15. ፆኦሲ “ዒንጋንዳኔ” ጌይ ጫኣቄ ዓጬሎ

ጋፒንፆይዳ ዒስራዔኤሌ ዴራ ፆኦሲ “ዒንጋንዳኔ” ጌይ ጫኣቄ ዓጬሎ፥ ካኣናኔ ጌላንዳ ዎዳ ሄሌኔ። ዒማና ዒያሱ ካኣናኔይዳ ዒያርኮ ጌይንታ ዓጫ ሹቺና ኬልቂ ዴርቂንቴ ካታማስኬኖ ዴንዲ ሙራንዳ ላምዖ ዓሲ ዳኬኔ። ዬኖ ኬታሜሎይዳ ዞኦስካ ኮኦማ ላኣሊ ሬዓባ ጌይታስኬና ናንጋኔ፤ ዬና ላኣሌላ ዒያርኮ ዓሳ ዬንሢ ሙሮ ዓሶ ዎዹዋጉዲ ዓኣቺ ዓይሲ ቶሊሲ ዳኬያኬ። ዒዛ ፆኦሲ ጉሙርቄሢሮ ዬያ ማዼኔ። ዒስራዔኤሌ ዓሳ ዒያርኮ ካታሞ ዖሊ ባይዛኒ ሙካኣና ሬዓባንታ ዒዞኮ ማኣሮ ዓሶዋ ዔያታ ዎዺንዱዋኣሢ ዒዞም ዬንሢ ሙሮ ዓሶንሢ ጫኣቄኔ።

ዒስራዔኤሌ ዓሳ ፆኦሲ ዔያቶም “ዒንጋንዳኔ” ጌይ ጫኣቄ ዓጬሎ ጌላኒ ዮርዳኖሴ ጌይንታ ዎሮና ፒንቃንዳያ ኮይሴኔ። ፆኦሲ ዒማና፥ “ቤርታዺ ቄኤሳ ዎሮና ፒንቆንጎ” ጌይ ዒያሱም ኬኤዜኔ። ዬያሮ ቄኤሳ ዎሮና ፒንቃኒ ቶኮ ዓዓጋኣና ዒስራዔኤሌ ዓሳ ፃኣዺ ሳዓና ፒንቃንዳጉዲ ዎታ ዋኣፃ ዔቄኔ።

ዴራ ዮርዳኖሴ ዎሮና ፒንቄስካፓ ዶዲ ማዔ ዒያርኮ ካታሞ ዎይቲ ዔያታ ዖላንዳቴያ ዒያሱም ፆኦሲ ኬኤዜኔ። ዒስራዔኤሌ ዴራኣ ፆኦሲም ዓይሢንቴኔ። ዬያሮ ዒስራዔኤሌኮ ዖሎ ዓሶንታ ቄኤሶንታ ዓዳ ፆኦሲ ዔያቶ ዓይሤ ጎይፆ ፔቴ ኬሊዳ ፔቴ ዎሊ ዑፃ ላሆ ኬሊ ዒያርኮ ካታሞ ሺሬኔ።

ላንካሳ ኬሎይዳ ዒስራዔኤሌ ዴራ ካታሜሎ ላንካይ ማይንቲ ሺሬኔ። ጋፒንፆ ዔያታ ሺሪፆይዳ ዓኣንቴ ዒስራዔኤሌኮ ዖሎ ዓሳ ዖሎ ዒላቶ ዒላቴኔ፤ ቄኤሳኣ ዛያሢ ዋርቄኔ።

ዬካፓ ዒያርኮኮ ዓጮ ሺርሺ ዲርቆና ኬኤሎ ዲፃ ዶዔኔ፤ ፆኦሲያ ዔያቶ ዓይሤ ጎይፆ ዒስራዔኤሌ ዓሳ ካታሜሎይዳ ዓኣ ባኮ ቢያ ዖሊ ባይዜኔ። ዒስራዔኤሌ ዓሶና ዒጊንቴ፥ ሬዓባንታ ዒዞኮ ማኣሮ ዓሶንሢ ሌሊ ዎዹዋ ቶሊሲ ዓይሴኔ። ካኣናኔይዳ ናንጋ ሜሌ ዴራ ዒስራዔኤሌ ዓሳ ዒያርኮ ዖሊ ባይዜሢ ዋይዛዖ ዔያቶዋ ዖላኒ ሙካንዳሢሮ ዒጊጬኔ።

