14. ዴራ ዓሲ ናንጉዋ ዳውሎይዳ ሴካ ሃንጋ ጌይ ሜታዼሢ

ፆኦሲ ዒስራዔኤሌ ዴሮና ዎላ ጫኣቄ ጫኣቁሞኮ ፔቴዞ ማዔ ዱማ ዱማ ዎጎ ዔያታ ዓይሢንቲ ኩንሣንዳጉዲ ኬኤዜስካፓ ዴራ ሲና ዹኮ ሃሺ ዴንዴኔ። ፆኦሲያ ዴሮ ሲና ዹካፓ ዓርና ማዒ ካኣናኔ ጌይንታ ቤርታዺ ዒ ዔያቶም ዒንጋኒ ጫኣቄ ዓጬሎ ዔኪ ዴንዴኔ። ፒዝ ጌይ ዔቄ ሻኣራ ዴሮኮ ቤርታ ቤርታ ካኣናኔ ሄላንዳኣና ዓኣዻዛ ዴራኣ ዬያ ዛጊ ጊንፆ ዴንዴኔ።

ፆኦሲ ዬኖ ዒ ዒንጋንዳኔ ጌዔ ዓጬሎ ዔያቶኮ ዜርፆሮ ማሂ ዒንጋንዳሢ ዓብራሃሜም፥ ዪሳኣቄም፥ ያይቆኦቤማኣ ጫኣቂናኣኮኬ። ጋዓንቴ ዬኖ ቤዞይዳ ሚርጌ ሜሌ ዴሬ ቶኦኪ ናንጋኔ፤ ዬያታ ቶኦካ ካኣናኔ ዓሶ ጌይንታያኬ። ዬይ ካኣናኔ ዴራ ፆኦሲ ካኣሽኪባኣሴ፥ ሃሣ ዓይሢንቲባኣሴ፤ ጎኔ ፆኦሲቱዋ ፆኦዞ ካኣሽኪ፥ ዬያጉዴ ሚርጌ ፑርታባኣዚያ ማዻኔ።

ፆኦሲ ዒስራዔኤሌ ዴሮም፥ “ታ ዒንሢም ‘ዒንጋንዳኔ’ ጌይ ጫኣቄ ዓጬሎይዳ ዓኣ ዴሮ ቢያ ዎዺ ባይዙዋቴ፤ ዔያቶና ዎላ ኮሽኪ ናንጊፖቴ፥ ዔኪያ ዔኪ ሎዒያ ሎዒፖቴ። ዔያታ ፆኦዞ ጌይ ካኣሽካ ባኮ ጋፒሲ ባባይዙዋቴ። ታኣም ዒንሢ ዓይሢንቲባኣቴ ዬያ ፆኦዞ ዒንሢ ካኣሽካንዳሢ ዔሩዋቴ” ጌዔኔ።

ዒስራዔኤሌ ዓሳ ካኣናኔ ዓጮ ዛጶ ሙኪ ሄላዛ፥ ሙሴ ፔቴ ፔቴ ዒስራዔኤሌ ፃጳፓ ፔቴ ዎሊ ዑፃ ታጶ ላምዖ ሱኡጌ ዶኦሬኔ። ዔያታ ዴንዲ ዓጬላ ዎዚዺታቴያ ሙራንዳጉዲ ዳኬኔ። ዬና ዓሳ ዴንዴሢ ካኣናኔ ዓሳ ዎልቄና ዶዲታቴያ ላቤያታቴያ ሙራኒኬ።

ዬንሢ ታጶ ላምዖ ዓሳ ካኣናኔ ዓጮ ዖይዲታሚ ኬሊ ጉቤ ሃንቲ ዛጋዖ ማዒ ሙኬኔ። ዔያታ ማዒ ሙካዛ ላምዖ ዓሲ ዔያቶ ባኣካፓ ዴሮም፥ “ሳዔላ ኮሺ ማሊ ዓጪኬ፤ ሳዓ ሃኣኮ ሌሊኬ!” ጌዔኔ። ታጳሢ ጋዓንቴ፥ “ካታማ ሚርጌና ዙሎ ዶዲሺ ማዦናያኬ፤ ዓሳኣ ሚርጌ ዼኤፒ፥ ዎልቄና ዓኣያኬ፤ ኑ ዔያቶና ዖልቴቴ ኑና ዎዺ ዔያታ ኩኩርሳንዳኔ!” ጌዔኔ።

