49. ኮደይቴተሴ ሃረየ አዋቀ

ኤርከምፐቶተ ተከ፥ ኤነንተ ተከ እስን ክቶ ከ ማርያም ክደምቶ አከ እነ ዋቀ ኸይቶ እሽ ሌሌ፡፡ ሴመለ እሼተ አእስን ክቶዬ እነ ዲርተ ኻይቴ ከ ዬሱስ ኪቴ ከ ሀሌቴ፡፡ ሴመለ ዬሱስ ዋቀ ከ አሬን ነመ፡፡

ዬሱስ አከ ዋቀ ኮዴ ዱከይሰተኤ፥ ደኾወ ሌከየ ኮዴ፡፡ ፕሸ ቀረንዴሰ እኣኔ፤ ፑፔተ እጨው ኪሼ፤ ፓቆለየ ሌከየ ድንሼ፤ ሴተነ እሶክሼ፤ አሌኤ እኻሼ፤ ከ አሴው ላቆተ ኬን እሾ ሙርኩጨ ሸሸከ ለክ አከ ነመ ኩመ ኬን (5,000) ቀሮፔለ ቾ ቀረ ከይቶ ኮዴ፡፡

ዬሱስ ኔፎ ኮልሰምፐይተ ኩተ፤ ቆተ እነ ዋቀ ኮዴ መለ፥ ኡኩሜተኔ ሃሰወዴ፡፡ አከ እስ ጫለንተን ምነኤ ኦረ ፕለ ከሱ አሴው ጫለደ ክዴ ከ ኮልሼ፡፡

እሸ አከ ቴየንታይሽን እሾ ዋ ቀፕተኔ ፕሰ ጫለንተን ምነኤ ዋቀ ጫለተ እሽን ፐርፓችስን ክዴ ከ ኮልሼ፡፡

ዬሱስ፥ መንክስቴተ ዋቀ ወ ፒተ ቀረ ቸ ፕሰ ቀሮፔለ አኡልፌሰምቴ ክዴ፡፡ ነመ ፕሰኤ ዋ ድኬት አከተ ፐርፓችስነ፥ ከፈ መንክስቴተ አዋቀ ኮዴተ፡፡ መንክስቴተ ዋቀ ኦፐ ከልተኤ፥ ጩፖታይሽን ኦፐ ድኔተ እሽን ፐርፓችስን፡፡

ዬሱስ ኦረ ዴሞ አክመ እሸ ቴየዶ ከ ድኖ፤ አፕለኤው ኾር አክመ እሸን ቴየንን ኮልሼ፡፡ ኦረ ዴሞ አክመ ፒተ ፈየ ምነ ክዴ፡፡ ኦቶተሴ አፈየ አዬሱስ ቴየደን ከ ድነን፡፡ ኦረ ዴሞ ኾር አክመ ፒተ ኮኮህተ አኾተ ቃሌተ ዋቀ ከሮፐ ኩልንንክንን እከ ደልተ ተከ ኔፎ ደልንክንን ምነ፡፡ ኦሮሴ ኤዬ ቾ፥ ኦረ አኤርከነ ዬሱስ ዴሰ ሌለመ ቴየንንክንን ከ መንክስቴታድ ኦፖፐ እንከልን፡፡

ዬሱስ፥ አክመ ዋቀ አከተ ጩፖለየ ጫለኖ ኮልሼ፡፡ እሾተ ዲሰተ ኮዴተ ከ ሄላድ ኮደተ ፋን፡፡

ዬሱስእው አክመ ዋቀ ጩፖተ ኔዶ እኖ ሌሌ፡፡ ክሴተ አታም ከ ሄዋን ጩፖተ ኮዴኔዬ፥ ጩፖሴ ሰኜታይሾ ፕሰ ምድቴ፡፡ ሴዴ ቀረን ኻቴኤ፥ ነመ ፒተ ቀረ ቾ ፕሰከ ጩፖተ ኮን፤ ከ ዋቀ ኔፎ ከፐ ፑርሰም፡፡ ሴመለ ነመ ፕሰ ፓርከለ ዋቀኤ ኮዴ፡፡

መ ኾር፥ ዋቀ ቆተ ድኬት ኦረ ፒተ ጫለዴ መለ፥ እናድ ተከኔ ዳሼ። ሴዴ ኔፎ ነመ እኖሴን ኻድ አመኖ ፕሰ፥ አከ ቻተ ፐረፐረ አከዶ ዲሼይ፥ አከ ፐቶ መለን፡፡

ጩፖታይሽን ምነኔ አደፐምፐየይ ቶተ እሽን ፐርፓችስን፡፡ ዋቀ እሽን ቀረ ሚሮተ እሸ ፋን ሄኔ፤ መ ኾር፥ እሽነ ቀረ ሚሮተ ከፓዬ፥ ዬሱስ ቀረ ሚሮዴ፡፡ አዬሱስ መስቀለ ቀረ ቶኤዬ፥ ቅታቴተይሽነ ቴየዴ፡፡

