16. ዴሮ ዓይላቶፓ ኬሴ ዓሶ

ዒያሱ ሃይቄስካፓ ዒስራዔኤሌ ዓሳ ፆኦሲም ዓይሢንቲባኣሴ፤ ዔያቶ ባኣካ ዓቲ ዓኣ ካኣናኔ ዓሶ ዳውሲ ዳኪባኣሴ፤ ፆኦሲ ዎጎዋ ዓይሢንቲ ካፒ ኩንሢባኣሴ። ዒስራዔኤሌ ዓሳ ጎኔ ፆኦሲ ማዔ ናንጊና ናንጋ ጎዳ (ያህዌ) ካኣሽኪፆ ሃሺ ካኣናኔ ዓሶ ፆኦዞ ካኣሽኪሢ ዓርቄኔ። ዒማና ዒስራዔኤሌ ዓሶኮ ካኣቲ ባኣሴ፤ ዬያሮ ዓሲ ቢያ ፔኤኮ ሼኔ ጌዔሢ ማዻ ዎዴኬ።

ዒስራዔኤሌ ዓሳ ፆኦሲም ጌኤታዺፆ ሃሾ ዒፄሢሮ ፆኦሲ ዔያቶ ሞርኮም ዓኣሢ ዒንጌኔ። ዬያታ ሞርካ ዒስራዔኤሌ ዓሶኮ ዓኣ ባኮ ቢያ ዉኡቄኔ፤ ቆሎዋ ቢያ ዎዺ ባይዜኔ፤ ሚርጌ ዓሲያ ዒስራዔኤሌፓ ዎዼኔ። ዒስራዔኤሌ ዓሳ ፆኦሲም ዋይዚባኣሢሮ ሞርካ ዔያቶ ሄርቂ ዎይሤስካፓ ጎሞ ፔኤኮ ቡኡፂ፥ ፆኦሲ ዔያቶ ሞርኮ ኩጫፓ ዓይሳንዳጉዲ ዖኦጬኔ።

ያዺ ማዔስካፓ ዒስራዔኤሌ ዓሶ ሞርኮ ኩጫፓ ዓይሲ ኬሳንዳ ዓሲ ፆኦሲ ዔያቶም ዳኬኔ፤ ዬይ ዓሢያ ዓጮይዳ ኩሹሞ ዔኪ ዬዔኔ። ጋዓንቴ ዒስራዔኤሌ ዴራ ጊንሣ ፆኦሲ ዋሌኔ። ሜሌ ፆኦዞዋ ካኣሽኪሢ ዓርቄኔ። ዬያሮ ፆኦሲ ዔያቶኮ ዑኬ ዓኣ ሚዲያሜ ዴሮ ሞርኬ ማሂ ዒስራዔኤሌ ዓሶይዳ ዔቂሴም ዖሊ ባሼኔ።

ዬይ ሚዲያሜ ዓሳ ዒስራዔኤሌ ዓሶኮ ዓኣ ሃኣኮ ቢያ ላንካይ ሌዔ ቡሪ ቡሪ ዴዔኔ። ዬያሮ ዒስራዔኤሌ ዓሳ ሚርጌ ዒጊቹሞይዳኬ፤ ያዺ ማዒፆና ዛሬና ዴኔ ዔቴያናይዳ ዒስራዔኤሌ ዓሳ ጌሊ ፑኒ ናንጋሢሮ ሚዲያሜ ዓሳ ዔያቶ ዴንቂ ዖላኒ ዳንዳዒባኣሴ። ዒስራዔኤሌ ዓሳ ጋፒንፆይዳ ፆኦሲ ዔያቶ ማኣዳንዳጉዲ ዒላቴኔ።