ዒማና ላምዖንሢ፥ ካኣሌቤና ዒያሱና “ካኣናኔ ዓሳ ዖዶሲ፥ ሃሣ ዎልቄና ዓኣያ ማዒፃ ጎኔኬ፤ ጋዓንቴ ኑ ዔያቶ ዖሌቴ ኑ ባሻንዳሢ ዔርቴያኬ! ፆኦሲኬ ኑ ዛሎ ዖልታንዳሢ!” ጌዔኔ።

ዴራ ጋዓንቴ ካኣሌቤና ዒያሱና ጋዓሢ ዋይዞ ዒፄኔ። ዬያሮ ዴራ ሙሴና ዓኣሮኔናይዳ ዻጋዺ፥ “ሃያጉዴ ፑርታ ቤሲ ኑና ዒንሢ ዓይጎሮ ዔኪ ዬዔይ? ኑ ዖልዚና ኩዴም ኑኡኮ ላኣሎንታ ናኣቶንታ ዬያ ዴሮኮ ዓይሌ ማዓስካፓ ጊብፄይዳ ኑ ናንጌቴ ኮሺቱዋዓዳ!” ጌዔኔ። ዴራ ያዺ ጋዓዖ ጊንሣ ዔያቶ ዔኪ ጊብፄ ማሃንዳ ሱኡጌ ዶኦራኒ ኮዔኔ።

ዬያሮ ፆኦሲ ሚርጌና ዻጋዺ ዴሮና ዎላ ካኣማ ዓፒሎና ማዦና ማኣሮ ዬዔኔ። ዬካፓ ፆኦሲ፥ “ዒንሢ ታኣም ጌኤታዼሢሮ፥ ሃይ ዴራ ጉቤ ዓሲ ናንጉዋ ቦኦሎይዳ ሴካ ሃንጋ ሃንቲ ሜታዻንዳኔ። ዒያሱና ካኣሌቤናፓ ዓታዛ ላማታሚ ሌዔና ዬካፓ ዑሣ ማዔ ዓሲ ቢያ ዒኢካ ሃይቂ ኩዳንዳኣፓዓቴም ታ ‘ዒንጋንዳኔ’ ጌይ ጫኣቄ ዓጬሎ ፔቴታዎ ጌላዓኬ” ጌዔኔ።

ዴራ ዬያ ዋይዛዖ ጎሜ ዔያታ ማዼያ ማዔሢ ዔሪ ዖዬኔ። ዬካፓ ፔኤኮ ዖሎ ዓንጋሞ ዔኪ ካኣናኔ ዓሶ ዖላኒ ዴንዶ ዔቄኔ። ሙሴ ጋዓንቴ ፆኦሲ ዔያቶና ዎላቱዋኣሢሮ ዔያታ ዴንዱዋጉዲ ጎሪ ላኣጌኔ፤ ታቴያ ዔያታ ዋይዞ ዒፂ ዓኣዼኔ።

ፆኦሲ ጎኔ ዒማና ዴሮና ዎላ ዖሎ ዴንዲባኣሴ፤ ዬያሮ ሚርጌ ዓሲ ሃይቄም ዔያታ ባሺንቴኔ። ዬካፓ ዒስራዔኤሌ ዓሳ ካኣናኔፓ ማዒ ዓሲ ናንጉዋ ቦኦሎይዳ ሴካ ሃንጋ ጌይ ዖይዲታሚ ሌዔ ሚርጌና ሜታዼኔ።

ዒስራዔኤሌ ዓሳ ዬያ ዖይዲታሞ ሌዖ ጉቤ ዓሲ ናንጉዋ ቦኦሎይዳ ሜታዺ ሃንቴቴያ ፆኦሲ ዔያቶ ሙኡዜኔ። ጫሪንካፓ “ማና” ጌይንታ ካሣ ዔያቶም ኬይሲ ሙኡዜኔ። ሃሣ ዓሽኪያ ዔያታ ሙዓንዳጉዲ ፑሮ ማላ ካፒ ሚርጌ ዔያቶም ዳኬኔ። ዬያ ዎዶ ቢያ ዔያታ ቦኦላ ሃንቴያና ፆኦሲ ዔያቶኮ ዓፒሎንታ ዱርዞንታ ዳርዑዋጉዲ ናንጊሼኔ።