ዬሱስ ፐከነ ጩፖተን ኮኔ፤ መ ኾር፥ ጩፖታይሽን ከ ጩፖተ አፒተ ቀረ ክቶ አእነ ነመ መተ ምነኤ አሌ ፐትሰኤ፥ ቀተአመ ከ ከልሶተ ዱካተ ኮደ ከ ቶተ ጫለዴ፡፡ ዬሱስ ቆተ ከልሶተ እስ ኮዴ ከ ዳሼ መለ፥ ዋቀ ጩፖተ ፕሰ፤ ጩፖተ አከተ ኔቀ ከሱእ ዲሰተ ኮደ እኤተንሸ፡፡

ኮደዳስን አፐቃረ እሽን ድንሰ እንኤተንሸን፡፡ ዋቀ ኦል አኬተኤ ዋ ኮደ ኤተንሰኔ ተከን ኔፎ እንቻን፡፡ ዬሱስ ፐተ ጩፖታይሽን እሽነ ጨቀ ኤተንሸ፡፡ ዬሱስ አክመ እነ ዋቀ ኮዴ፥ ከ ፐከይሽን ኦፐ መስቀለ ቀረ ቶኤ፥ ዋቀከ ቶቶፐ እሸ ኻሼ አመኔተ ፐተ እሽን ፐርፓችስን፡፡

ዋቀ ነመ ዬሱስ አመኖ ከ ፖቃላድ ኮደኖ ከ ቴየኖ፥ አይኖ ኔፎ አኮድቶ እድንን፡፡ ቴየንቶለየ ኮድቴ ታክ ቴኮለየ፥ ዲርተ ኮድቴ ታክ እስከተ፥ ነመ ቅም ኮድቴ ታክ ኸዮለይተ፥ ታክ ፒተ ሄንቴ ከላንተኔዬ፥ ሴዴ ዌኤን፡፡ ዋቀ እሽን ቁዶፐ ዴሃተ አከ ኤተንሾኤ እሽን ጫለን፤ ከ አከ ዬሱስ አመንተኔ ፋን፡፡

ዬሱስ አከ አመንተን ከ ክርስትነ ኻተኔ እሽን ካሰን፡፡ ዬሱስ አከ ድንሸምፐይተ፥ እነ ዋቀ ተከን ኮዴ እአመንተኔ? አከ ጩፖለየ ኮድቴን፥ ከ ከድ ዋቀ እሽን ቀታነዬ አክመ ፐርፓችስንቶ እአመንተኔ? ዬሱስ ጩፖታይሽን ፐተሰ መለ፥ አከ መስቀለ ቀረ ቶኤ እአመንተኔ?

ኦቶን ዬሱስ እሾ ኮደ እሸ እሽነ ኮዴኔ አመንተኔዬ፥ እሽነ አክርስታነ! ዋቀ ሴተነ እሾ መንክስቴተ ቱከንተ ከረ እሽን ሶክሼከ መንክስቴተ አለይተ ዋቀ ከረ እሽን ኻዬ፡፡ ዋቀ ሳንተሴ ኻይሽን ኬርቴ እሾ አጩፖተ አእሽን ፓተ ኮደንተኔ አሌ ፐሼ ከ ሳንተ ሃረየ አቁልቁሉመ እሽነ ዳሼ፡፡

እሽነ አክርስታነ፤ ኮደ አዬሱስ ኮዴ ምነን፥ ዋቀ ጩፖታይሽን እእሽነ ዲሼ፡፡ አመ ኦር ፓርከለ ዋቀ ኮደ ከፐዬ፥ አከ ሞተዳድ አቁደ ዴሀ ኮድቴን ምነኤ እሽን ድከ፡፡

ኦቶን ሞተደ ዋቀ ከ ኮደምፐየ አዬሱስ ኮድቴኔዬ፥ ዋ ዬሱስ እሽን ኮልናትእ አጨጨምተን፡፡ ከደ ፑኑ ክርስታነ ኮድቴን ኔፎዬ፥ አመ ኩል ጩፖተ ኮዳኤ ኤከይሰተምተን፡፡ መ ኾር ዋቀ አአመነሜይ፥ ኦቶ ጩፖታይሽን ኦፐ አረረ ከልተኔዬ፥ እንእሽነ ዲሸ ኪን፡፡ ከ ሁፕነ አእሽን ጩፖተ ሺሽተን እሽነ ዳሸ፡፡

ዋቀ አከ ቅንሰተን፥ ከ ቃሌታድ ኮለተን፥ ከ ክርስታነ አፕለ ኦል እሸ ዋቁምሰተን፥ ከ ዋ እሽነ ኮዴ ኦረ ፕላት ሌልተኔኤ እሽን ካሰን፡፡ ዎሴን ፕሰ አከ እሸ ቁዶፐ ዴሃተን ከ ኦል አክተኔ እሽን ቃርቃረን፡፡