12. ዒስራዔኤሌ ዓሳ ጊብፄፓ ኬስኬሢ

ዒስራዔኤሌ ዓሳ ጊብፄፓ ኬስኬሢሮ ሚርጌና ዎዛዼኔ። ዬማፓ ማይ ዔያቶኮ ዓይላቶ ናንጋ ጋፔኔ፤ ዔያታ ዒማና ፆኦሲ ዔያቶም “ዒንጋንዳኔ” ጌይ ዎዞ ዒንጌ ዓጮ ዴንዲፆ ዓርቄኔ! ዒማና ዒስራዔኤሌ ዓሳ ጊብፄ ዓሶፓ ዎርቄንታ ቢራንታ፥ ዬያጉዴ ሚርጌ ባኣዚ ዔኪ ኬስኬሢሮ ዒኢካ ዓኣ ሜሌ ቶኦኪ ማዔ ዓሳ ፆኦሲ ጉሙርቂ ዔኪ ዎላ ኬስኪ ዴንዴኔ።

ዒስራዔኤሌ ዓሳ ጎይፆ ዴንዳኣና ሮኦሮ ሮኦሮ ፒዝ ጌይ ዔቄ ዖዶሲ ሻኣሬና፥ ዹሞና ጊንሣ ፒዝ ጌይ ዔቄ ታሚና ሶሮፒ ማዒ ፆኦሲ ዔያቶ ዔኪ ዴንዴኔ።

ዻካ ኔጋዖ ጊብፄ ካኣቲንታ ዴሮንታ ፔ ዒኖ ሺርሺ ዒስራዔኤሌ ዓሶ ጊንሣ ዓይሌ ማሃኒ ኮዔኔ። ፆኦሲ ዒ ሌሊ ጎኔ ፆኦሲ ማዒፆ ዴራ ዔራንዳጉዲ፥ ዒ ሌሊ ቢያ ባኮ ዎይሣ ጎዳ (ያህዌ) ማዔሢ ፓኣሮኔንታ ዒዛኮ ፆኦዞንታፓ ቢያ ባሼ ዎልቄና ዓኣያ ማዒፆ ዻዋኒ ፆኦሲ ጊብፄ ካኣቲ (ፓኣሮኔኮ) ዒኖ ዶዲሼኔ።

ዬያሮ ጊብፄ ካኣቲ ዒስራዔኤሌ ዓሶ “ጊንሣ ዓይሌ ማሃንዳኔ” ጌይ ፔኤኮ ዖሎ ዓሶና ዎላ ጊንፆ ዳውሲ ዴንዴኔ። ዒማና ዒስራዔኤሌ ዓሳ ጊብፄ ዓጮ ዖሎ ዓሳ ጊንፆ ሙካሢ ዛጋዖ፥ ዬያ ዖሎ ዓሶና ዞቄ ባዞናኮ ሳዛ ማዒ ሜቶይዳ ኬዴሢ ዔሬኔ። ሚርጌናኣ ዔያታ ዒጊጪ፥ “ጊብፄፓ ኑ ዓይጋ ኬስኬይ? ኑ ማይ ኩዴያዋይ!” ጌዒ ዒላቴኔ።

ሙሴ ዒስራዔኤሌ ዓሶም፥ “ዒጊጪፖቴ! ሃኖ ፆኦሲ ዒንሢ ዛሎ ዖልቲ ዓውሳንዳኔ” ጌዔኔ። ዬካፓ ፆኦሲ “ዴራ ባዞ ባንሢ ዴንዳንዳጉዲ ኬኤዜ” ጌይ ሙሴ ዓይሤኔ።

ፆኦሲ ዒማና ፒዝ ጌይ ዔቄ ሻኣሮ ዒስራዔኤሌ ዴሮና ጊብፄ ዓሶናኮ ባኣካ ዔቂሲ ጊብፄ ዓሳ ዒስራዔኤሌ ዓሶ ዴንቁዋጉዲ ሺቢሺ ዓኣቼኔ።

ዬካፓ ሙሴ ባዞይዳ ፔ ኩጮ ዞንካንዳጉዲና ዋኣፆዋ ፓቃንዳጉዲ ፆኦሲ ኬኤዜኔ። ዒማና ዋኣፆ ሻውሎና ሚዛቆ ዛሎና ሂዒ ፓቄም ጎይሢ ጌሢንታንዳጉዲ ፆኦሲ ዼኤፒ ዶዲ ዢባሬ ዔኪ ዬዔኔ።