ፔቴ ኬሊ ጌዲዎኔ ጌይንታ ዒስራዔኤሌ ዓሲስኬይ ሚዲያሜ ዓሶፓ ዓኣሺንቲ ሃኣኮ ሺርካንቴ ፆኦሲ ኪኢታንቾ ጌዲዎኔ ኮራ ሙኪ፥ “ኔኤኒ ሃይ ዶዶ ዖሎ ዓሢዮ! ፆኦሲ ኔኤና ዎላኬ። ዴንዲ ዒስራዔኤሌ ዓሶ ሚዲያሜ ዓሶ ኩጫፓ ዓውሴ” ጌዔኔ።

ዒማና ጌዲዎኔኮ ዓዴ ሜሌ ፆኦዞም ዒንጎ ባኣዚ ሺኢሺ ካኣሽካ ቤሲ ዓኣኔ። ጌዲዎኔ ዬያ ሹጮና ኮሺንቴ ሜሌ ፆኦዞም ዒንጎ ቤዞ ሻሃንዳጉዲ ፆኦሲ ዒዛም ኬኤዜኔ። ጋዓንቴ ጌዲዎኔ ዴሮ ዒጊጬሢሮ ሳዓ ዓማንዳያ ሄላንዳኣና ዬያ ማዺባኣሴ። ዬካፓ ዬያ ዒንጎ ባኮ ሺኢሾ ቤዞ ሜንሢ ጋኣጪ ሲላሊ ማሄኔ። ዒኢካ ኮይሎይዳ ፆኦሲም ዒንጎ ባኣዚ ሺኢሾ ዓኪ ቤሲ ሹቺና ኮሼኔ። ዒኢካ ፆኦሲም ዒንጎ ባኣዚያ ሺኢሺ ካኣሽኬኔ።

ዚሮ ጉቴሎ ፔቴ ዓሲ ዔያቶኮ ካኣዦ ቤዞ ሻሄሢ ዛጊ ዴራ ሚርጌና ዻጋዼኔ። ጌዲዎኔያ ዎዻኒ ዒዛኮ ማኣሪ ዴንዴኔ። ጋዓንቴ ጌዲዎኔኮ ዓዴ፥ “ዓይጎሮ ዒንሢ ዒንሢኮ ፆኦዞ ማኣዳኒ ኮዓይ? ዒ ዬይ ጎኔ ፆኦሲ ማዔያታቴ ፔ ዛሎ ፔኤሮ ሂንዳ ዖልቲ ሞኦቶንጎ!” ጌዔኔ። ጌዲዎኔኮ ዓዴ ያዺ ጌዔሢሮ ዴራ ጌዲዎኔ ዎዺባኣሴ።

ሚዲያሜ ዓሳ ዒስራዔኤሌ ዓሶ ቡሪሢሮ ላሚ ሃሣ ሙኬኔ። ዬያ ዴሮኮ ዺቡማ ዓጪጉዲታሢሮ ፓይዲም ማጋያኬ። ጌዲዎኔያ ዬያ ሚዲያሜ ዓሶ ዖላኒ ዒስራዔኤሌ ዴሮ ዔኤሌኔ። ፆኦሲ ዒዛ ዛሎና ዒስራዔኤሌ ዓሶ ማኣዳኒ ጎኔ ኮዔያ ማዒፆ ዔራኒ ጌዲዎኔ ላምዖ ማላታ ፆኦሲ ኮይላ ዖኦጬኔ።

ዒዚ ዒማና ቤርታሳዖ ጉፓሌ ፔጌይዳ ሳዓ ጌሣዖ ዚሮ ጉቴ ዋንቶ ጫርካ ዬኖ ጉፓሎይዳ ሌሊ ጴዻዖ ሳዓ ፃኣዺ ማዓንዳጉዲ ፆኦሲ ዖኦጬኔ። ፆኦሲያ ዒ ጌዔማ ጎይፆ ማዼኔ። ሄሊሴ ዋንቴሎ ጌዲዎኔ “ጉፓሌሎ ሃሻዖ ሳዖይዳ ጫርካ ጴዾንጎ” ጌይ ፆኦሲ ዖኦጬኔ። ፆኦሲያ ዒማይዴኔ። ዬንሢ ላምዖ ማላቶንሢ ፆኦሲ ዒስራዔኤሌ ዓሶ ዒዛ ዛሎና ሚዲያሜ ዓሶ ኩጫፓ ዓውሳኒ ኮዔሢ ጌዲዎኔም ዔርዛያ ማዔኔ።