ፆኦሲ ፔኤኮ ዲቃሢ ሄርሺሳ ዎልቆና ላሌፓ ዋኣሢያ ኬሲ ዒስራዔኤሌ ዓሶ ዑሼኔ። ያዺ ማዔቴያ ዒስራዔኤሌ ዴራ ፆኦሲና ሙሴናይዳ ዻጋዺ ጉንዱሜኔ። ፆኦሲ ጋዓንቴ ዓብራሃሜም፥ ዪሳኣቄም ሃሣ ያይቆኦቤማኣ ማዻንዳኔ ጌይ ጫኣቄ ቃኣሎ ካፒ ጉሙርቂንታያ ማዔኔ።

ዬኖጉዲ ሃሣ ሜሌ ኬሊ ዴራ ዋኣሢ ባይዛዛ ፆኦሲ ሙሴም፥ “ሃያ ላሎም ኬኤዜ፤ ዋኣሢ ዒኢፓ ኬስካንዳኔ” ጌዔኔ። ጋዓንቴ ሙሴ ላሎሜ ኬኬኤዞንዶሢ ሃሺ ላምዒ ማይንቲ ኮኦሎና ጳርቄኔ፤ ዬይ ፆኦሲኮ ቶኦኪ ባይዛያ ማዔኔ። ዒማና ዴራ ዑሽካንዳጉዲ ላላፓ ዋኣፃ ኬስኬኔ፤ ጋዓንቴ ፆኦሲ ሙሴይዳ ዻጋዺ፥ “ታ ‘ዒንጋንዳኔ’ ጌይ ጫኣቄ ዓጬሎ ኔ ጌላዓኬ” ጌዔኔ።

ያዺዲ ዖይዲታሚ ሌዔ ሄላንዳኣና ዒስራዔኤሌ ዴራ ዓሲ ናንጉዋ ዳውሎይዳ ሜታዺ ሃንቴያና ፆኦሲም ዋይዞ ዒፄ ዓሳ ቢያ ዒኢካ ሃይቂ ኩዴኔ። ዬካፓ ፆኦሲ ላሚ ጊንሣ ዴሮ ዒዚ “ዒንጋንዳኔ” ጌይ ጫኣቄ ዓጬሎ ባንሢ ዓርናዺ ዔኪ ዴንዴኔ። ሙሴ ጋርቼሢሮ ዒዛ ማኣዳንዳጉዲ ፆኦሲ ዒያሱ ዶኦሬኔ። ሃሣ ጊንሣ ፔቴ ኬሊ ፆኦሲ ሙሴጉዴያ ፆኦሲ ማሊሢ ኬኤዛ ዓሲ ዳካንዳያ ማዒፆ ሃጋኣ ዎዛ ማሂ ሙሴም ኬኤዜኔ።

ዬካፓ ፆኦሲ “ዒንጋንዳኔ” ጌይ ጫኣቄ ዓጬሎ ዛጋኒ ፔቴ ዹካ ኬስካንዳጉዲ ሙሴ ዓይሤኔ። ሙሴያ ፆኦሲ “ዒንጋንዳኔ” ጌይ ጫኣቄ ዓጬሎ ኬስኪ ዔቂ ዛጌኔ፤ ጋዓንቴ ዒዚ ዴንዲ ጌሉዋጉዲ ፆኦሲ ዒዛ ላኣጌኔ። ያዺ ማዔስካፓ ሙሴ ሃይቄኔ፤ ዒስራዔኤሌ ዓሳኣ ሃይሢታሚ ኬሊ ጉቤ ዖዪ ዬኤኬኔ። ሄሊሳዖ ዒያሱ ዔያቶኮ ሱኡጋሢ ማዔኔ። ዒያሱ ፆኦሲ ጉሙርቃያና ዓይሢንታያ ማዔሢሮ ቃራ ሱኡጌኬ።