13. ፆኦሲ ዒስራዔኤሌ ዓሶም “ማዻንዳኔ” ጌይ ጫኣቄ ጫኣቁሞ

ፆኦሲ ዒስራዔኤሌ ዓሶ ዞቄ ባዞ ባንፆና ዓርናዺ ዔኪ ዴንዲ ዓሲ ናንጉዋ ዳውሎይዳ ዓኣ ሲና ዹኮ ኮይሎ ሄሊሴኔ። ዬና ቤዛ ካዮ ታሚ ዓርቂ ዓኣንቴ ሙሴ ዛጌ ቤዞኬ። ዴራ ዒማና ዬኖ ዹኮ ዴሞይዳ ፔኤኮ ዓፒሎና ማዦ ማኣሮ ዾቄኔ።

ፆኦሲ፥ “ታኣም ዒንሢ ዓይሢንቴቴ፥ ታ ዒንሢም ጫኣቄ ጫኣቁሞዋ ካፔቴ ታኣኮ ዒንሢ ቦንቺንቴ ዴኔ፤ ካኣቲም ማዻ ቄኤሴ፤ ታኣም ዱማዼ ዴሬያ ማዓንዳኔ” ጌይ ሙሴና ዒስራዔኤሌ ዴሮናም ኬኤዜኔ።

ዴራ ፆኦሲ ካኣሽኪፆ ዳምቦ ጎይፆና ፔና ሃይሦ ኬሊ ጊኢጊሻዛ ፆኦሲ ጉጉንሢና፥ ዜኤሊንሢና፥ ጩቢና፥ ዬያጉዲ ሃሣ ዼኤፒ ዛዬ ዑኡሲና ሲና ዹኮይዳ ኬዴኔ። ዒማና ዬኖ ዹኮ ኬስካንዳጉዲ ዓይሢንቴሢ ሙሴም ሌሊኬ።

ዬካፓ ፆኦሲ ዔያቶም ጫኣቁሞ ጫኣቃዖ፥ “ታ ዒንሢ ጊብፄ ዓጮ ዓይላታፓ ኬሴ፥ ዒንሢኮ ፆኦዛሢ ናንጊና ናንጋ ጎዳኬ። ሜሌ ፆኦዞ ካኣሽኪፖቴ” ጌዔኔ።

ዬያጉዲ ሃሣ “ሜሌ ባኣዚ ፆኦሲ ማሂ ኔኤም ኮሺፖ፥ ካኣሽኪያ ካኣሽኪፖ፤ ዎይታዛ ጌዔቴ ታኣኒ ናንጊና ናንጋ ጎዳ፥ ታ ሌሊ ካኣሽኪንታንዳጉዲ ኮዓ ዒኔ ዓኣ ፆኦሲኬ። ሱንፆ ታኣኮ ጉሪ ዔኤሊፖ፤ ሃውሾ ኬሎዋ ታኣም ዱማሳኒ ኮሺ ማሊ ዒና ዔኬ፤ ዬይያ ማዾ ኔኤኮ ኔ ላሆ ኬሊዳ ማዻንዳኔ፥ ላንካሳ ኬላ ጋዓንቴ ኔኤኒ ሃውሻንዳ ኬሊ፥ ሃሣ ታና ኔ ማሊ ጶቂሣንዳ ኬሊኬ” ጌዔኔ።

“ዓዶና ዒንዶና ቦንቼ፤ ዓሲ ዎዺፖ፤ ዓኒ ሃሣ ማቾ ማዒባኣ ዓሲና ላሂፖ፤ ዉኡቂፖ፤ ሉኡቂፖ፤ ኔ ላጋሢኮ ማቾ፥ ማኣሮ፥ ዬያጉዲ ዒዛሮ ማዔ ባኮ ቢያ ኔኤሮ ማዓኣባሽ ጌይ ሱኡካዺፖ” ጌዔኔ።

ፆኦሲ ዬያ ታጶ ዓይሢፆ ላሾ ፓልዒንቴ ላምዖ ሹቺዳ ፃኣፒ ሙሴም ዒንጌኔ። ዬያጉዲ ሃሣ ሃካፓ ሊካ ኬኤዚንታሢጉዴያ ሜሌ ዺቢ ዓይሥሢና ዳምቤያ ሙሴ ዛሎና ዒንጌኔ። ዴራ ዬያ ዓይሢፆና ዳምቦና ማዺ ኩንሤቴ ፆኦሲ ዔያቶ ዓንጃንዳሢና ፑርታፓኣ ካፓንዳሢ ጉሙርሲ ኬኤዜኔ። ዬያ ዓይሢፆንታ ዳምቦንታ ዔያታ ካፒባኣቴ ዴሮይዳ ፆኦሲ ሜቶ ዓጋንዳሢ ዔርቴኔ።