ዬያሮ ዒስራዔኤሌኮ ሃይሢታሚ ላምዖ ሺያ ዖልዚ ዓሲ ጌዲዎኔ ኮራ ሙኬኔ፤ ጋዓንቴ ፆኦሲ ጌዲዎኔም “ዬያ ዖሎ ዓሶኮ ፓይዳ ዺቤኔ” ጌዔኔ። ዬካፓ ጌዲዎኔ ዖሎ ዴንዲፆሮ ዒጊጫ ላማታሚ ላዖ ሺያ ዓሲ ማኣሪ ማኣሪ ማሂ ዳኬኔ። ሃሣ ፆኦሲ ጌዲዎኔም “ሃሢ ሄላዖ ዖሎ ዓሶኮ ፓይዳ ዺቢኬ” ጌዔኔ። ጊንሣ ሃሣ ጌዲዎኔ ሃይሦ ፄኤታ ዖልዚ ዓሲ ሌሊ ዓይሳዖ ሃንጎዋቶ ማሂ ዳኬኔ።

ዬኖ ዋንቶ ፆኦሲ ጌዲዎኔም፥ “ሚዲያሜ ዓሶኮ ዖሎ ዓሳ ዓኣ ጉርዶ ዎቴ፤ ዔያታ ጋዓ ባኮ ኔ ዋይዜቴያ ዒጊጪፖ” ጌዔኔ። ዬያሮ ጌዲዎኔ ሚዲያሜ ዓሶኮ ዖሎ ዓሶ ጉርዶ ዒማ ዋንቶ ዴንዴኔ፤ ፔቴ ሚዲያሜ ዖልዚ ዓሲስኬይ ፔ ላጌስኬያም ዓውቲ ኬኤዛዖ፥ “ጌዲዎኔኮ ዖሎ ዓሳ ሚዲያሜ ዓሶ ባሻንቴ ታ ዛጌኔ” ጋዓንቴ ዒ ዋይዜኔ። ጌዲዎኔ ዬያ ዋይዛዖ ፆኦሲም ዚጊ ካኣሽኬኔ።

ዬካፓ ጌዲዎኔ ፔኤኮ ዖሎ ዓሶ ባንሢ ማዒ ፔቴ ፔቴሢም ዛዬ፥ ዖቲ ናይንታ ኩሻኣ ፖዒሢ ኩጫ ኩጫ ዒንጌኔ። ያዺዴስካፓ ሚዲያሜኮ ዖሎ ዓሳ ጊንዒ ዓኣ ጉርዶ ሙኪ ማንጌኔ። ሚዲያሜኮ ዖሎ ዓሳ ሚርጌና ጊንዔሢሮ ጊዲዎኔኮ ሃይሦ ፄኤቶ ዖሎ ዓሳ ፖዒ ሙካ ኩሾ ታሞ ዔያታ ዴንቃኒ ዳንዳዒባኣሴ።

ጌዲዎኔኮ ዖሎ ዓሳ ዎሊ ዑፃ ኩጫ ዓኣ ዖቶ ጳዺሲ ዹኡሴኔ፤ ኩሾዋ ፔቴይዳ ፖዒሢ፥ ዛያሢያ ፔኤኮ ዋርቂ ዋርቂ፥ “ሃይ ፆኦሲና ጌዲዎኔና ዖሎ ዓሶኬ!” ጌይ ዒላቴኔ።

