8. ዋቀ ዮሴፍ እሾ ቶለይሾኤ ድንሼ

ቆተ የእቆፕ ሄላድ ፕሰ ቀረን ቀፕቶኤ አከተ ዮሴፍ ጫለኖ መለ፥ ከ ኦልሰ አክመ ሳረይሾ ኮዶኤ ኦልሶዴ ቀረን ኻቴኤ፥ ሄላሶ ፕሰ ዮሴፍ ኔደን። ከ ኤቴ ዮሴፍ ሄላሶ ከፖፐ ዴኤዬ፥ ቀፔን ከ ኦረ ከርፕሸደ ነከኖ ከቴን፡፡

ፐራደ ሌከየ ከመዬ የእቆፕ ኤቴ ኬሬዬ፥ አከ ሄላሶ አሆሬተ ስክነ ዋ ኦፐ ቻኔ ካሰዶኤ እናሴኔ አጫለነ ዮሴፍ ኤርኬ፡፡

ሄላፐ ዮሴፍ አትኮፐን ከልን ቱረኔ ሜሀደ ዮሴፍ ቁደ ከካኤን ከ ዲከ ቆልፐይታትን ለሄን። ከ ሴከመዬ፥ ሜሀዳሴኔ አዮሴፍ ዲከን ለሀሜ ኣፐይሾት አክሼን፡፡ የእቆፕከ ድከዴ ከ ክዴ፥ ፕነንተ እናዮ ዮሴፍ እሼ፤ ከ አከተ ኛረሄ፡፡

ነከቴዋሴኔ አከርፕሸደከ ዮሴፍ ቄዴን ከ ፒተ ክፕስ ኦፐን ኣኔን፡፡ ስትይ ክፕስ ፒተ ኩተ ከ ኮኮከ ከ ክረ አፐይ ከፐ ክተ። ነከቴዋሴኔ አከርፕሸደከ ኣፐ ተከ ቴየንቶለይተ ኮዴ ከ ስልታነ መንክስቴተ ቀፖኤ ዮሴፍ ከርፕሹመ ከቴን። ዮሴፍከ ፖቀላድ ኬለ ፈየ ኮደ ኮን፡፡ ዋቀከ ዮሴፍ ሰኬ፡፡

እስከቴተ አፖቀላድከ ዮሴፍ ኦል አልመሉመ ኤከሴ፡፡ ዮሴፍ ኾር ፉለ ዋቀ ቱረ ጩፖተ አንኮዶ ክዴ ከ ቀረ ቲቴ፡፡ እሼተ ቆተ ቀረ ሚሮቴ መለ፥ ደርተኔ እሸ ኸሰስቴ እከ ቀፐሜ ከ ትከ ህደ ኦፐ ቄደሜ። ትከ ህደ ኔፎ ከረዬው፥ ቆተ ዋቀኤ አአመነሜ ኮዴ መለ፥ ዋቀከ እሸ ሰኬ፡፡

ከደ ፑኑ ዮሴፍ ደፐን ቀፕንን ኔፎዬ፥ ፐረ ለክ ከመዬ ከሱ ትከ ህደ ከረዬው ቸ። ሀልኬተ ተከዬ፥ አኦረ ክፕስ እሽ ኪኖ፥ ‹‹ኑቆስኖ›› ፌርኦን ኦልሰ አከተ እሸ ፉርሼ ለክ ኦልሶዴ፡፡ ኡመ ኦካድ ኦፐዬ ተከ ኔፎ ኦልሶስን እሽ ፉረ እንኤተንኔ፡፡

ዋቀ ኦልሰ ፉሬተኤ ኤተንሰ ዮሴፍ ዳሼ፤ ሴመለ ፌርኦንከ ትከ ህደ ከረዬ ዮሴፍ እስከፖፐ ሀላችሴ፡፡ ዮሴፍከ ኦልሳሴኔ እሽ ፉሬ ከ ክዴ፥ ‹‹ዋቀ ፐራ ሂረ ተፐ ኤርከ፣ ከመኤው ፐራ ሎተ ተፐ ዴአ።››

ፌርኦንከ ዋ ዮሴፍፐ አከተ ቀዋዌ፣ ከ ፒተ ክፕስ ቀረኤ እሸ ከመኤ ነመ ስልታነ ቀፖ አለመታት ኮዴ ከ ሹሜ።

ዮሴፍከ አከ ሰመይተ ፐራዶሴን አሂረ ፐቃረ ኦፐዬ ኡንተ ኩተይቴተ ኮሰደ ከሮፐ ከልሾኤ ሌሌ። ኤቴ ፐራደሴኔ አሎተ ተፐ ከይቴዬ፥ ዮሴፍከ ኡንተሴ ኮሰደ ከረ ክቶ ሰመይተ ከቴ፤ እከ ዋ ደመኔ ፈየ ቴዬን፡፡

ሎቶሴ ኮኮከ ፒተ ክፕስ ፐተ ከረኤን ዴኔመ፥ ፒተ የእቆፕ እሾ ቶለድ እሽ ከሎ አኬኔኣን ከሱ ሎሶዴ፡፡

የእቆፕከ ሄላድ አከ አናን ከ ፒተ ክፕስት ኡንተ ፕደኔ ኤርኬ፡፡ ሄላፐ ዮሴፍ ኤቴ ኡንተ ፕደ ኣኔን ከ እሸ ቱረ ቀቀአዴኔዬ፥ አከ ዮሴፍ ኮዴ እንኡፕናኔ፥ ዮሴፍ ኾር እእሾተ ኡፕናዴ፡፡

ዮሴፍ ኤቴ ሄላሶ ኤከይሰዴ ከመዬ፥ ድከተይሾ አከ ፑርሰሜ ኡፕናተኤ እሾተ ክዴ፥ ‹‹እንፉረን! አንት አንእናስን አንዮሴፍ፤ አውተ ከርፕሹመ አነ ከንተኔዬ፥ ኔቁምተ አነ ቀረ ኮደ ድከቴን፤ መ ኾር ዋቀ ኔቁምተ ፐኻሩምቶፐ ፑርሼይ ኾየ ከ ክፕስ ከረ ከላደ፥ አንት ኔፎ ዋ እሽን እሾ ቶለስነ ፐርፓችስነኤን እሽነ ዳሸይ፡፡››

ሄላፐ ዮሴፍ ኤቴ ፒተይሾ ኦፐ ቲተዌንከ አከ ዮሴፍ ቾ ኣፐይሾ የእቆፕ ሌሌኔዬ፥ የእቆፕ አከተ ኸሶዴ፡፡

ከደ ፑኑ የእቆፕ ነመ ኬሬ ኮዴ ኔፎዬ፥ ቶላድ ፕሰ ኦልን ፒተ ክፕስ ኦፐ ኣኔ ከ ኤዬ ከላዴ፡፡ የእቆፕ አእንቶንን ቱረኔ መተ ምነኤ ሄላድ ፕሰ ሰኬ፡፡

ኮደይቴተሴ አክፔተ አዋቀ አፕርሃም ዳሼከ ይስሀቅፐ ቱልቴ፤ ከ ከመዬ የእቆፕፐ፥ ከ ከመኤው ሄለ አየእቆፕ ኩደንከ ለክ እሾ ቶለዳሶ ኦፐ ቱልቴው፡፡ ሰኜሴ አሄሎስን ኩደንከ ለክከ ከፈደ አእስረኤል ኩደንከ ለክ ኮዴን፡፡