7. ዋቀ የእቆፕእ ሰኬ

ሄላሴኔ ኤቴ ኩኩተዴኔዬ፥ የእቆፕ ኣየሶ ኦልይ ትኮፐ ተዌተ ጫለን፡፡ ኤሳው ኾር፥ ኩተይመ ጫለን፡፡ ርፕቀከ የእቆፕ ጫለን፣ ይስሀቅ ኾር ኤሳው ጫለን፡፡

ኩያተ ተከዬ፥ ኤሳው ኤቴ ኩተነ ኬለ ከሎዬ፥ አከተ ዶኼ፡፡ ኤሳውከ የእቆፕ ክዴ፥ ‹‹ሰክኔ ደምታይት ቁደ ሸከይቴተ አነ ዳሼ።›› የእቆፕከ እሽ ኦርሼ ከ ክዴ፥ ‹‹ፓዮተኤ መፕቴተ ቃርቱመይት አነ ዳሼ፡፡›› ሴመለ ኤሳውከ መፕቴተ ቃርቱማድ የእቆፕ ዳሼ፤ ሴከመዬ፥ የእቆፕከ ደምተሴ አኮዴ ቁዳዬ እሽ ዳሼ፡፡

ይስሀቅከ ሰካድ ኤሳው ዳሼተ ፈዴ፡፡ መ ኾር አሴዴን ኮንን ቱረኔ፥ ርፕቀ እሾ የእቆፕከ ይስሀቅ ሰሰፐዴን፡፡ የእቆፕ ኤሳው ፐሃነዴከ ይስሀቅ ከፖፐ ዴሃዴ፡፡ ይስሀቅ ስትይ አከተ ኬሬ፥ ኡመ ፓተ አክንንቾ፡፡ ሴመለ የእቆፕ ሜሀደ ኤሳው ከልሰዴ ከ ኦይሌተ አቴለ ኾልመ እሾ ሀርከ ቁደ ኮደዴ ከ ኣፐይሾ ይስሀቅ ከፖፐ ዴሃተን እሸ ሰሰፐዴ፡፡

የእቆፕከ ኤሳው ከፖፐ ዴኤ ከ እሽ ክዴ፥ ‹‹አንት አን ኤሳው፤ እንዴኤይ አነ ሰከ እኤተንሰ።›› ይስሀቅከ ኦይሌተሴ አቴለ ቀፐዴ ከ ሜሀዳድ አለይሰዴ ከ አከ ኤሳው ኮዴ ድከዴ ከ እሽ ሰኬ።

የእቆፕ ቆተ መፕቴተ ቃርቱማድ እሾ አሰካድ ሰሰፐን ቀረዬ ቴየዴ መለ፤ ኤሳው የእቆፕ ኔደዴ፤ ከ ኦቶ ኣፐይሾ ቶኦ ከመዬ፥ እሸ እሸተ ኩል ድከዴ፡፡

መ ኾር ርፕቀ ዋ ኤሳው ድከዴኤ ደከይቴ፡፡ ሴመለ እሼተ እሾ ይስሀቅከ አከ ሰኜታይሾ ከፐ ከላዶኤ፥ ፒተ ሴከ ኦፐ የእቆፕ ኤርኬን፡፡

የእቆፕከ ፐራ ሌከየ ሰኜተ ኦፐ ርፕቀ ከፐ ከላዴ፡፡ ስትይ እሄሜ ከ ሄለ ዲረ ኩደንከ ለክ (12) እሾ ኤኔንተ ተከ (1)ኻየዴ፡፡ ዋቀከ አከተ እሸ ቴየንተይሼ፡፡

አፒተ ሞሶፕተምያት ከላዴ ፐረ ኩንደ ለክ (20) ከመዬ፥ የእቆፕ ቶላድ ከ ኦርኸያድ እሾ ሆሬታድ አቀፖ ፕሰኔ ፒተ ኬኔኣን ኦፐ ኦረ ፒሰዴ።

የእቆፕ ቆተ ከርተ ከረንኸተ ድከኖ ከኖ ከ ኪኖ ኤሳው አመ ኔፎ አነ እከሰን ዲሾ መለ፥ አከተ ፉሬ፡፡ ከ ሴመለው ሀርከ ፖርነይሸኤ ሆሬቶፐ ኼሎተ ኩተይቴተ ሬኼ ከ ቱረንዴሰ አረይተ ኤሳው ኤርኬ፡፡ ኦርኸያሴኔ አየይቆፕ ሆሬተን እሽ ዴኤከ ኤሳው ክዴኔ፥ ‹‹ኦርኸይታይት የእቆፕ ሆሬሴኤ ኬ ኤርኬ፤ እሸ ኔፎ፥ ክሴተ ዴሀ ኦፐኤ ዴአ።››

ኤሳው ኾር ቆተ ዴዮኤው የእቆፕ ደፓድ ዲሼ መለ፥ አመ ከሱ ኸሰኔ እሸ ቴየዴ፡፡ የእቆፕከ ፒተ ኬኔኣንት ነከይተን ከላዴ። ሴከመዬ፥ ይስሀቅከ ቶኤ፤ የእቆፕ እሾ ኤሳውከ እሸ ሀውላዴን። ክፔተሴ አኮደይቴተ አዋቀ አፕርሃም ዳሼከ አመ ይስሀቅ ዴሰ የእቆፕ ኦፐ ቱልቴ፡፡