ፆኦሲ ሚዲያሜኮ ዖሎ ዓሶ ዲቃሢ ካራ ባይዜኔ፤ ዬያሮ ዔያታ ዎሊ ዎዺሢ ዓርቄኔ። ዬካፓ ዒስራዔኤሌ ዓሳ ማኣራ ዓቴ ዓሶዋ ቢያ ዔኤሊ ፔቱሞና ሚዲያሜ ዓሶ ዳውሴኔ፤ ዛሎ ዓሶ ዔያታ ዎዼኔ፥ ዛሎ ዳውሲ ዒስራዔኤሌ ዓጫፓ ዳኬኔ። ዒማና ፄኤታና ላማታሚ ሺያ ዖልዚ ዓሲ ሚዲያሜ ዓሶኮ ሃይቄኔ። ዬያይዲ ፆኦሲ ዒስራዔኤሌ ዴሮ ዓውሴኔ።

ዒስራዔኤሌ ዴራኣ ጌዲዎኔ ካኣታሣኒ ኮዔኔ። ጌዲዎኔ ጋዓንቴ ዬያ ዒፄኔ፤ ዒዚ ዔያቶ ሚዲያሜ ዓሶፓ ዔያታ ቡሪ ዔኬ ዎርቆ ዢኢራሢ ዔኪ ዬዓንዳጉዲ ዓይሤኔ። ዬያሮ ዴራ ጌዲዎኔም ሚርጌ ዎርቄ ዔኪ ዬዒ ዒንጌኔ።

ጌዲዎኔ ዬያ ዎርቆ ሼኤሺ፥ ቄኤሶ ቢያኮ ሱኡጋሢ ማኣዓንዳ ዱማ ማኣዖ ኮሺሴኔ። ዴራ ጋዓንቴ ዬያ ዎርቆና ኮሺንቴ ማኣዓሢ ፆኦዞ ማሂ ካኣሽኪሢ ዓርቄኔ። ዬያሮ ፆኦሲ ዴሮ ሞርካ ዔያቶ ባሻንዳጉዲ ዓኣሢ ዒንጊ ፁንቄኔ። ጋፒንፆይዳ ዴራ ሃሣ ፆኦሲ ዔያቶ ዓውሳንዳጉዲ ዖኦጫዛ ሜሌ ዓውሳያ ዔያቶም ዒ ዳኬኔ።

ዬያጉዴ ባኣዚ ሚርጌ ማይንቲ ዒስራዔኤሌ ዓሶይዳ ማዺንቴኔ። ዎዎይታይ ጌዔቴ ዒስራዔኤሌ ዓሳ ጎሜ ማዻኔ፥ ፆኦሲ ዔያቶይዳ ሜቶ ዓጊ ፁንቃኔ፤ ጊንሣ ዴራ ጎሞ ቡኡፃኔ፤ ፆኦሲያ ዔያቶ ዓውሳንዳ ዓሲ ዳካኔ። ሚርጌ ዎዴ ማዓንዳያ ፆኦሲ ዒስራዔኤሌ ዓሶ ዓውሳኒ፥ ዔያታ ጌሌ ሜታፓ ኬሳንዳ ዓሲ ዳኪ ዳኪ ዓውሴኔ።

ጋፒንፆይዳ ዒስራዔኤሌ ዴራ ሜሌ ዴሮኮ ካኣታ ዓኣሢጉዲ ዔያቶማኣ ዒ ካኣቲ ዒንጎም ፆኦሲ ዔያታ ዖኦጬኔ። ዖሎ ዔያቶ ዓርና ማዒ ዖሊሳንዳ፥ ዖዶሲ ሃሣ ዶዲ ዓሲ ዔያታ ኮዔኔ። ፆኦሲ ጋዓንቴ ዬያ ዔያቶኮ ዖኦጪፆ ናሽኪባኣሴ፤ ማዔቴያ ዔያታ ኮዔሢ ጎይፆ ካኣቲ ዔያቶም ካኣታሤኔ።