11. ዑሣ ዓኣዺፆ ቦንቾ

ጊብፄ ካኣቲ ዒስራዔኤሌ ዓሶ ሃሺባኣቴ ዓሶንታ ቆልሞንታኮ ቶይዶ ናኣቶ ፆኦሲ ዎዻንዳያ ማዔሢ ላቲ ኬኤዜኔ። ፓኣሮኔ ዬያኣ ዋይዜዖ ፆኦሲም ዓይሢንቲፆ ዒፄኔ።

ፆኦሲ ዒዛ ጉሙርቄ ዓይጎ ዓሲኮዋ ቢያ ቶይዲ ናይ ዻቂሻንዳ ጎይሢ ጊኢጊሼኔ። ፔቴ ፔቴ ማኣሮ ዓሳ ዾንኪሳ ባኣዚባኣ ማራናይ ዶኦሪ ሹኬኔ።

ፆኦሲ ዒማና ዬያ ማራዖ ሱጉፆ ዔኪ ፔ ማኣሮ ጌሎ ካሮ ቲሽካንዳጉዲ፥ ዓሽኮዋ ሚቺ ላኣዳና ዎላ ሩኡሪ ሙዓንዳጉዲ ዒስራዔኤሌ ዓሶም ኬኤዜኔ። ዬያ ሙሙዓዖ ዑኬና ጊብፄፓ ኬስካኒ ጊኢጊንታንዳጉዲያኣ ኬኤዜኔ።

ዒስራዔኤሌ ዓሳ ፆኦሲ ዔያቶም ኬኤዜማ ጎይፆ ቢያ ባኮ ማዼኔ። ሳዓኮ ጊዲሚሺ ማዓኣና ፆኦሲ ጊብፄ ዓጮ ቢያ ሃንቲ ቶይዲ ማዒ ሾይንቴ ናይ ቢያ ዎዼኔ።

ዒስራዔኤሌ ዓሶኮ ማኣሮ ካራ ቢያ ሱጉሢና ቲሽኪንቴያታሢሮ ፆኦሲ ዬያ ማኣሮኮ ዑሣ ዖኦኪ ዓኣዼኔ። ዬኖ ኬኤፃ ዓኣ ዓሲ ቢያ ሃይቁዋዖ ዓቴኔ፤ ዒስራዔኤሌ ዓሳ ዬያይዲ ማራዖ ሱጉፆ ዛሎና ሃይቦፓ ቶሌኔ።

ጊብፄ ዓሳ ጋዓቴ ፆኦሲ ጉሙርቂባኣሴ፤ ዓይሢፆዋ ካፒ ኩንሢባኣሴ። ዬያሮ ፆኦሲ ዔያቶ ማኣሮ ዖኦኪ ዓውሳኒ ዳንዳዒባኣሴ። ያዺዲ ፆኦሲ ጊብፄ ዓሶኮ ቶይዶ ናኣቶ ቢያ ዎዺ ኩርሴኔ።

ቱኡዞ ማኣራ ዓኣ ዓሶፓ ዓርቃዖ ዴንዲ ጊብፄ ካኣቲ ማኣሮይዳ ዓኣ ቶይዶ ዓቲንቆ ናኣቶ ሄላንዳኣና ሃይቂ ቢያ ኩዴኔ። ዒማና ጊብፄይዳ ዓኣ ዓሳ ሚርና ዖዬሢሮ ዺቢ ዓሲ ዒላቲ ዒላቲ ዬኤካኔ።

ዬኖ ኬሎ ዋንቶ ጊብፄ ካኣቲ (ፓኣሮኔ) ሙሴና ዓኣሮኔና ዔኤሊ፥ “ዒስራዔኤሌ ዓሶ ሃሢ ታ ዓጫፓ ዔኪ ዴንዱዋቴ!” ጌዔኔ።