ ታ ኔና ሚርጌና ዓንጃንዳኔ። ኔ ዜርፃፓ ፔቴይ ታ ዴሮኮ ናንጊና ካኣቲ ማዒ ዎይሤ ጎይሣ ናንጋንዳኔ!” ዬይ ናንጊና ዎይሢ ናንጋንዳ ካኣታሢ ዳውቴ ዜርፃሢ ማዔ፥ ሜሲሄኬ (ካኣቱሞም ዶኦሞናሢ)። ዬይ ካኣቱሞም ዶኦሞና ካኣታሢ ዓጪ ዴሬኮ ቢያ ጎሞ ጌኤሻንዳያ ማሂ ፆኦሲ ዒዛ ዶኦሬሢኬ።

ዳውቴ ዬያ ጌይንቴ ባኮ ዋይዛዖ ዬያ ዼኤፖ ቦንቾና ሚርጌ ዖርጎቹሞ ዒዛም ዒንጋኒ ጫኣቄ ፆኦዛሢ ኔጉዋዖ ጋላቲ ሄርሺያ ዼኤፒሴኔ። ፆኦሲ ዬያ ባኮ ዓይዲ ማዺ ኩንሣንዳቴያ ዳውቴ ዔሪባኣሴ። ያዺ ማዒፆና ዒስራዔኤሌ ዓሳ ዬይ ሜሲሄ ጌይንቴሢ ሙካንዳያ ሄላንዳኣና ፔቴ ሺያ ሌዔጉዴያ ቢያ ዎዛ ጌሢ ካፔኔ።

ዳውቴያ ሚርጌ ሌዔ ፒዜ ዎጊ ዎይሣያ፥ ሃሣ ጉሙርቂንታያ ማዒ ዓጮ ዎይሤኔ፤ ፆኦሲያ ዒዛ ዓንጄኔ።ያዺ ማዔቴያ ዒዛ ናንጎኮ ጋፒንፆ ዑኬዖ ፆኦሲ ዖዪሳ ፑርታ ጎሜ ማዼኔ።

ፔቴ ኬሊ ዳውቴ ፔኤኮ ዖሎ ዓሶ ዖላ ዳካዖ ማኣሮኮ ዑፃ ዢባሬ ዔካኒ ኮሾና ዼጌ ቤዞይዳ ዓኣኔ፤ ዒማና ፔቴ ሚዛጲ ላኣሊስኬና ዑሢ ማስታንቴ ዒ ዴንቄኔ፤ ላኣሌሎኮ ሱንፃ ቤርሳቤ ጌይንታኔ።

ዳውቴ ፔ ዓኣፖ ዬካፓ ሺርሾ ባሺንቲ ዴንዲ ዒዞ ዔኪ ዬዓንዳ ዓሲ ዳኬኔ። ዔኪ ዬይሴስካፓ ዒዞና ላሃዖ ማሂ ዳኬኔ። ዻካ ዎዴኮ ጊንፃ ቤርሳቤ፥ “ታኣኮ ዑስካ ዓሲ ዓቴኔ” ጌይ ኪኢታ ዳውቴም ዳኬኔ፤ ዒዛ ዖሪዮ ማቾኬ።

ዖሪዮ ጌይንታሢ ዳውቴኮ ዖሎ ዓሶ ባኣካ ጎኦባ ዔርቴ ዖልዚ ዓሲኬ። ዬካፓ ዳውቴ ዖሪዮ ዖሎ ቤዛፓ ዔኤሊ ዔኪ ዬይሲ ማቾና ዎላ ዴዓንዳጉዲ ዓይሤኔ። ጋዓንቴ ዖሪዮ “ታኣኮ ላጋ ዖሎይዳ ዓኣንቴ ታኣኒ ታ ማቾ ኮይላ ማኣሪ ዴንዲንዱዋሴ” ጌይ ዒፄኔ። ዬያሮ ዳውቴ ዖሪዮ ጊንሣ ማሂ ዖሎ ቤዞ ዳካዖ ዖላ ዶዲ ዓኣ ዛሎይዳ ዒዛ ዔቂሲ ዎዺሻንዳጉዲ ዖሎ ዓሶ ዓይሣሢም ኬኤዜኔ።

ዳውቴ ዖሪዮ ዬያይዲ ዎዺሼስካፓ ቤርሳቤ ዔኬም ዓቲንቄ ናይ ሾዔኔ። ዳውቴ ማዼ ባኮሮ ፆኦሲ ዒዛይዳ ሚርጌና ዻጋዼኔ፤ ዒ ማዼ ጎማ ዎማዺ ፑርታቴያ ኬኤዛንዳጉዲ ፆኦሲ ማሊፆ ኬኤዛ ናኣታኔ ዳውቴ ኮይላ ዳኬኔ። ዬያሮ ዳውቴ ጎሞ ቡኡፄሢሮ ፆኦሲ ዒዛ ማኣሬኔ። ዳውቴ ዬካፓ ዓቴ ዎዶ ቢያይዳ ሜርጌ ሜታሳ ዎዶናታዖ ፆኦሲ ጎይፆ ሃንቲ ዓይሢንቴኔ።

ጋዓንቴ ዳውቴ ማዼ ጎሞሮ ዬያ ሾይንቴ ናዓሢ ፆኦሲ ዎዼኔ። ዬካፓ ሃሣ ዳውቴ ማኣሮይዳ ዖልዚ ሌሊ ማዔኔ፤ ዳውቴኮዋ ዎልቃ ሚርጌና ላቤኔ። ዳውቴ ፆኦሲም ጉሙርንታያ ማዒባኣቴያ ፆኦሲ ዒዛም ማዻንዳኔ ጌዔሢ ጉሙርቂንቲ ካፓያ ማዔኔ። ዬካፓ ቤርሳቤ ሜሌ ዓቲንቄ ናይ ሾዓዛ፥ ሱንፆ ሴሎሞኔ ጌይ ዔያታ ጌሤኔ።