ዬያጉዲ ዒስራዔኤሌ ዓሳ ዓፒላና ማዢንታ ዱማ ማኣሪያ ማዣንዳጉዲ ፆኦሲ ዔያቶም ማዦንዶ ጎይፆ ኬኤዜኔ። ዬና ዓፒሎና ማዢንታ ማኣራ “ፆኦሲ ዴሮና ካኣማ ማኣሮ” ጌይንታኔ፤ ዼኤፒ ጎኦቦ ዓፒላና ጋሮ ዱማሶና ላምዖ ቆልዔያኣ ዓኣያኬ። ፆኦሲ ናንጋሢ ዒኢካታሢሮ ጎኦቦ ዓፒሎይዴና ጌይ ላምዓሳ ቆልዖ ጌላንዳጉዲ ዓይሢንቴሢ ቄኤሶኮ ቢያ ዑፃሢም ሌሊኬ።

ፆኦሲ ዓይሤ ዓይሢፆና ዳምቦዋ ዻቤ ዓይጎ ዓሲ ፆኦሲ ዴሮና ካኣማ ኬኤፄሎኮ ቤርቶ ዛላ ዓኣ ዒንጎ ባኮ ሺኢሾ ቤዞይዳ ፆኦሲም ዒንጎ ቆልሞ ሹኪ ዒንጋኒ ዳንዳዓያኬ። ቄኤሳሢ ዬያ ቆልሞ ሹኪ ዒንጎ ባኮ ሺኢሾ ቤዛ ሚቻኔ። ዬያ ቆልሞኮ ሱጉፃ ዓሢኮ ጎሞ ሺሚሻያ (ዓኣቻያ) ማዒ ፆኦሲ ቤርታ ዓሢ ጌኤሺ ማሃኔ። ፆኦሲ ዒማና ቄኤሶ ማዓንዳጉዲ ሙሴኮ ጌርሲ ዓኣሮኔና ዒዛኮ ዜርፆና ዶኦሬኔ።

ዴራ ቢያ ፆኦሲ ዔያቶም ዒንጌ ዓይሢፆ ኩንሣኒ፥ ፆኦሲ ካኣሽካኒ፥ ዬያጉዲ ሃሣ ፆኦሲም ዱማዼ ዴሬ ማዓኒ ዔኤዔኔ። ጋዓንቴ ያዺዲ ፆኦሲም ዓይሢንታኒ ጫኣቂ ማማዓዖ ፑርታ ጎሜ ማዼኔ።

ዒማና ሙሴ ሚርጌ ኬሊ ፆኦሲና ዎላ ሲና ዹኮይዳ ጌስቴኔ። ሙሴ ማዒ ሙካንዳኣና ዴራ ዬያ ኬሎ ቢያ ካፒፆ ዒፂ ቶኦዛዼኔ። ዬያሮ ዓኣሮኔም ዎርቄ ዔኪ ሙካዖ ፆኦዞ ማዣንዳጉዲ ዒዛ ዖኦጬኔ።

ዬያሮ ዓኣሮኔ ዬያ ዎርቆና ናኣሪ ማሊሲ ፆኦዞ ማዤኔ። ዴራኣ ፔኑሞ ኬኤሪ ዬያ ፆኦዞ ካኣሽኪሢ ዓርቄኔ፤ ዒንጎ ባኣዚያ ዔኪ ሙኪ ሺኢሼኔ። ዬያሮ ፆኦሲ ሚርጌና ዻጋዼኔ፥ ዴሮ ባይዛኒያ ማሌኔ። ጋዓንቴ ሙሴ ዴሮም ሺኢቄሢሮ፥ ሺኢጲፆ ዋይዚ ዔያቶ ባይዚፆ ሃሼኔ።

ሙሴ ዹካፓ ኬዲ ሙኪ ዬያ ማዦና ፆኦዞ ዴንቃዖ ሚርጌና ዻጋዼኔ፤ ኩጫ ዒ ዔኪ ዓኣ ታጶ ዓይሢፆ ዎጋ ፃኣፒንቴ ፓልዒንቴ ሹጮዋ ኬኤሪ ሜንሤኔ።

ዬካፓ ሙሴ ዬያ ፆኦዞ ጌይ ማዦና ባካሢ ሜንሢ ጋኣጬኔ፤ ዴራ ዑሽካ ዋኣፆይዳኣ ዬያ ሲኢራዖ ዴሮ ዑሼኔ። ፆኦሲያ ዴሮይዳ ፑርታ ዶርዖ ዳኬሢሮ ዺቢ ዓሲ ሃይቄኔ።

ሙሴ ጊንሣ ዹኮ ኬስኪ ፆኦሲ ዴሮም “ዓቶንጎ” ጋዓንዳጉዲ ሺኢቄኔ። ፆኦሲያ ሙሴ ሺኢጲፆ ዋይዚ ዴሮ ማኣሬኔ። ሙሴ ሜንሤ፥ ዎጋ ፃኣፒንቲ ዓኣ ፓልዒንቴ ሹጮ ቤዛ ፆኦሲ ሜሌ ዓኪ ሹቺዳ ታጶ ዓይሢፆ ጊንሣ ፃኣፔኔ። ዬካፓ ፆኦሲ ዒስራዔኤሌ ዴሮ ሲና ዹካፓ ዒዚ ዔያቶም ዒንጋንዳኔ ጌይ ጫኣቄ ዓጬሎ ዓርና ማዒ ዔኪ ዓኣዼኔ።