ዬያኮ ቤርታ ካኣናኔይዳ ዓኣ ዓይጎ ዓሲና ዎላ ኮሹሞና ናንጋኒ ሳሌ ጌሉዋጉዲ ዒስራዔኤሌ ዓሶ ፆኦሲ ላኣጊናኣኮኬ። ጋዓንቴ ጌባዖኦኔ ዓሶ ጌይታ ካኣናኔ ዴሮፓ ፔቴ ፃጲ ሚርጌ ሃኬ ዓጪፓ ሙኬ ዓሲኬ ጌይ ዒያሱ ጌሼኔ፤ ዒያሱ ዔያቶና ዎላ ሳላዻንዳጉዲያኣ ዖኦጬኔ። ዬና ጌባዖኦኔ ዓሳ ዓንካፓ ሙኬቴያ ዒያሱንታ ዒስራዔኤሌ ዓሶንታ ፆኦሲ ዖኦጩዋዖ ዔያቶና ዎላ ዒጊንታኒ ሳላዼኔ።

ጌባዖኦኔ ዓሳ ዔያቶ ጌሼሢ ዒስራዔኤሌ ዓሳ ዔራዖ ዻጋዼኔ፤ ጋዓንቴ ፆኦሲ ቤርታ ዔያታ ሳላዼ ሳሌ ዓኣሢሮ ዬያ ቃኣሎ ዒጊጪ ቦንቼኔ። ሜሌ ኬሊና ካኣናኔይዳ ዓኣ ሜሌ ዴሮ ካኣቶንታ ዓሞኦራ ዓሶንታ ዒስራዔኤሌ ዴራ ጌባዖኦኔ ዓሶና ዎላ ሳላዺ ጊኢጌሢ ዋይዜኔ፤ ዬያሮ ዔያታ ፔኤኮ ዖሎ ዓሶ ፔቴይዳ ማሂ ጌባዖኦኔ ዴሮ ዖሌኔ። ዬያሮ ጌባዖኦኔ ዓሳ ማኣዶ ዖኦጪሢ ዒያሱ ኮይላ ኪኢታ ዳኬኔ።

ዒያሱዋ ዒስራዔኤሌ ዖሎ ዓሶ ፔቴይዳ ዔኪ ጌባዖኦኔ ሄላኒ ሃንቴ ጎይሣ ዎርቄኔ። ዬካፓ ካሪፆ ዓሞኦራ ዓሳ ዔሩዋንቴ ዔያቶይዳ ዒያሱንሢ ዖልዚ ቡሌኔ።

ዬኖ ኬሎ ፆኦሲ ዒስራዔኤሌ ዓሶ ዛላ ማዒ ዖሎኔ። ዎዎዴይ ጌዔቴ ዼኤፒ ሹቺጉዴ ሻቺ ጫሪንካፓ ኬይሲ ዓሞኦራ ዓሶኮ ካራ ባይዛዖ ሚርጌ ዓሲ ዎዼኔ።

ሃሣ ጊንሣ ዒስራዔኤሌ ዓሳ ዓሞኦራ ዴሮ ጋፒ ዖሊ ባሻንዳያ ሄላንዳኣና ፔቴ ኬሊ ዓባ ጌሉዋጉዲ ጫሪንጫ ዓርቂ ዴይሤኔ። ዬኖ ኬሎ ፆኦሲ ዒስራዔኤሌ ዓሶም ዼኤፒ ባሺሢ ዒንጌኔ።

ፆኦሲ ዬያይዲ ዬያ ሞርኮኮ ዖሎ ዓሶ ባሺሴስካፓ ሚርጌ ካኣናኔ ፃጲ ማዔ ዴሬ ዒስራዔኤሌ ዓሶ ዖላኒ ዎሊ ዑፃ ቡኬኔ። ዒያሱንታ ሃንጎ ዒስራዔኤሌ ዓሳኣ ሃሣ ዖላዖ ዬያ ዓሶ ባሼኔ።

ዬያ ዖሎኮ ጊንፃፓ ፆኦሲ ፔቴ ፔቴ ዒስራዔኤሌ ፃጶም ዒዚ “ዒንጋንዳኔ” ጌይ ጫኣቄ ዓጬሎ ሄላ ጎይፆ ጊሽኬኔ። ያዺ ማዔስካፓ ፆኦሲ ዒስራዔኤሌም ዒንጊንቴ ዓጮኮ ዛጶይዳ ቢያ ዖልዚባኣያ ማሂ ኮሹሞ ዒንጌኔ።

ዒያሱ ጋርቼስካፓ ዒስራዔኤሌ ዴሮ ፔቴይዳ ዔኤሌኔ። ዬካፓ ፆኦሲ ሲና ዹኮይዳ ዒስራዔኤሌ ዓሶም “ማዻንዳኔ” ጌይ ጫኣቁሞ ጫኣቄያና ዓይሤ ዓይሢፆ ዴራ ካፒ ኩንሣኒ ኮይሳሢ ጶቂሢ ኬኤዜኔ። ዴራኣ ፆኦሲም ጉሙርቂንታያ ማዒ ናንጋኒና ዎጋ ዓይሣ ጎይፆዋ ናንጋኒ ፔቱሞና ጫኣቄኔ።