ዒስራዔኤሌ ዓሳ ዋኣፃ ዔያቶኮ ሻውሎና ሚዛቆናይዳ ፓቂንቲ ኮጬ ማዒ ዔቄም ባዞ ፃኣዺና ፒቄኔ።

ዬካፓ ጊብፄ ዓሳ ዒስራዔኤሌ ዓሶኮ ቶሊ ዴንዲፆ ዛጋንዳጉዲ ዓኣቺ ዓርቄ ሻኣሮ ፆኦሲ ሌካ ዔቂሴኔ። ዬያሮ ጊብፄ ዓሳ ጊንፆ ዳውሲ ዬዓኒ ማሊ ዔቄኔ።

ዬያሮ ዒስራዔኤሌ ዓሶ ዳውሲ ባዞ ሳዞ ጊብፄ ዓሳ ጌሌኔ፤ ጋዓንቴ ፆኦሲ ጊብፄ ዓሳ ሜታዺ ካራ ባይዛንዳጉዲ ዔያታ ቶጊ ሙካ፥ ዖሎ ፓራሢ ጎቻ ሳርጌሎ ዖይቶ ዒኢካ ባዞ ሳዛ ሳዖይዳ ቶኦሊ ዓይሤኔ። ጊብፄ ዓሳ ዒማና “ዓሲዮቴ፡ ቶላኒ ጊንሢም ጳሽኩዋቴ! ፆኦሲ ዒስራዔኤሌ ዓሶ ዛላ ማዒ ኑና ዖሊሢዳኬ!” ጌይ ዒላቴኔ።

ዒስራዔኤሌ ዓሳ ጋዓንቴ ባዞ ኮሺና ፒንቃዛ፥ ሙሴ ጊንሣ ኩጮ ባዞ ባንሢ ዞንካንዳጉዲ ፆኦሲ ዒዛ ዓይሤኔ። ሙሴያ ዓይሢንቴ ጎይፆ ማዻዛ፥ ዋኣፃ ጊንሣ ዎላ ካኣሚ ጊብፄ ዓሶ ዱኡኬኔ፤ ጊብፄኮ ዖሎ ዓሳ ዬያይዲ ቢያ ዋኣፆና ዔኤዺንቲ ሃይቄኔ።

ጊብፄ ዓሳ ሃይቄሢ ዒስራዔኤሌ ዓሳ ዴንቃዖ ፆኦሲ ጉሙርቄኔ፤ ሙሴያ ጎኔ ፆኦሲ ማሊሢ ኬኤዛ ዓሲ ማዔሢ ጎናሲ ዔኬኔ።

ጊንሣ ሃሣ ዒስራዔኤሌ ዓሳ ፆኦሲ ዔያቶ ሃቢና ዓይላቶናፓ ዓይሴሢሮ ዒናፓ ዎዛዼኔ! ያዺ ማዒፆና ዔያታ ፆኦሲም ማዻኒ (ካኣሽካኒ) ዬያ ዓይላቶፓ ኬስኬኔ። ዒስራዔኤሌ ዓሳ ፆኦሲ ዔያቶ ጊብፄኮ ዖሎ ዓሶ ኩጫፓ ዓይሴሢሮ፥ ዔያቶኮ ዓይላታፓ ኬስኪፆዋ ቦንቻኒ ሚርጌ ዓይኑሞ ፆኦሲ ቦንቾም ማዓያ ዓይናዼኔ።

ጊብፄ ዓሶ ዔያቶ ዒ ባሺሴሢና ዓይላቶፓኣ ዔያቶ ኬሴሢ ማሊ ጶቂሣኒ ዒስራዔኤሌ ዓሳ “ዑሣ ዓኣዺሢ ቦንቾ” ሌዓ ሌዓ ቦንቻንዳጉዲ ፆኦሲ ዔያቶ ዓይሤኔ። ዬያሮ ዔያታ ዾንኪሳ ባኣዚባኣ ማራናይ ሹኪ ሹኪ ላኣዳና ዎላ ሙይ ዎዛዼኔ።